E 4 haʼapiʼiraʼa nō roto mai i tō Iosepha Semita faʼahaereraʼa mai i te Buka a Moromona
E 24 noa tōna matahiti, ʼua faʼaruru Iosepha Semita i te mau tāmataraʼa ʼa haʼa ai ʼoia nō te rave faʼaoti i te mau faʼaueraʼa a te Atua. ʼUa upoʼotiʼa rā ʼoia nā roto i te tauturu a te Atua, ʼe e nehenehe atoʼa tātou.
ʼEi feiā ʼāpī paʼari, e anihia paha ia tātou ʼia rave i te mau ’ohipa e au ra eʼita e maraʼa ma te tauturu ʼore a te Atua. ʼOia atoʼa, o Iosepha Semita, e 24 noa tōna matahiti, ’ua fa’aruru i te mau tāmataraʼa ʼe ’ua mana’o e ʼaita i maraʼa iāna ʼa ’imi ai ʼoia i te faʼaoti i te hōʼē faʼaueraʼa faufaʼa rahi--te neneʼiraʼa i te ʼīritiraʼa o te Buka a Moromona. Nā roto rā i te tauturu a te Atua, ʼua rave faʼaoti ʼoia i te ’ohipa tei anihia iāna, ʼe tē faʼaʼite mai nei tōna hi’ora’a i te mau rāveʼa e rave rahi e nehenehe ai ia tātou ʼia rave i te mau ’ohipa atoʼa eʼita e maraʼa ʼia tiʼa anaʼe te Atua i tō tātou pae.
-
ʼAita i tītauhia ia tātou ʼia riro ʼei mea faʼahiahia, ’ia faʼatupu te Atua i te mau semeio nā roto atu ia tātou. ’A faʼaineine ai Iosepha i te neneʼi i te Buka a Moromona, e feiā ʼāpī paʼari ʼoia ’aita i rahi te moni ʼaore rā e haʼapiʼiraʼa mau—e ʼaita roa hō’ē ʼite e nāhea i te ʼīriti ʼe i te neneʼi i te hō’ē buka faufaʼa rahi. Tera rā, ʼua haere ʼoia i mua ma te faʼaroʼo ʼe te hōroʼāra’a ʼe te mana o te Atua nō te faʼaoti i te ʼohipa tei anihia iāna. Mai te mea e tiʼaturi tātou i te Metua i te Ao ra, e nehenehe tāna e hōroʼa mai i te pūai ia tātou nō te rave i tāna ʼohipa.
-
ʼIa hōroʼa anaʼe te Atua ia tātou i te hōʼē ʼohipa, e hōroʼa ’oia i te hōʼē rāveʼa ’ia manuia. Nō Iosepha, e au ra ʼua riro te neneʼiraʼa e 5.000 buka nō te hōʼē buka e 590 ʼapi ’ei hōʼē ʼohipa e ʼore roa atu e maraʼa ʼia rave. ’Area rā, ’ia tae i te taime nō te neneʼiraʼa i te buka tei pāpaʼi-rima-hia, ʼua faʼauru te Fatu ia Martin Harris ʼia piri hīpotate i tāna faʼaʼapu ruperupe, nā roto i te hōroʼaraʼa e 3 000 tara marite (fātata e 76 000 tara marite i teie mahana) nō te tauturu ia Iosepha ʼia faʼaoti i tāna misiōni. Mai tā Nephi i haʼapiʼi, « e faʼaʼineine [te Fatu] i te hōʼē rāveʼa nō rātou e ti’a ai ia rātou i te rave i te mea tāna i faʼaue mai ia rātou ra » (1 Nephi 3:7). ʼUa tuʼu atu te Metua i te Ao ra i te mau rāveʼa hinaʼarohia ’ia noaʼa ia Iosepha ’ia faʼaoti i te ʼōpuaraʼa. ’E e nā reira atoʼa ’oia nō tātou.
-
E hōroʼa te Atua e piti fāna’oraʼa. ʼUa rave Iosepha Semita i te mau hape tei arataʼi nō te moʼeraʼa o nā 116 ʼapi pāpaʼi-rima-hia o te Buka a Moromona. Nō te moʼeraʼa o nā 116 ʼapi, ʼua ʼere atoʼa Iosepha i te ʼaravihi ’ia ʼīriti nō te hōʼē tau. Nō te mea rā ʼua tātarahapa ʼoia, ʼua faʼaʼorehia tāna hapa i te hopeʼa ʼe ʼua hōroʼahia te fāna’ora’a piti nō te faʼaoti i tāna misiōni. ʼUa parau te Fatu, « ʼA haʼamana’o rā ē, e aroha tō te Atua ; nō reira, ’a tātarahapa i tā ʼoe ʼohipa au ʼore i te faʼaueraʼa tā’u i hōro’a atu ia ʼoe na, ʼe ʼua vai ā tō ʼoe māʼitiraʼa i reira, ʼe ʼua parau-faʼahou-hia hoʼi i te ʼohipa » (PH&PF 3:10). E ’ī tō tātou oraraʼa i te mau hape i roto i teie oraraʼa, ʼia tātarahapa anaʼe rā tātou ʼe ʼia vai tō tātou mau ʼāʼau i niʼa i te vairaʼa tiʼa, e hōroʼa mai te Fatu ia tātou i te tahi atu fāna’ora’a.
-
E nehenehe te hiʼoraʼa atu i te ʼoaʼoa tei fafauhia mai e tauturu ia tātou ’ia haere atu nā roto i te mau tāmataraʼa. Noa atu te mau tāmataraʼa atoʼa tā Iosepha i faʼaruru atu, ʼua fāriʼi ʼoia e rave rahi mau haʼamaitaʼiraʼa ʼe ʼua ʼite ʼoia i te ʼoaʼoa mau nā roto i teie ʼohipa te faʼahaereraʼa mai i te Buka a Moromona. I muri aʼe i te neneʼiraʼahia te Buka a Moromona, ʼua faʼatiʼahia te ʼĒkālesia, ʼe ʼua bāpetizohia te mau metua o Iosepha. I taua mahana ra, ʼua haere tiʼa atu Iosepha ʼoia anaʼe ra i roto i te uru rāʼau ʼe ʼua haʼamata i te heva nō te ’oa’oa. Mai te mea e tāmau noa tātou i te haere nā roto i tō tātou mau tāmataraʼa ma tō tātou upo’o i niʼa, te tiʼaturiraʼa hope roa i te Atua, e nehenehe atoʼa tātou e ʼite i te ʼoaʼoa ʼe te hau.