Gyedzi

Inya awerɛhyɛmu wɔ biribi anaa obi mu. Dɛ mbrɛ mpɛn pii wɔkã wɔ kyerɛwsɛm mu no, gyedzi nye dɛ edze wo werɛ hyɛ Jesus Christ mu na etwer No ma ogya wo ma eyɛ setsie ma No. Otwar dɛ nyimpa dze ne gyedzi tsim Jesus Christ mu ama oegya no akɔ nkwagye mu. Nda a odzi Ekyir Ahotseweefo wɔ gyedzi wɔ Nyame Egya, Sunsum Krɔnkrɔn, na asɔfodzi tum no mu, na ndzɛmba binom a no ho hia wɔ asɛmpa a wɔdze asan aba no no ho.

Enyidado wɔ ndzɛmba a enyi nnhu, na mbom ɔyɛ nokwar kã gyedzi ho (Heb. 11:1; Alma 32:21; Ether 12:6). Gyedzi nya nkenyan ber a oenya nkyerɛkyerɛ efi nkorɔfo a Nyankopɔn asoma hɔn no nkyɛn (Rom. 10:14–17). Anwanwadze mma gyedzi, mbom hɛn gyedzi tum yɛ dzen ber a yɛyɛ setsie dze ma Jesus Christ n’asɛmpa no. Dza yɛbɛkã nye dɛ, gyedzi nam tseneneeyɛ do ba (Alma 32:40–43; Ether 12:4, 6, 12; N&A 63:9–12).

Nokwar gyedzi dze anwanwadze, enyido-adzehu, adaaso, ayarsa, na Nyame N’akyɛdze nyina a Ɔdze ma N’ahotseweefo ba. Ɔnam gyedzi do na obi nya bɔnfakyɛ na nkakrakakra otum tsena Nyame nkyɛn. Sɛ obi nnyi gyedzi a ɔpa abaw, a bɔn na ɔdze dɛm ba (Moro. 10:22).

Wo gyedzi agye wo, Matt. 9:22 (Mark 5:34; Luke 7:50).
Mbrɛ hom gyedzi tse no, ɔnyɛ dɛmara mma hom, Matt. 9:29.
Sɛ hom wɔ gyedzi a ɔtse dɛ sinape abafua a, nkyɛ biribiara ronnsõ hom yɛ, Matt. 17:20 (Luke 17:6).
Maserɛ ama wo, amma wo gyedzi ammpa, Luke 22:32.
Gyedzi a ɔwɔ Christ ne dzin mu na ɔama ɔbarimba yi noho ayɛ no dzen, Ndwu. 3:16.
Gyedzi nam Nyame n’asɛm ne tsie do ba, Rom. 10:17.
Sɛ Christ ennyan a nkyɛ hom gyedzi yɛ gyan, 1 Cor. 15:14.
Gyedzi nam ɔdɔ do yɛ edwuma, Gal. 5:6.
Adom na wɔdze nam gyedzi do agye hom nkwa, Eph. 2:8 (2 Ne. 25:23).
Hom nkura gyedzi akokyɛm no, Eph. 6:16 (N&A 27:17).
Mewie mbirika no tu, mesuo gyedzi no mu esie, 2 Tim. 4:7.
Gyedzi nye adze a hɛn enyi da do, Heb. 11:1.
Gyedzi nnyi mu a obi nntum nnsɔ n’enyi, Heb. 11:6.
Gyedzi, sɛ onnyi ndwuma a nna oewu, James 2:17–18, 22.

Mobɔkɔ akɛyɛ ndzɛmba a Ewuradze ahyɛ me no, 1 Ne. 3:7.
Ewuradze tum yɛ ndzɛmba nyina dze ma adasamba, sɛ wɔwɔ gyedzi wɔ no mu a, 1 Ne. 7:12.
Adze ntseatseaba a ɔwɔ Ɔkyerɛkwan no mu no nam gyedzi do yɛ edwuma, 1 Ne. 16:28.
Nu woho na wonnuma wo wɔ ne dzin mu, na nya gyedzi a odzi mu wɔ Krɔnkrɔnnyi no mu, 2 Ne. 9:23.
Christ nam adasamba hɔn gyedzi do yɛ etumdze akɛseakɛse wɔ hɔn mu, 2 Ne. 26:13 (Ether 12:12; Moro. 7:27–29, 34–38).
Wɔdze Enos no bɔn kyɛɛ no osian ne gyedzi a ɔwɔ Christ mu no ntsi, Enos 1:3–8.
Nkwagye mmba obiara do gyedɛ ɔnam gyedzi a ɔwɔ wɔ Ewuradze Jesus Christ mu no do, Mosiah 3:12.
Ɔnam gyedzi a ɔwɔ ne dzin mu no ma akoma nya nsakyer, Mosiah 5:7.
Ɔnam Nyame no nkowaa hɔn gyedzi do na wonya hɔn mpaabɔ ho mbuae, Mosiah 27:14.
Ma hɛn ahoɔdzen tse dɛ ma hɛn gyedzi a ɔwɔ Christ mu no tse, Alma 14:26.
Bɔ Nyame ne dzin wɔ gyedzi mu, Alma 22:16.
Nnyɛ gyedzi nye dɛ ewɔ nyimdzee wɔ ndzɛmba nyina ho, Alma 32:21 (Ether 12:6).
Sɛ ɔhyɛ ase dɛ ɔreyeyer a hom mfa hom gyedzi nkora do yie, Alma 33:23 (Alma 32:28).
Nyame no tum nwanwa no na ɔkoraa hɔn do osian hɔn gyedzi mbordo ntsi, Alma 57:25–27.
Dodowara a wɔdze gyedzi bɛma hɔn enyi do ahwɛ Nyame ne Ba no benya nkwa, Hel. 8:15.
Muhu dɛ hom wɔ gyedzi a osi pi a ɔwɔ dɛ mesa hom yarba, 3 Ne. 17:8.
Gyedzi nye adze a enyi da do na mbom hɛn enyi nnhuii, Ether 12:6.
Hɔn a wɔyɛɛ etumdze nyina nam gyedzi do yɛe, Ether 12:12–18.
Sɛ wonya gyedzi wɔ mo mu a, nna mebɛma ndzɛmba a ɔyɛ mberɛw ahyɛ dzen ama hɔn, Ether 12:27–28, 37.
Mormon kyerɛkyerɛɛ dza ɔfa gyedzi, enyidado, na ayamuyie ho, Moro. 7.
Biribiara a wobebisa Egya no wo me dzin mu, wɔ gyedzi mu, na oye, na hom gye dzi dɛ hom nsa bɛkã no, hwɛ, wɔbɛyɛ ama hom, Moro. 7:26.
Hɔn a wɔwɔ gyedzi wɔ Christ mu no bofuwa adze biara a oye, Moro. 7:28.
Sɛ hom bisa, na hom wɔ gyedzi wɔ Christ mu a, ɔbɛda nokwar no edzi, Moro. 10:4.

Gyedzi nnyi mu a hom nnkotum ayɛ hwee; dɛm ntsi hom mbisa wɔ gyedzi mu, N&A 8:10.
Ɔbɛyɛ hɔ ama hɔn dɛ mbrɛ hɔn gyedzi wɔ hɔn mpaabɔ mu no tse, N&A 10:47, 52.
Adasa nyinara wɔ dɛ wotsim wɔ gyedzi mu wɔ ne dzin mu dze kɔ ewiei, N&A 20:25, 29.
Wɔnam gyedzi mpaabɔ do dze Sunsum no bɛma wo, N&A 42:14.
Gyedzi nndua nsɛnkyerɛdze do ba, mbom nsɛnkyerɛdze dzi hɔn a wɔgye dzi no ekyir, N&A 63:9–12.
Awofo wɔ dɛ wɔkyerɛkyerɛ hɔn mba gyedzi wɔ Christ mu, N&A 68:25.
Hom mper nsũa nwoma na hom ndua adzesũa nye gyedzi mpo, N&A 88:118.