Kopwurupwurdohn Rongamwahu Unseko en Sises Krais
Kalohk Ehu en Ke-Riepwikihn Pahr ong Sampah
Kalohk wet wadawadda sang rehn President Russell M. Nelson ni eh wia kisehn sapwellime mahsen nan Kapokon Lap Ke-190, ni Epreil 5, 2020, nan Kahnihmw en Salt Lake, Utah.
Se kalohkihda ni wahu me Koht ketin poakohng Sapwellime seri kan nan wehi koaros en sampah. Koht Sahm ketkihong kitailehr kisakis en ipwidi, mour, oh tomw soutuk en Sapwellime Ieros, Sises Krais. Sang ni manaman en Sahmo, Sises ketin iasadahr oh powehdier mehla. Ih me wia atail Sounkomour, Mehn Kahlmengi, oh atail Soundoar.
Pahr riepwiki samwalahro, ni menseng kaselel ehu nan pahr 1820, Joseph Smith ni eh pwulopwulte, raparapahki en esehla mehnia mwomwohdiso me e pahn iang, ahpw kohla nan tuhkehko pwehn kapakap wasa me karanih nihmweo nan New York, USA. Mie ah iren kalelapak kan me pid duwen komour en pali ngene oh e likih me Koht pahn ketin kaweidi ih.
Ni wahu, se kalohkihda me pwehn sapengala ah kapakapo, Koht Sahm oh Sapwellime Ieroso, Sises Krais, ketin pwarehng Joseph Smith oh kasarawiala “weliakapwalahn mehkoaros” (Wiewia 3:21) nin duwen me Pwuhk Sarawi mahsaniher. Nan sansalo, e esehda me mwurin kamakamalahn tepin Wahnpoaron ko, Sapwellimen Krais Mwomwohdiso en Kedehde Kapwo sohralahr sang sampah. Joseph me pahn kahmwomwehda doadoahk en kopwurupwurdo wet.
Se kadehdehki me sang ni kaweid en Sahmo oh Iehroso, meninkeder kan en nanleng pekederdohr pwehn kaweid Joseph oh pwurehng kauwada Mwomwohdiso en Sises Krais. Sohn Sounpepdais me iasadahro kapwurehdo mweimwei en pepdais ni kaduhdi ong ni lapwapen dihp. Wahnpoaron silimen—Piter, Seims, oh Sohn—kapwurehdo pwukoahn wahnpoaron oh kih kan en mweimwei en prihsdud. Mehkei pil pwaredo me iangahki Elijah, me kapwurehdo mweimwei en katengepene peneinei kan kohkohlahte mwurin mehla.
Se pil kadehde me Joseph Smith alehdi kisakis oh manaman en Koht pwehn kawehwe poadoapoad en kawahu iei: Pwuhk en Mormon—Pilehu Kadehdepen Sises Krais. Tehn pwuhk en poadoapoad sarawi wet pil iangahki koasoaipen Sises Krais ah ketin kalohk rehn aramas en Pali kapi en sampah mwurin Sapwellime Iasadahu. Pwuhko padahngki kahrepen mour oh kawehwe padahk en Krais, me wia poahsoan en karepehu. Ni eh kin utung Pwuhk Sarawi, Pwuhk en Mormon kin kadehde me aramas koaros wia sapwellimen Sahm Nanleng me diren limpoak, me mie Sapwellime koasoandi ong atail mour, oh me Sapwellime Iehros, Sises Krais, kin wie mahmahsente rahn wet duwehte keilahn aio.
Se kalohkih me Mwomwohdiso en Sises Krais en Souleng en Imwin rahn-Akan, me kokouda ni Epreil 6,1830, iei Sapwellimen Krais Mwomwohdiso en Kadehde Kapw me kopwurupwurdohr. Mwomwohdiso wet poahsoanda pohn mour unsek en takain pwukokeimwo, Sises Krais, oh Sapwellime Tomw soutuko oh Iasadao. Sises Krais ketin pwurehng malipehier Wahnpoaron akan oh ketkihong irailehr mweimwei en prihsduhd. E ketin luke kitail en kohdo Reh oh Sapwellime Mwomwohdiso, pwehn ale Ngehn Sarawi, oh tiahk sarawi kan en komour, oh sohsohki popohl soutuk.
Met pahr riepwikiehr sang ansou me Koht Sahm oh Sapwellime Iehros, Sises Krais, tapiada Kopwurupwurdo wet. Aramas rar kei nan sampah wet alehier kamarain sang kokohp pwukat.
Se kalohkihda ni popohl me inoupen Kopwurupwurdohu doudoulahte mwowe sang ni popouslahn kaudiahl. Sampah wet sohte pahn duwduwehte, ansou me Koht pahn ketin “kapwurepene mehkoaros rehn Krais” (Episos 1:10).
Ni wahu oh kaping kalahngan, ni aht wia Sapwellime Wahnpoaron kei se luke koaruhsie en ese—duwehte kiht—me nanleng ritdahr. Se kahdehde me Koht kin ketin kaskasalehda Kupwure ong Sapwellime ohl akan oh lih akan. Se kadehde me irail akan me kin kapakapki oh onopiki padahk en Kopwurupwurdohu oh mwekidki ni pwoson pahn kapaikihda pein arail kadehde duwen eh sarawi oh kahrepe pwehn kaunopada sampah ong inou en Ketido Keriau en atail Kaun oh Sounkomour, Sises Krais.