1 Ma sa oo ina fetalai mai le Alii ia Mose, ua fai mai: Faauta, Ou te faaali atu ia te oe e uiga i le lagi lenei, ma le lalolagi lenei; ia tusi upu o le a Ou tautala atu ai. O A’u o le Amataga ma le Gataaga, le Atua Malosi Aoao; o la’u Toatasi na Fanaua na Ou foafoa ai ia mea; ioe, na Ou foafoaina i le amataga le lagi, ma le lalolagi ua e tu ai.

2 Ma sa aunoa le lalolagi ma se faatulagaga, ma sa gaogao; ma sa Ou faia le pouliuli ia oo mai i luga o le moana; ma sa fegaoioiai lo’u Agaga i luga o le fogatai; aua o A’u o le Atua.

3 Ma o A’u, o le Atua, na Ou fai atu: Ia i ai le malamalama; ma sa i ai le malamalama.

4 Ma o A’u, o le Atua, sa vaai atu i le malamalama; ma ua lelei lena malamalama. Ma o A’u, o le Atua, na vavaeeseina le malamalama mai le pouliuli.

5 Ma o A’u, o le Atua, na ta’ua le malamalama o le Ao; ma o le pouliuli, sa Ou ta’ua o le Po; ma o lenei mea sa Ou faia i le upu a lo’u mana, ma sa faia lava e pei ona sa Ou fai atu ai; ma o le afiafi ma le taeao o le aso muamua lea.

6 Ma sa toe fai atu A’u, o le Atua: Ia i ai se vanimonimo i le lotolotoi o le vai, ma sa faapea ona fai, e pei lava ona Ou fai atu; ma sa Ou fai atu: Ia tuu atu e vavae ai vai mai vai; ma sa faia lava;

7 Ma o A’u, o le Atua, na faia le vanimonimo ma vaevaeina vai, ioe, vai tetele i lalo o le vanimonimo mai vai sa i luga o le vanimonimo, ma sa faapea lava e pei ona sa Ou fai atu ai.

8 Ma o A’u, le Atua, na ta’ua le vanimonimo o le Lagi; ma o le afiafi ma le taeao o le aso lua lea.

9 Ma o A’u, o le Atua, na Ou fai atu: Ia tuu atu i vai o i lalo ifo o le lagi ia faapotopoto faatasi i se mea e tasi, ma sa faapea lava; ma o A’u, o le Atua, na Ou fai atu: Ia i ai se laueleele matutu; ma sa faapea lava.

10 Ma o A’u, o le Atua, na Ou ta’ua le laueleele matutu o le Eleele; ma o le faapotopotoina faatasi o vai, na Ou ta’ua o le Sami; ma o A’u, o le Atua, sa Ou vaai atu o mea uma sa Ou faia ua lelei.

11 Ma o A’u, o le Atua, sa Ou fai atu: Ia tuu atu i le eleele ia faatutupu mai mutia, le laau afu ia fua mai i fatu, ma le laau ’aina ia fua mai i fua, e tusa ma lona ituaiga, ma le laau fua ia fua mai i fua, o ona fatu e tatau ona i ai ia te ia lava i luga o le eleele, ma sa faapea lava e pei ona sa Ou fai atu.

12 Ma sa aumai e le eleele le mutia, laau afu uma e fua i fatu e tusa ma lona ituaiga, ma le laau e fua mai i fua, o ona fatu ua i totonu o ia lava, e tusa ma lona ituaiga; ma o A’u, o le Atua, sa Ou vaai atu ua lelei mea uma ua Ou faia;

13 Ma o le afiafi ma le taeao o le aso tolu lea.

14 Ma o A’u, o le Atua, na Ou fai atu: Ia i ai ni malamalama i le vanimonimo o le lagi, e vavae ai le ao mai le po, ma ia tuu i latou e avea ma faailoga, ma mo tau, ma mo aso, ma mo tausaga;

15 Ma ia tuu i latou e avea ma malamalama i le vanimonimo o le lagi e tuu atu ai le malamalama i luga o le lalolagi; ma sa faapea lava.

16 Ma o A’u, o le Atua, na faia ni malamalama tetele e lua; o le malamalama tele e pulea le ao, ma le malamalama itiiti e pulea le po, ma o le malamalama tele o le la, ma o le malamalama itiiti o le masina; ma sa faia foi fetu e tusa lava ma la’u upu.

17 Ma o A’u, o le Atua, na tuua i laua i le vanimonimo o le lagi e tuu mai ai le malamalama i luga o le lalolagi,

18 Ma o le la e pule i le ao, ma le masina e pule i le po, ma vavae ai le malamalama mai le pouliuli; ma o A’u, o le Atua, na vaai atu ua lelei mea uma ua Ou faia;

19 Ma o le afiafi ma le taeao o le aso fa lea.

20 Ma o A’u, o le Atua, na faapea atu: Ia tuu atu i vai ia aumai ia matua tele meaola fegaoioiai ua i ai le ola, ma manufelelei e mafai ona felelei i luga a’e o le lalolagi i le vanimonimo taalaelae o le lagi.

21 Ma o A’u, o le Atua, na foafoaina tafola tetele, ma meaola uma e gaoioi, sa tele ona aumai e vai, e tusa ma o latou ituaiga, ma manufelelei faiapaau taitasi e tusa ma lona ituaiga; ma o A’u, o le Atua, sa Ou vaai atu ua lelei mea uma ua Ou foafoaina.

22 Ma o A’u, o le Atua, sa faamanuiaina i latou, ua fai atu: Ia uluola, ma faateleina, ma faatumu ai vai i le sami; ma ia tuu atu i manufelelei ia faateleina i le lalolagi;

23 Ma o le afiafi ma le taeao o le aso lima lea.

24 Ma o A’u, o le Atua, na fai atu: Ia tuu atu i le eleele e aumai meaola e tusa ma lona ituaiga, o manu faatoaga, ma mea fetolofi, ma manu vaefa o le lalolagi e tusa ma o latou ituaiga; ma sa faapea lava;

25 Ma o A’u, o le Atua, na faia manu vaefa o le lalolagi e tusa ma o latou ituaiga, ma manu faatoaga e tusa ma o latou ituaiga; ma mea fetolofi taitasi uma i luga o le lalolagi e tusa ma lona ituaiga; ma o A’u, o le Atua, na vaai atu ua lelei ia mea uma.

26 Ma o A’u, o le Atua, na faapea atu i la’u Toatasi na Fanaua, lea sa faatasi ma A’u mai le amataga: Inā ta faia ia o le tagata i lo ta’ua faatusa, e tusa ma o ta’ua foliga; ma sa faapea lava. Ma o A’u, o le Atua, na faapea atu: Ia tuu atu ia te i laua e pule i i’a o le sami, ma manufelelei o le ea, ma lafu manu, ma le lalolagi atoa, ma mea fetolofi uma e fetolofi i luga o le lalolagi.

27 Ma o A’u, o le Atua, na foafoaina le tagata i lo’u lava faatusa, o le faatusa o la’u Toatasi na Fanaua na Ou foafoaina ai o ia; o le tane ma le fafine na Ou foafoaina ai i laua.

28 Ma o A’u, o le Atua, na faamanuiaina i laua, ma faapea atu ia te i laua: Ia fanafanau, ma uluuluola, ma faatumuina le lalolagi, ma faato’a i ai, ma ia pule i i’a o le sami, ma manufelelei o le ea, ma meaola uma e fegaoioia’i i le lalolagi.

29 Ma o A’u, o le Atua, sa faapea atu i le tagata: Faauta, ua Ou tuu atu ia te oe laau afu uma e fua i fatu, ia ua i le lalolagi atoa, ma laau uma e i ai fua o laau e fua i fatu; ia avea ia ma meaai ia te oe.

30 Ma o manuvaefa uma o le lalolagi, ma manufelelei uma o le ea, ma mea uma e fetolofi i le lalolagi, ua Ou tuuina i ai le ola, o le a tuu atu i ai laau afu mama uma mo meaai; ma sa faapea lava, e pei ona sa Ou fai atu ai.

31 Ma o A’u, o le Atua, na vaai atu i mea uma na Ou faia, ma, faauta, o mea uma na Ou faia sa lelei tele lava; ma o le afiafi ma le taeao o le aso ono lea.