Mwanangaia Teniman Bwaeoniia n Taai Aikai
E maeka te tia korokaraki i Utah, USA.
Teniman kairake n ikawai a tibwaua aia karaki ngke a kaina te Ekaretia ao ni katea aia bwaibwai n te onimaki ibukiia ao aia utu.
Ngke I mwakuri ni mitinare i Melbourne, Australia, I mena n te uoote are e kainaki irouia ataein te reirei mai itinaniku. Ngke a reirei taekaia bwaeoniia n te Reirei n Tabati, I aki koaua bwa e na kanga aroia ni kan ongora—a kuri ni bane n tibwa rairaki, ao akea mai ibuakoia ae iai ana bakatibu ae rinanon rereuan Amerika Meang.
Ma te kamimi, a mwaiti ataein te reirei mai itinaniku aika a rangin ni korakora nanoia man karaki aika tibwauaaki. Temanna mai ibuakoia a taekina aron reitakiia ma Aika Itiaki n taai ake rimoa n oin maiuia: kanga aroia bwaeoniia, ataein te reirei mai itinaniku aikai a tibwa rairaki ao a tia ni karaoi anganano ni katea te Ekaretia n te aono are a maeka iai. Ibukiia tabeman membwa aikai, te Ekaretia e uarereke ke bon akea n abaia. Bon bwaeoniia n taai aikai, ni moana katean aia bwaibwai n te aro ae boou ibukiia rooro ake imwiina.
Aikai teniua taneiai mairouia aika rairaki ake a tia n riki bwa bwaeoniia n taai aikai.
Karineakin Au Utu ni Kawai Aika Boou
Nami Chan, Taoyuan, Taiwan
Au utu ao a mwaiti kaain au reita n utu i Taiwan bon i Buddhist. Ngke I kairake, I uringnga ngke I ibuobuoki ni katauraoa te toa ibukiia ara bakatibu ao atua aika mwaiti n tain te Ririki ae Boou i Tiaina ao boong ni motirawa riki ake tabeua. Bon te katei n te utu ibukira, n raonaki ma te kawai ni bukamaruia ara bakatibu ao ni uota te rau ao te tekeraoi nakoia au utu.
Ngke tabeman kain au utu a kaina te aro ae tiaki te Kiritian, akea mwiina iaon au utu n te moan tai. Ma n tain kauringakin aia bakatibu ae Ching Ming, ngkana ko taromauria am bakatibu ao ni kabueki karea aika boiarara n ruanimateia, au koraki ni Kiritian a rawa n iria. A taekinna bwa a kabaeaki bwa ana karinei Tuua ake Tebwina, riki “Ko na tai Atuana te Atua temanna irarikiu” (Te Otinako 20:3). A tuai au utu ni maroroakin koaua riki tabeua imwaina, ma man te bong anne ni karokoa ngkai, Kiritian a tei ibukin kamaunakin katei man aia taratara au utu ao n iangoaki bwa te bwai ae buakaka.
Ngke I rin n te iuniwetiri, I kaitibo ma mitinaren te LDS n te kawai. Ni bon arona, e na bon akea nanou n te bwai ae ana taekinna, ma tabeua taneiai ea tia ni katauraoa nanou ni butimwaai aia rongorongo. Ngke I kaitibo mangaia, I kariaia bwa n na tataro ao ni wareka ana Boki Moomon, ao ni moana karikirakean au kakoaua n te bwai ae I a ria n reireinaki iai. Ma, ibukin aia namakin au karo ni kaitara te aro ni Kiritian, I aki tangiria n tuangiia bwa n na bwabetitoaki. Imwiin namwakaina aika bati n au moan ni kaitibo ma mitinare, I a tuangiia au karo bwa I tangiria ni bwabetitoaki ao I tangiria ni karaoa te mwakuri ni mitinare. A rangin ni un, ma I ataia bwa I karaoa te rinerine ae eti.
Akea au bakatibu aika bwaeoniia, ma I namakinna bwa I ataa kakawakin aia ibuobuoki. E kaangaanga bwa ko na katikui tabeua katei ao taneiai n te kakaitara mairouia kaain te utu. Riki ngkai, ai nimaua te ririki imwiin ae I kaina te Ekaretia, n te tai are I a tia ni karaoa te mwakuri ni mitinare, au utu aki bane ni boutoka au iango, ma a tia ni kariaia. E a tia kainakin te Ekaretia ni kariaia bwa n na karineia au utu ni kawai aika boou, man karaoakin rongorongon te utu ao ni ukoukoriia au bakatibu. Au kakoaua iroun Iesu Kristo ao Ana Mwakuri ni Kamaiu e buokai ni katoki itabarara ma au utu.
Kakaean te Kimwareirei man te Euangkerio
Harry Guan, Utah, USA
I ikawai rake i Tiaina ao n taku inanou bwa ngai te Kiritian, n aki tabe ma te koaua are I tuai man iriira te taromauri. I rangin n tangira te Atua ao Iesu Kristo, ao I taku n au iango bwa aia reirei Kiritian a rangin ni kamwengaraoi.
Ngke I mwaing nakon te United States ni kaea te kaoreti, I moanna n iriira te aro ae tiaki te Kiritian. Imwiin tabeua namwakaina, I ongo taekan Ana Ekaretia Iesu Kristo ibukiia Aika Itiaki ni Boong Aika Kaitira mairouia raoraou tabeman ake a iangoa riniia n te Brigham Young Iuniwetiri. I titirakiniia tabeman ataein te reirei n te aro ae te Kiritian ibukiia Aika Itiaki ni Boong Aika Kaitira ao I rangin ni kubanako ngke a kauringai ma te matoatoa bwa n na kararoaai mairouia kaain te “Moomon.” I ongo nakon aia taeka n te moan tai, ma ngke I tarataraa inanon bwaai n ongora tao teuana te wiiki imwiina, I kunea te marooro mairoun Unimwaane Jeffrey R. Holland man te Kooram n Abotoro n te Tengaun ma Uoman. Inanon te marooro, e taekinna bwa a riai kain te Ekaretia n rangin ni karinerine nakoia aaro ake tabeua (taraa “Faith, Family, and Religious Freedom,” lds.org/prophets-and-apostles). Ngke I kakauongo nakon Unimwaane Holland, I namakinna n aron ae I ataia ngkai bwa te Tamnei ao n iangoia bwa n na reiakina riki taekan te Ekaretia.
I iangoia bwa n na nakon te taromauri ao imwiina n na kaitibo ma mitinare. I rangin n rotaki n aia reirei, riki iaon te babaire ni kamaiu. Aki rangin ni kukurei au karo ngke I baireia bwa n na bwabetitoaki, ma a kariaia bwa I a ikawai ni karaoi oin au babaire. Ngke a kawarai ana karo kainabau i Amerika tabeua te namwakaina imwiina, I a kona n reireiniia taekan te euangkerio. A tauraoi ni bwabetitoaki ngaia ake uoman.
E a tia te euangkerio ni uota te kimwareirei ae bati nakoiu ao e a tia ni uotai nakon kakaean te aine ae n na waekoa ni mareaki mangaia. E materaoi karaoan ke karaoana n taai aika ana roko te anga karea.
Katauraoan te Kawai ibukiia Rooro Ake Imwiina
Brooke Kinikini, Hawaii, USA
I kaina te Ekaretia ngke 15 au ririki, ma I a tia n nanakon te taromauri ao ni karikiraea au onimaki ao au kakoaua ma ngke I uarereke. E ngae ngke ti ngai te membwa n au utu, raoraou aika onimaki a tangirai ao a kairai n aia katooto.
N aki ti tebo ma bwaeoniia ake rimoa, I aki kona n nakonako n ikakorakora ma te aenika rinanon te tawaana ae kamariri. Ni koauana, I aki rinanon kaangaanga aika mwaiti ngke I kaina te Ekaretia. E koaua bwa akea raoraou tabeman ngaia ae I a nakon te taromauri n tingai ao n nakon te tieminari n tingai. Ma ngke I iangoa mwiina ae a tia n riki ao n reitinako ni karekea n au utu, I ataia bwa bon teuana te kabanea n raoiroi ni babaire ae I a tia ni karaoia. Au babaire bwa n na bwabetitoaki, n na kabaeaki n te tembora, ao n na teimatoa ni kakaonimaki nakon au berita aika tabu e a tia ni karika te tiein ni katei aika reitinako are e na iai mwiina ae tamaroa nakoia teniman natiu aika tikiraoi, n ikotaki ma rooro ake imwiina, n aki toki.
Te riki ni bwaeoniia bon taekan katauraoan te kawai ibukiia tabeman. I tangiria n iangoia bwa teuana mai ibuakon au kakabwaia aika mwaiti aika I a tia ni karekei ibukina bwa ngai te membwa ae i kakaonimaki n te Ekaretia bwa I kona ni buokiia tabeman n nakon Kristo. E taraa n ae te bwai ae uarereke—n aron bwabetitoakin te ataeinnaine ae 15-ana ririki i Maui, Hawaii, ke ana tataro n nanorinano te ataeinimwaane ae 14-ana ririki ni maiu inanon te buakonikai—e kona ni bita maiuia utu n taai ake rimoa, ngkai, ao ae na roko.
Araia bwaeoniia n taai aikai e aki ti katukaki ibukiia aika rairaki. Ngkana ti ukoukoria ni katea te bwaibwai ae akea tokina n te kakaonimaki ibukiia rooro ake imwiina, ti kona ni bane n riki bwa bwaeoniia.