David

Tsetseberdo Israel ɔhen bi a ɔwɔ Ahyɛmu Dadaw no mu.

David yɛ Jesse a ofi Judah ebusuakuw mu ne babanyin. Ɔyɛ aberantsɛ ɔkokodurfo a okum awendadze, na osisi nye Philistiafo hɔn nyimpa ɔbran Goliath (1 Sam. 17). Wɔsaan mu yii David na wɔseraa no ngo dɛ ɔmbɛyɛ Israelfo hɔn hen. Tse dɛ Saul, ɔyɛɛ panyin no ɔyɛɛ bɔn kɛse, mbom, ɔannyɛ dɛ Saul, otumii nuu noho nokwar mu. Dɛm ntsi onyaa bɔnfakyɛ, gyedɛ ewu a odzii Uriah no nko (N&A 132:39). Wobotum akyekyɛ n’abrabɔ mu anan: (1) Bethlehem, bea a nna ɔyɛ oguanhwɛfo no (1 Sam. 16–17); (2) Ɔhen Saul n’ahemfie (1 Sam. 18:1–19:18); (3) eguanguandzi (1 Sam. 19:18–31:13; 2 Sam. 1); (4) Dɛ Judah hen wɔ Hebron (2 Sam. 2–4), Nna ekyir no ɔyɛɛ ɔhen wɔ Israel nyina do (2 Sam. 5–24; 1 Ahem. 1:1–2:11).

David ɔnye Bathsheba hɔn awartõ ekyir no esian pii baa n’abrabɔ mu a ɔmaa mfe eduonu a odzi ewiei no, n’abrabɔ annyɛ tɔɔtsen. Ɔman no dze ɔyɛɛ prɔmprɔm aber a odzi hen no, na mbom David nankasa dze osian no bɔn ntsi ɔhawee. Ɔham sii n’ebusua mu kyɛree, dza ɔmaa asɛm sii Absalom nye Adonijah mu ma n’ewiei no bagua mu etuatsew bae. Dɛm ndzɛmba yinom a osisii yi hyɛɛ Nathan nkɔnhyɛnyi no ne nsɛm a ɔkãa kyerɛɛ David no mã osian no bɔn ntsi (2 Sam. 12:7–13).

Ndzɛmba yinom nyina sisii dze naaso David n’ahendzi na ɔhyerɛɛn kɛse wɔ Israelmba hɔn abakɔsɛm mu, osiandɛ (1) ɔkãa ebusua ekuw ekuw nyinara bɔɔ mu ma wɔyɛɛ ɔman kor, (2) ɔperee bɔɔ ɔman no ho ban, (3) ɔdze nokwar nyamesom buu ɔman no ma Nyankopɔn ne pɛ bɛyɛɛ Israel mbra. Ɔnam dɛm siantsir yinom ntsi, ekyir no wɔfaa David n’ahendzi no dɛ ɔyɛ ɔman no ne mber pa na enyimnyam soronko ne saso ber a Messiah no bɛba (Isa. 16:5; Jer. 23:5; Ezek. 37:24–28).

David ne bra kyerɛ siantsir a ɔwɔ dɛ nyimpa nyinara tsim wɔ tseneneeyɛ mu dze kodu ewiei. Ber a ɔyɛ aberantsɛ no, nna wɔkã dɛ ɔyɛ obi a ɔda Ewuradze “nankasa n’akoma ho” (1 Sam. 13:14); onnyinii no, ɔdze Sunsum kasae na onyaa nyikyerɛ pii. Mbom otuaa akatua kɛsenara wɔ asokyew a ɔyɛe wɔ Nyame ne mbrasɛm ho (N&A 132:39).