Ol Fas Step blong Kam blong Sakem Sin
Hem we i raet i stap long Ouest, Haiti.
Mi filim se tudak i kam kavremap laef blong mi. Mo afta, mi luksave se mi nidim blong toktok long bisop blong mi.
Droing i kam long Joshua Dennis
Mi tingbaot se mi toktok wetem ol misinari mo putum deit blong baptaes blong mi. Oli bin askem mi sapos mi rere blong mekem kavenan ia wetem Papa blong yumi long Heven. Mi no tingting long hemia, mo wetem wan hat we i fulap long glad, mi talem: “!Yes!” Mi bin wantem blong akseptem spesel presen ia we Papa blong mi we i gat lav i bin givim long mi, mo mi bin save se bae mi no save hapi sapos i no gat Sevya insaed long laef blong mi. Be hem i no save stret se wanem nao i stap blong mi long fiuja.
Long en, bigfala dei i kam. Mi no save fogetem mo mi bin hapi tumas.
Ol Dei blong Tudak
Afta long baptaes mo konfemesen blong mi, wantaem nomo, i olsem se taem blong tudak i kam. Mi stap gat problem wetem famli, mo mi faenem i had blong obei long evri loa blong God. Mi no bin save wanem blong mekem, mo mi bin wantem blong givap long evri samting. I olsem se i no gat wan i andastanem mi.
Oltaem nomo mi bin lavem blong ridim Buk blong Momon, be long taem ia, mi lego buk i stap long saed. Wan dei, mi stap miwan long haos, mo mi filim swit blong Spirit i toktok long mi, i talem blong ridim Buk blong Momon. Bifo mi rid, mi prea, mi bin wantem blong faenem wan ansa we i save mekem harem nogud blong mi i go daon. Mi openem stret long Alma, japta 5. Ves 27 i rid i go olsem: ?Yufala i bin stap wokbaot long wol ia, we laef blong yufala i no gat rong long fored blong God? Yu save talem, insaed long yufala bakegen, ?sapos God i singaotem yufala naoia blong ded, se tingting blong yufala i bin stap daon inaf? ?Ol klos blong yufala oli klin, mo oli kam waet tru long blad blong Kraes ia, we bae hem i kam blong pemaot ol pipol blong hem, aot long ol sin blong olgeta?
Nao, ol toktok ia oli kam oli tajem hat blong mi. Mi bin save se mi nidim blong sakem sin, mekem se mi putum wan apoenmen blong luk bisop blong mi. Mi mi bin fraet tumas, be mi fosem mi blong go mo toktok wetem hem.
Stap Andastanem Promes blong God
Taem mi kasem ofis blong bisop, mi filim gilti tumas, we mi wantem tanem raon nomo i gobak. Be mi prea blong gat strong paoa long tingting blong talem evri samting we mi bin nidim blong talem. Bisop i welkamem mi insaed long ofis blong hem, mo afta, hem i talem wan prea blong kasem help blong God. Hem i toktok long mi olsem se mi mi boe blong hem, mo i soem lav blong hem long mi tru long ol toktok blong hem. Hem i givim sam advaes long mi, mo hem i bin askem mi blong mekem samfala samting blong save kasem fogivnes blong God, mo afta, blong gobak luk hem bakegen.
Mi bin glad tumas from janis ia. Mi bin folem advaes blong hem, mo long en, mi kam blong andastanem promes blong God long saed blong fogivnes, we hem i bin givim long Alma: “Sapos hem i talemaot ol sin blong hem long fored blong yu mo mi, mo i sakem sin wetem tru hat blong hem, hem bae yu fogivim, mo bae mi mi fogivim hem tu” (Mosaea 26:29). Afta we mi bin sakem sin tru, mi bin save se God i bin fogivim mi. Long en, mi bin save filim lav blong Papa long Heven insaed long hat blong mi, mo tudak ia i kamaot. Mi bin hapi mo mi bin glad long miwan.
Bisop I Stap blong Save Help
Bisop i man we i ripresentem Lod insaed long wod. Yu mas save se hem i stap ia blong helpem yu blong faenem tru hapines ia we God i putum i stap blong yu. Trastem hem. Sapos yu gat ol problem, o sapos yu nid blong sakem sin, go mo faenem hem. Bambae hem i helpem yu.
Mi save se, samtaem, hem i no wan isi samting blong go luk hem. Be, olsem we Presiden Lorenzo Snow (1814–1901) i bin eksplenem abaot plan we i no save finis blong Papa long Heven: “Mi save talem se long spirit wol bifo laef long wol ia, taem we oli givim tingting long yumi se bae yumi pastru long eksperiens we yumi stap kasem naoia, yumi evriwan i no filim stret mo se i wan samting we bae yumi laekem. … Be yet, i no gat eni tu tingting se wanem we yumi bin luk mo andastanem klia long ples ia longwe, i we, blong save kam olsem wan god mo kasem glori, yumi nid blong gotru long eksperiens ia.” Hem i gohed blong talem: “Yumi bin glad mo yumi bin wantem blong folem tingting blong God, mo from hemia, yumi stap long ples ia” (Teachings of Presidents of the Church: Lorenzo Snow [2012], 110).
Fasin blong sakem sin, hem i pat blong stap folem tingting blong God. So, i gud blong yu no fraet long bisop, be yu mekem hem i wan fren blong yu. God i bin jusum hem, mo hem i save helpem yu blong sakem sin mo hilim sol blong yu taem yu kam long Jisas Kraes. Lod i wantem blong helpem yumi, be yumi nid blong mekem fas step ia blong go sakem sin. Long wei ia, yumi save luk promes we i stap long Aesea 1:18 i stap kamtru: “[Nomata ol sin blong yu oli red gud, bambae oli kam waet olsem sno.” Mo from hemia nao, bisop i stap ia blong help.
Mi testifae se Jisas Kraes i stap laef, mo se Jisas Kraes i Sevya blong yumi. !Tufala tugeta, Tufala i lavem yumi tumas!