Na iNaki ni Lomada meda Bulataka na Kosipeli
Ena dau tu ga na “vosa dredre.” Ia sa na tiko na galala me digitaki na vakabauta me uabaleta na vakatitiqa se veilecayaki.
Sa vakasinaiti tu na salatu ni bula vakatisaipeli ena veivakalougatataki—na kena “e laurai kei na kena e sega.”1 Ia ena so na gauna e yaco ena salatu o ya, se cava ga na kena kalougata, me ka dredre se sega ni veirauti. Ni sa yaco meda sa tisaipeli i Jisu Karisito ena gadrevi na cakacaka kei na solibula, ka so na gauna ena dredre meda kunea na inaki ni lomada meda bulataka na ivakaro ka solibula yani.
Ni ko itabagone qase cake, o sa rairai osooso mo tuva vinaka na ilesilesi vou, vakatulewa me veisau na bula, ka vakasamataka me na laki rairai vakacava na nomu salatu ni tisaipeli ena vo ni nomu bula taucoko. Me kena ikuri, ena tiko beka eso na lawa se itukutuku makawa se vunau ni kosipeli ena Lotu o sega ni kila vinaka kei na veitemaki o sotava tiko, kei na kalougata o sa waraka tiko kei na taro baleta na ituvatuva ni Kalou vei iko.
Eso vei keda era dau vakasamataka tu ke sa veirauti beka na kalougata sa yalataki tu ni da bulataka na kosipeli. Eda dau kaya ni da sega ni wili kina, ni sa rui cakacaka levu, se na taro e vaka me uabaleta tu na kena isau. Ia sa kena itinitini ga ni sa inaki ga ni lomada. Cava na vuna o cakava tiko kina na ka o cakava tiko ka bula tiko ena ka o cakava? Cava na vuna o muria tikoga kina na ivakaro, ena gauna mada ga ni sega e dua me raica ni ko cakava?
Se cava na nomu bula se ituvaki cava o tiko kina, na digidigi mo kunea na inaki ni lomamu ena nomu teivaka nomu vakabauta na iVakabula kei na Nona kosipeli sa na vakatau ga vei iko.
Keitou na Lako Vei Cei?
Na kunei kei na maroroi ni inaki ni lomada meda bulataka na kosipeli sa sega tale ni ibolebole e duatani ena gauna oqo. Ena gauna mada ga ni a tiko na iVakabula e vuravura, a dredre vei ira na tamata mera kila vinaka ka talairawarawa ki na ivakavuvuli a vakavulica. E vica na Nona tisaipeli a vakarorogo tiko ni a vakamacalataka tiko e dua na vakasama e vaka me ratou a rarawataka—ni o Koya na “madrai ni bula” (raica na Joni 6:35–58). E vaka me ratou a vakatitiqataka, ka kaya, “A vosa dredre oqo; ko cei sa vakabauta rawa?” (Joni 6:60).
Ni sa raica na Karisito, ni sa dredre me ratou vakabauta se ciqoma na vunau oqo, a taroga, “Sa vakatarabetaki kemudou na ka oqo, ne?” (Joni 6:61) Ni ratou a sega ni vakaliuca na nodratou vakabauta mai na vakatitiqa, e vuqa na Nona tisaipeli era sa “suka tani kina, a ra sa sega tale ni lako vata kaya” (Joni 6:66).
Ia ni sa taroga na Karisito ki na vo ni tisaipeli de ra sa na “lako tani” talega, sa sauma kina o Pita na kena isau dina ga: “Keitou na lako vei cei? sa tu ga vei kemuni na vosa ni bula tawamudu” (Joni 6:67–68).
Na iVurevure ni iNaki ni Lomada
Sa kila tu o Pita na ivurevure ni inaki ni lomana. Sa baleta ga na usutu ni vu ni noda cakava na veika ena kosipeli: na noda ivakadinadina kei na vakabauti Jisu Karisito. “Ia keitou sa vakabauta ka kila,” a kaya o Pita, “ni sai kemuni na Karisito, na Luve ni Kalou bula” (Joni 6:69; vakamatatataki). Ni da rawata na ivakadinadina qaqa vaka o ya baleti Jisu Karisito, ni sa vakalou, kei na Nona cakacaka, sa rawa me inaki ni lomada na bulataka na kosipeli—ena gauna mada ga ni dau dredre, ena gauna mada ga ni sega e dua me raici keda, kei na gauna eda sega ni vakadeitaki keda rawa kina.
Ena dau tu ga na “vosa dredre.” Ia sa na tiko na galala me digitaki na vakabauta me uabaleta na vakatitiqa se veilecayaki. Me vaka a kaya o Elder L. Whitney Clayton ena Vitusagavulu, “Na nomu vakatulewa mo vakabauta sa digidigi bibi duadua o na bau cakava.”2
Na cava meda qai cakava keda sa dua vei ira ena yasana kadua era kaya ni “vosa dredre”?
1. Muria na ivakaraitaki nei Pita kei ira na vo ni tisaipeli era yalodina tu ga ena gauna mada ga ni a rawarawa sara mera “lako tani.” Rogoca na nodra ivakasala na parofita, iapositolo, kei na iliuliu eso:
“Ena veigauna ni rere se vakatitiqa se veigauna dredre, taura matua tiko na yavu o sa qaqa tiko kina. … Taura matua na veika o sa kila rawa tu ka kaukauwa tiko me yacova ni ra yaco mai na ikuri ni kila-ka.”3
“Sa rawa vua me cavuta e dua na ikalawa rawarawa ki liu ena vakabauta—oti qai dua tale. … Sa rawa ni vakanamata ki na dina [o] vakabauta ka laiva me vakasinaita na [nomu] vakasama kei na yalomu. …
“… Vakatekivu ena dina taumada ni kosipeli.”4
2. Tiko volekata na ivolanikalou ka muria na kedra ivakavuvuli:
“Vulica ena yalomasumasu ka vakananuma vakatitobu e veisiga na iVola i Momani.”5
“Kevaka e dua na tamata sa via cakava na lomai koya, ena kila se sa ka mai vua na Kalou nai ivakavuvuli, seu vosa vakaiau ga” (Joni 7:17).
“Ia Dou Muria na Vosa, ka Kakua ni Rogoca Walega” (Jemesa 1:22).
3. Tomana tikoga na muria na vunau.
“Ena yaco mai na isau ni noda vakatataro dina ni da vakasaqara vagumatua ka da bulataka tiko na ivunau. … E rawa ni sivia yani na iyalayala ni ivakamacala kecega ena gauna oqo na noda vakabauta.”6
“Ni ko vakuria na talairawarawa, … ena qai soli vei iko na kila ka kei na kila macala ko qara.”7
Ena kena itinitini, na inaki ni lomada sa baleta ga e dua na ka o ya ena ka a kaya o Pita. Eda vakabauta li ni o Jisu na Karisito, ni sa cicivaka tiko o Koya na Nona Lotu ka sa tu Vua na vosa ni bula tawamudu? Sa yaco beka na noda vakabauta me uasivia yani na “vosa dredre” eda sega beka ni kila vinaka ena gauna oqo?
Na iSau ni Bulataka Tiko na Kosipeli
Ena gauna sa lomada kina meda lomana ka muria na Kalou kei Jisu Karisito ka maroroya na vunau ena gauna mada ga ni da sega tu ni kila vinaka kina, na kena isau sa sega ni taqei rawa. E taroga kina o koya sa vakavuravura, “A cava ena kauta maivei au?” E sauma kina na ivakavuvuli ni kosipeli: “Na vakacegu ena vuravura oqo, kei na bula tawamudu ena vuravura sa bera mai”; na vanua sa vakarautaki me nomu ena itikotiko vakatui ni Kalou; kei na veika kece sa nona na Tamada Vakalomalagi; na “marau tawayalani” (raica na V&V 59:23; Ica 12:34; V&V 84:38; Mosaia 2:41); me vaka a kaya o Elder Dieter F. Uchtdorf ena Kuoramu ni iApositolo Le Tinikarua: “Ni eke [ena Lotu] o na kunea kina na ka sa vakasakiti ka tawavoli rawa. … Ni eke [ena Lotu] o na kunea kina na vosa eso ni bula tawamudu, na yalayala veivakalougatataki ni veivueti, kei na salatu ki na vakacegu kei na marau.”8 Me tukuni mada e vica.
Ni da solia noda dina meda muria na Karisito ka talairawarawa ki na Nona ivakaro, sa yalataki kina vei keda na ka kece oqo ka vuqa tale. E sega ni kena ibalebale ni na rawarawa se kilai vinaka na salatu, ia na veivakalougatataki sa yalataki tu ni da dei tiko ena yaco tikoga ni na cereki tikoga na veika ena noda bula taucoko oqo ka tarava mai.
Ia, me vaka ni ra sa totoka me vaka na veikalougatataki oqo, e sega ni dodonu me inaki ni lomada taumada ni kena bulataki na kosipeli. Se cava sara na nomu vakatataro, se vunau ko sega tu ni kila vinaka, na nomu vakabauti Jisu Karisito kei na Nona Veisorovaki sa idola ki na inaki ni lomamu mo bulataka na Nona kosipeli, me vaka ga vei Pita kei na so tale.
“Na noda inaki kei na noda vakanananu ena laki vakauqeta na noda ivalavala,” e kaya o Elder Uchtdorf. “Na ivakadinadina ni kena dina na kosipeli vakalesui mai i Jisu Karisito sai koya na kaukauwa veivakauqeti uasivi duadua ena noda bula. Sa dau vakabibitaka vakavuqa ko Jisu na kaukauwa ni vakanananu vinaka kei na inaki vinaka: ‘Drau vakararavi tiko mai vei au ena vakasama kece; kakua ni vakatitiqa, ka kakua ni rere’ (V&V 6:36).
“Na ivakadinadina kei Jisu Karisito kei na kosipeli vakalesui mai ena vukei keda ena noda bula, meda vulica na nona ituvatuva na Kalou me baleti keda ka cakacakataka. E vakadeitaka vei keda ni bula dina tiko, dina, kei na vinaka ni Kalou, na ivakavuvuli ni Veisorovaki i Jisu Karisito, kei na nodra ilesilesi vakalou na parofita ni gauna oqo.”9
Vei au, au na sasaga tikoga, ena gauna mada ga ni dredre. Au na masu tikoga ka vulica na noqu ivolanikalou. Au na saga tikoga meu vaqaqacotaka na noqu ivakadinadina ena veisiga baleta na iVakabula. Kau na saga tikoga meu bula voli me vaka sa vinakata o Koya ka vakararavi ga ki na Nona vosa kei ira na Nona parofita kei na iapositolo bula mera vakavulica vei au na kena sala, ka vakararavi tiko ki na inaki ni lomaqu e sega walega ni vua ni noqu vakabauta ka lomani Koya ia sa lako talega mai na Nona solibula kei na loloma tawamudu baleti au.