Hebrewfo, Nwoma a Wɔdze Kɛma

Nwoma a ɔwɔ Ahyɛmu Fofor no mu. Paul kyerɛɛw nwoma yi dze kɛmaa Jewfo Asɔrmba no dze maa wohun dɛ Moses mbra no ahyɛ mã wɔ Christ mu na dɛ Christ n’asɛmpa mbra a ɔkrɔn no abɛhyɛ n’anan mu. Ber a Paul sanee baa Jerusalem wɔ no somdwumadzi a otsĩa ebiasa ewiei no (bɛyɛ mfe 60 a Wɔwoo Christ no ekyir no), ohun dɛ Jewfo a wɔyɛ Asɔrmba no hɔn mu pii da ho dzi Moses mbra no do (Ndwu. 21:20). Iyi sii bɛyɛ mfe du a wɔyɛɛ Asɔr no ehyiadzi wɔ Jerusalem no ekyir, aber no nna woesi no pi dɛ ayɛdze binom wɔ Moses mbra no mu a onnhia mma amanamamfo Christianfo no hɔn nkwagye. Iyi ekyir no annkyɛr koraa na Paul kyerɛɛw nwoma dze kɛmaa Hebrewfo no dze rekyerɛ hɔnankasa hɔn kyerɛwsɛm no ne fã bi a onnyi dɛ wɔkɔ do dzi Moses mbra no do.

Etsir 1 nye 2 no kyerɛ mu dɛ Jesus sõ kyɛn abɔfo. Etsir 3–7 no dze Jesus to Moses nye Moses mbra no ho na ɔgye dase dɛ Ɔsõ kyɛn ebien no nyina. Wɔkyerɛkyerɛɛ so dɛ Melchizedek Asɔfodzi no sõ kyɛn Aaron dze no. Etsir 8–9 no kyerɛkyerɛ mbrɛ Moses n’ayɛdze no sii siesiee nkorɔfo dze maa Christ no somdwumadzi no na mbrɛ osi ma ɔyɛ ahyɛmudzi fofor no ne ntamugyinafo (Alma 37:38–45; N&A 84:21–24). Tsir 10 no yɛ nketsesi na nokwardzi ho nkuranhyɛsɛm. Tsir 11 yɛ gyedzi ho nkyerɛkyerɛ. Tsir 12 ma kɔkɔbɔ na nkyia. Tsir 13 kã mbrɛ awar no su tse na setsie no bo a ɔsom ho nsɛm.