Jerusalem

Kuropɔn bi a ɔwɔ nkyirmba Israel. Ɔyɛ kuropɔn a no ho hia kɛse wɔ Bible abakɔsɛm mu. Mbea binom a wɔyɛ krɔnkrɔn ma Christianfo, Jewfo, na Muslimfo no wɔ kuropɔn yi mu na agyedzifo nokwafo pii taa kɛsera hɔ. Wɔtaa frɛ hɔ kuropɔn krɔnkrɔn.

Mber bi nna nkyɛ wɔfrɛ hɔ Salem (Gen. 14:18; Ndw. 76:2), Jerusalem yɛ Jebusfo kuropɔn kɛpeem dɛ David kõe gyee (Josh. 10:1; 15:8; 2 Sam. 5:6–7), ɔno na ɔdze yɛɛ no kuropɔn. Ahyɛse no nna ɔtse dɛ mbepɔw bamba bi a ne tsentsen bɔ po bɛyɛ ananmɔn 2600 (meter 800). Mbɔnsa a no mu dɔ abɔ no ho nyina aporɔw gyedɛ n’etsifi afamu hɔ nko na bi nnyi.

Ɔhen David n’ahendzi mber do wɔ Jerusalem no, nna ɔtse ahemfie a wɔdze ndua esi mu. Eso Solomon n’ahendzi mber do no, nkorɔfo no yɛɛ ndzɛmba pii dze maa kuropɔn no mu yɛɛ fɛfɛɛfɛw, wosii ahemfie na temple.

Ber a Israel na Judah ahenman no mu kyɛɛ ebien no Jerusalem daa ho yɛɛ Judah no kuropɔn. Mpɛn pii na nsordaafo fii mbeabea soɛree baa hɔn do (1 Ahem. 14:25; 2 Ahem. 14:13; 16:5; 18–19; 24:10; 25). Ber a wɔhyɛ Hezekiah n’ase no, Jerusalem bɛyɛɛ nyamesombea hɔn finimfin mbom wɔsɛɛ ne fã kakra wɔ mfe 320 Ansaana Wɔrobɔwo Christ; 168 Ansaana Wɔrobɔwo Christ; na 65 Ansaana Wɔrobɔwo Christ. Herod sanee sii afasu na temple no, mbom Wɔwoo Christ n’ekyir afe 70 mu no, Romanfo sɛɛ hɔ korakora.