Jeremiah
Ahyɛmu Dadaw mu nkɔnhyɛnyi a wɔwoo no too asɔfo ebusua mu na ɔhyɛɛ nkɔm wɔ Judah fi 626 dze kesi 586 Ansaana wɔrobɔwo Christ. Ɔtsenaa ase ber a nna nkɔnhyɛfo ekunyin binom tsetse dɛ: Lehi, Ezekiel, Hosea, na Daniel tse ase no.
Wɔhyɛɛ Jeremiah dɛ ɔmbɛyɛ nkɔnhyɛnyi ansaana ɔreba asaase do (Jer. 1:4–5). Ne mfe eduanan mu dɛ ɔyɛ nkɔnhyɛnyi no ɔkyerɛkyerɛɛ dze tsiaa abosonsom na ndwamandze a ɔwɔ Jewfo mu no (Jer. 3:1–5; 7:8–10). Nkorɔfo tsiaa no pii na wɔbɔɔ no adapaa (Jer. 20:2; 36:18–19; 38:4). Jerusalem hwee ase ekyir no, Jewfo no a woguanee kɔr Egypt no faa Jeremiah kãa hɔnho (Jer. 43:5–6), hɔ na dɛ mbrɛ tsetsesɛm kyerɛ no, wosiiw no abo kum no.
Jeremiah nwoma no
Etsir 1–6 yɛ nkɔnhyɛ a ɔhyɛe wɔ aber a Josiah dzi hen no. Etsir 7–20 yɛ nkɔnhyɛ a ɔhyɛe wɔ Jehoiakim n’aber do. Etsir 21–38 fa Zedekiah n’ahendzi ho. Etsir 39–44 yɛ nkɔnhyɛsɛm nye nsɛm a osisii wɔ ber a Jerusalem hwee ase no ekyir. Tsir 45 yɛ anohoba a ɔdze bɔɔ Baruch, ne kyerɛwfo kyerɛ dɛ wɔbɔkora Baruch no nkwa do. Dza ɔdze wie, etsir 46–51 yɛ nkɔnhyɛsɛm a otsia amanadze aman. Tsir 52 no yɛ abakɔsɛm no n’ewiei. Jeremiah no nkɔnhyɛ no bi wɔ Laban n’ayewa mprɛtse no a Nephi fae siee no do (1 Ne. 5:10–13). Wɔbɔɔ Jeremiah ne dzin so mpɛn ebien wɔ Mormon Nwoma no mu (1 Ne. 7:14; Hel. 8:20).
Jeremiah nwoma no mu so wɔakyerɛw biribi a ɔgye nyimpa n’asetsena ansaana wɔrobɔwo hɔn na Jeremiah ho husie ansaana wɔrobɔwo no no to mu (Jer. 1:4–5); Nkɔnhyɛ a ɔkyerɛ dɛ Israelmba a wɔapetse no bɛsan hɔn ekyir no, mebɛfa hom mu ɔbaako efi kuropɔn bi mu na beenu efi ebusua bi mu na medze hom aba Zion, asaase fɛɛfɛw, hɔ na Israel nye Judah botum abɔ mu atsena dwudwoodwo na asomdwee mu (Jer. 3:12–19); na Ewuradze no nkɔnhyɛ a ɔkyerɛ dɛ ɔbɔsoma “apofo” nye “abɔmbɔfo” pii ma wɔakɔ etsifi afamu nkurow do akɔhwehwɛ Israelmba aboaboa hɔn ano efi hɔ (Jer. 16:14–21). Dza obesi nda a odzi ekyir yi mu no bɛkyɛn ber a Moses yii Israelmba fii Egypt no (Jer. 16:13–15; 23:8).