Kubuyiselwa kweLivangeli leliPhelele laJesu Khristu

Siyamemetela ngesizotsa kutsi Nkulunkulu uyabatsandza bantfwana Bakhe kuto tonkhe tive temhlaba. Nkulunkulu Babe usinikete kutalwa kwasezulwini, imphilo lengafananiseki nalutfo, nemhlatjelo Wakhe lohlawulako longenakuphela weNdvodzana Yakhe letsandzekako, Jesu Khristu. Ngemandla aBabe, Jesu wavuka futsi wancoba kufa. UnguMsindzisi wetfu, uSibonelo setfu, neMhlengi wetfu.

Eminyakeni lengemakhulu lamabili lendlulile, ekuseni lokuhle kwentfwasahlobo yangemnyaka wa-1820, Joseph Smith asemncane, afuna kwati kutsi bekangaba lilunga laliphi libandla, waya ehlatsini kuyothandaza dvutane nelikubo esifundzeni saseNew York, lesisenyakatfo, eMelika. Bekanemibuto lemayelana nekusindziswa kwemphefumulo wakhe futsi beketsemba kutsi Nkulunkulu bekatomcondzisa.

Ngekutitfoba, simemetela kutsi kuphendvula umbuto wakhe, Nkulunkulu Babe neNdvodzana Yakhe, Jesu Khristu, bavela kuJoseph futsi bacala “kubuyiselwa kwetintfo tonkhe” (buka Imisebenti yebaPhostoli 3:21) njengoba kwakubikwe eBhayibhelini. Kulombono, wafundza kutsi emuva kwekufa kwebaPhostoli bekucala, Libandla laKhristu leLithestamente leLisha lalahleka emhlabeni. Joseph bekatawuba lusito ekubuyiselweni kwalo.

Siyacinisekisa kutsi ngekucondziswa nguBabe neNdvodzana, titfunywa tasezulwini teta kutomfundzisa Joseph nekutomisa kabusha libandla laJesu Khritsu. Johane uMbhabhatisi losavukile kulabafile wabuyisela ligunya lekubhabhatisa ngekucwiliswa kute kutsetselelwe tono. BaPhostoli labatsatfu kulabo bekucala—Petro, Jakobe, naJohane—babuyisela buphostoli netikhiya teligunya lebuphristi. Nalabanye bafika futsi, lokufaka ekhatsi Eliya, lowabuyisela ligunya lekuhlanganisa imindeni ndzawonye ingunaphakadze ebudlelwaneni baphakadze lobundlula kufa.

Siyachubeka nekufakaza kutsi Joseph Smith waniketwa sipho nemandla aNKulunkulu kutsi ahumushe umbhalo wasemandvulo: Incwadzi yaMormon—Lelinye liThestamente laJesu Khristu. Emakhasi alombhalo longcwele afaka ekhatsi umlandvo webufundisi baJesu Khristu lucobo phakatsi kwebantfu labebaseNkhabave lengaseNshonalanga masinyane emuva kwekuvuka kwakhe. Ifundzisa ngenhloso yemphilo futsi ichaza imfundziso yaKhristu, lekungiyo lebaluleke kakhulu kuleyo nhloso. Njengembhalo longcwele lohambisana neLibhayibheli, Incwadzi yaMormon ifakaza ngekutsi bonkhe bantfu bangemadvodzana nemadvodzakati aBabe loseZulwini lonelutsandzo, nekutsi unelisu lasezulwini ngetimphilo tetfu, nekutsi iNdvodzana Yakhe, Jesu Khristu, iyakhuluma namuhla njengase tinsukwini takudzala.

Siyamemetela kutsi Libandla laJesu Khristu Lalabangcwele Betinsuku Tekugcina, lelahlelwa nga-Mabasa 6, 1830, Libandla laKhristu leLithestamente leLisha lelibuyiselwe. Lelibandla litinte emphilweni yaJesu Khristu lenekulunga lokuphelele, lolitje lelisimise leLibandla, nakuNhlawulo Yakhe lengenakuphela nasekuVukeni kwakhe kwangempela. Jesu Khristu sewuphindze wabita baPhostoli waphindze wabanika ligunya lebuPhristi. Usimema sonkhe kutsi site Kuye naseBandleni Lakhe, kutsi sitfole uMoya loNgcwele, imisimeto yensindziso, siphindze sitfole injabulo lehlala ikhona.

Sekundlule iminyaka lengemakhulu lamabili nyalo seloku kuBuyiselwa kwacalwa nguNkulunkulu Babe nendvodzana Yakhe Letsandzekako, Jesu Khristu. Tigidzi emhlabeni wonkhe tilamukele lwati lwaleti tehlakalo lokwapholofethwa ngato.

Simemetela ngenjabulo kutsi kuBuyiselwa lokwakutsenjisiwe kuyachubeka ngesembulo lesichubekako. Umhlaba awuyoke uphindze ufane, ngoba Nkulunkulu “utohlanganisa ndzawonye kuKhristu konkhe” (Kubase-Efesu 1:10).

Ngenhlonipho nangekubonga, tsine njengebaPhostoli Bakhe simema bonkhe kutsi bati—njengoba natsi sati—kutsi emazulu avulekile. Siyacinisekisa kutsi Nkulunkulu watisa intsandvo Yakhe ngemadvodzana nangemadvodzakati Akhe latsandzekako. Siyafakaza kutsi labo labafundza umlayeto wekuBuyiselwa ngemthandazo futsi bente labakwentako ngelukholo batobusiswa ngekutfola bufakazi babo bekutsi loko kubuyiselwa kwaseZulwini nenhloso yako kulungiselela umhlaba kutsi ulungele Kuta kwesiBili kweNkhosi neMsindzisi wetfu, Jesu Khristu.