Mormon Nwoma

Kyerɛwsɛm nwoma anan a Jesus Christ N’Asɔr a ɔwɔ hɔ ma Nda a Odzi Ekyir Ahotseweefo gye to mu no mu kor. Ɔyɛ tsetseberdo nkorɔfo a wɔtsenaa America asaase do hɔn nkyerɛwee a, tsetse nkɔnhyɛnyi bi a wɔfrɛ no Mormon twitwaa do esinesin kyerɛwee. Wɔkyerɛwee dze agye dase dɛ Jesus nye Christ no. Dza Nkɔnhyɛnyi Joseph Smith a, ɔnam Nyankopɔn no tum akyɛdze do kyerɛɛ dɛm nkyerɛwee no ase kãe wɔ ho nye dɛ, “Mekãa kyerɛɛ enuanom no dɛ Mormon Nwoma no nye nwoma a odzi mu kɛse wɔ asaase do, na hɛn nyamesom no botantsim, na obiara a obedzi no mu nsɛm do no, ɔbɛbɛn Nyankopɔn kyɛn dɛ obedzi nwoma biara no mu nsɛm do” (hwɛ mbueinyi a odzi Mormon Nwoma no ne kan no).

Mormon Nwoma no yɛ nyamesom nkyerɛwee bi a ɔfa ekuw ebiasa bi a wofii Wiadze Dadaw no mu kɛtsenaa America asaase tɔw do no ho. Nkɔnhyɛfo a wodzidzii dɛm ekuw yi enyim no na wɔkyerɛɛw hɔn nyamesom na hɔnho abakɔsɛm guu ayewa mprɛtse do. Mormon Nwoma no mu nsɛm kyerɛ dɛ ber a Jesus Christ Soɛree fii ewufo mu no Ɔkɛseraa nkorɔfo a wɔwɔ America no. Christ Ne nserae ekyir no asomdwee baa asaase no do mfe ahaebien.

Moroni a ɔyɛ Nephi nkɔnhyɛnyi-abakɔsɛm kyerɛwfo a odzi ewiei no na ɔsɔɔw dɛm nkorɔfo yi hɔn kyerɛwsɛm a woetwitwa do esinesin no ano na ɔdze siee bɛyɛ afe 421 Wɔwoo Christ ekyir no. Afe 1823 mu no, Moroni a nna ɔasoɛr efi ewufo mu no bɛseraa Joseph Smith na ekyir no ɔdze dɛm tsetseberdo kyerɛwsɛm krɔnkrɔn no maa Joseph Smith dɛ ɔnkyerɛ ase na ɔmfa mbra wiadze dɛ ɔyɛ Jesus Christ n’ahyɛmu kor so.