Job

Ɔwɔ mu dɛ nwoma no fa Job n’amandzehu ho, eso onntum nnyi asɛmbisa no ano dɛ ebɛnadze ntsi na Job (anaa nyimpa bi) bohu amandze na ɔayew n’ebusua na n’ahodze dɛm. Nwoma no kyerɛ mu pefee dɛ sɛ nyimpa bi hu amandze a ɔnnkyerɛ dɛ dɛm nyimpa no ayɛ bɔn. Ewuradze botum dze amandzehu aba ama yeenya suahu, ahohyɛdo, na nkyerɛkyerɛ na ntsẽa so (N&A 122).

Wobotum akyekyɛ nwoma no mu anan. Etsir 1–2 yɛ nsɛm no ne nyienyim. Etsir 3–31 fa nkɔmbɔtwetwe ntoatoado bi a osii Job na n’anyɛnkofo baasa bi ntamu. Etsir 32–37 yɛ Elihu, nyɛnko a otsia anan no ne kasaa, ɔno na ɔkãa nsɛm fofor koraa bi a ɔnntse dɛ mbrɛ anyɛnkofo baasa no kãe no dze buu Job fɔ. Etsir 38–42 no wie nwoma no a ɔhyɛɛ Job nkuran dɛ n’abrabɔ ye fitsi ahyɛse no nyina.

Job nwoma no kyerɛkyerɛ dɛ sɛ nyimpa wɔ Nyame noho nokwar nyimdzee no na ɔrobɔ bra a ɔsɔ Nyame n’enyi a, obotum asɔw amandzehu a ɔba no do no yie. Job ne gyedzi a ammpa no kyerɛ dɛm kasa yi mu pefee dɛ “Hwɛ oruku me, mohwɛ ɔnoara” (Job 13:15). Wɔabɔ Job ne dzin wɔ Ezekiel 14:14; James 5:11 so; Nkyerɛkyerɛ na Ahyɛmudzi 121:10.