Nkyerɛkyerɛ na Ahyɛmudzi

Nda a odzi ekyir nyikyerɛ krɔnkrɔn na nkenyan nsɛm a wɔakã aboa ano akyerɛw. Ewuradze dze iyinom maa Joseph Smith na dodow a wodzii n’ekyir no ma wɔdze akyekyer Nyankopɔn n’ahenman a ɔwɔ asaase yi do na wɔdze akyerɛkyerɛ wɔ nda a odzi ewiei yi mu. Nkyerɛkyerɛ na Ahyɛmudzi no yɛ kyerɛwsɛm gyinapɛn wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no no mu kor, dza ɔkã ho nye Bible, Mormon Nwoma, na Bota a Ɔsom Bo Mapa. Nkyerɛkyerɛ na Ahyɛmudzi yɛ soronko, eso, osiandɛ wɔannkyerɛ ase emmfi tsetse nwoma mu ntsi; Ewuradze dze dɛm nyikyerɛ yinom maa No nkɔnhyɛfo a Ɔsaan mu yii hɔn wɔ dɛm nkyirmba ber yi mu aama ɔdze N’ahenman no asan anan mu aba. Nyikyerɛ no mu no obi tum tse Jesus Christ Ne ndze bɔkɔɔ a ɔyɛ ndam no (N&A 18:35–36).

Joseph Smith n’abakɔsɛm no kã dɛ Nkyerɛkyerɛ na Ahyɛmudzi yɛ Asɔr no ne fapem wɔ nda a odzi ekyir yi mu na ɔyɛ mfaso dze ma wiadze (N&A 70 etsifi nsɛm). Nyikyerɛ a ɔwɔ mu no nye dwumadzi a wɔdze risiesie kwan ama Ewuradze Ne Mbaa a Otsia Ebien no n’ahyɛse, na ɔhyɛ nsɛm nyina a nkɔnhyɛfo fi wiadze ahyɛse kãe no mã.