Mbeamuduamubɔ

Kwan a Romefo fa do ku nyimpa, nna ɔtaa kɔ do wɔ Ahyɛmu Fofor aber do, wɔkyekyer nyimpa no anaadɛ wɔdze no sɛn mbeamudua do na wɔdze mprɛgow bobɔ ne nsa na n’anan mu dze kum no. Wɔtaa dze yɛ ndɔnkɔfo na ewudzifo neminemefo. Ansaana wɔbɔbɔ obi mbeamudua mu no wɔkã no mpire ana (Mark 15:15). Wɔtaa ma nyimpa a wɔrobɔbɔ no mbeamudua mu no soa nankasa ne mbeamudua no dze kɔ beebi a woboku no wɔ no (John 19:16–17). Ɔtaa dɛ nsordaafo no a worukoku no no yi noho ntar no fa (Matt. 27:35). Wɔdze mbeamudua no hyɛ famu ma nyimpa no n’anan sensɛn sor anamɔn kor anaa ebien ara. Nsordaafo weɔn mbeamudua no araa kodu dɛ nyimpa no a ɔsɛn do no bowu, ɔto mber bi a odzi ndaansa (John 19:31–37).

Wɔbɔɔ Jesus Christ mbeamudua mu osiandɛ ekyingyefokuw bi kãa atorsɛm too No do dɛ Ɔnye Caesar dzi esi na Ɔakã ebususɛm so osiandɛ Ɔkãa dɛ Ɔyɛ Nyankopɔn Ne Ba. Wɔdze atar memen (John 19:2) na nsoɛe kyɛw hyɛɛ No, na wɔyɛɛ Jesus ayakayakadze bi so (Matt. 26:67; Mark 14:65).