Te Moan Mwaneka nakon te Rairannano
E maeka te tia korokaraki i Ouest, Haiti.
I namakina te rotongitong n taonanako maiu. Ao imwiina I ataia bwa I riai n maroro ma au bitiobi.
Kamataata n te korotamnei iroun Joshua Dennis
I uringa bairean au bong ni bwabetito ma mitinare. A titirakinai ngkana I tauraoi ni karaoa te berita aei ma Tamara are i Karawa. N akea raoi iangoakina irou ao ma nanou ae e onrake n te kimwareirei, I taku, “Eng!” I tangiria ni butimwaea te bwaintangira ae onoti are e a tia n anganai Tamau ae tangira, ao I ataia bwa N na bon aki kukurei ngkana akea te Tia Kamaiu inanon maiu. Ma I aki rangi n ataia bwa tera arou nakon taai aika a na roko.
N tokina, e a roko te bong are e a kaman kariariaaki. I bon aki kona ni mwaninga, ao I rangi ni kukukrei.
Boong aika Rotongitong
Imwiin au bwabetito ao kamatoakiu, boong a waekoa n taraa n roo. I rinanon kaangaanga inanon au utu, ao e nako buaka ongotaekau n ana tua te Atua ni kabane. I aki ataia bwa tera ae N na karaoia, ao I tangiria ni kabwara nanou ni bwaai ni kabane. Taraan ae akea ae e ota irou.
I a tia n rangi n tatangira warekan ana Boki Moomon, ma n te tai anne I a katinanikua. N te bong teuana, ngke ai tii ngai ni mweengau, I namakina ana tangira te Tamnei ni wirikirikinai bwa N na wareka ana Boki Moomon. I a kaman tataro mai imwaaina, ni kan karekea te kaeka are e na uota te rau nakoiu inanon korakaiu. I kaukia nakon Aramwa mwakoro 5. E kangai te Kibu 27: “Kam a tia n nakonako, ni kawakiningkami bwa kam na aki reke n te bure imatan te Atua? Kam kona n taekinna, ngkana kam a weteaki nakon te mate n te tai aio, inanomi, bwa kam a tia n nanorinano n ae tau? Bwa ami kunnikai a tia ni kaitiakaki ma ni kamainainaki rinanon raraan Kristo, are e na roko ni kabooia ana aomata man aia bure?”
N tokina, I namakinna bwa I riingaki n taeka aikai. I ataia bwa I riai n raira nanou, ngaia are I bairea au tai ni kawara te bitiobi. I bon ataaki ae I maaku, ma I kairoroai n nako ni kawaria.
N ataakin raoi ana Berita te Atua
Ngke I a roko n ana aobiti te bitiobi, I namakinna bwa I kairua n te aro are I tangiria n rairaki n oki. Ma I tataro ni karekea te ninikoria n taekin bwaai ni kabane ake I bon riai n taekin. E butimwaeai te bitiobi nakon ana aobiti, ao imwiina e tataro bwa e na karekea ana ibuobuoki te Atua. E taetae nakoiu n ai aron ae E taetae nakon natina te mwaane ao e kaota ana tangira nakoiu rinanon ana taeka. E anganai ana taeka n reirei ao e tuangai bwa N na karaoi bwaai tabeua bwa I aonga ni karekea kabwaraakin au bure mai iroun te Atua ao imwiina N na manga oki rikaaki ni kaitibo ma ngaia.
I rang kukurei ibukin te tai aei. I irii ana taeka n reirei ao n tokina I a ota n ana berita te Atua ibukin kabwaraan ana bure Aramwa: “Ngkana e kaota ana bure nakoim ao nakoiu, ao e rairananona ma te nano ae koaua, ngaia ae ko na kabwara ana bure ao N na kabwara naba ana bure” (Motiaea 26:29). Imwiin au rairannano ma nanou ni koaua, I ataia bwa te Atua e a tia ni kabwarai au bure. N tokina I a kona n namakina ana tangira Tamara arei Karawa inanou, ao e kabebeteaki te rootongitong. I kukurei ao I kakatonga irou.
Te Bitiobi e Mena Ikekei bwa E na Ibuobuoki
Te bitiobi bon te tia tei ibukin te Uea ibukin te uoote. Ataia bwa e tauraoi ni buokiko ni karekea te kukurei ni koaua are e katauraoia te Atua ibukim. Onimakinna. Ngkana iai am kaangaanga ao ko riai n raira nanom, nako ao kakaea. E na buokiko.
I ataia bwa e aki beebete kawarakina n tabetai. Ma ngkai e kabwarabwara Beretitenti Lorenzo Snow (1814–1901) ana baire ae akea tokina Tamara arei Karawa: “I kakoaua bwa n te [maiu imwain te maiu aei] n te aonaaba n tamnei, ngke e taekinaki nakoira bwa … ti na rinanon te namakin anne are tia karekea ngkai, a bon aki bane ni kakukurei ao e aki boraoi te iango iai. … Ma e matata bwa ti nooria raoi ngke ti mena n te aonaaba n tamnei, bwa ti aonga n kakoroa bukin karietataakira ao mimitongira, e rang kakaawaki karaoan aei.” E reitinako n taekinna, “Ti tauraoi n ira nanon ana kantaninga te Atua, ao n tokina ti a roko ikai” (Teachings of Presidents of the Church: Lorenzo Snow [2012], 110).
Te rairannano bon mwakoron irakin ana kantaninga te Atua. Ngaia are n oneanmwin are ko na maaka te bitiobi, karikia bwa raoraom. E a tia n rineaki iroun te Atua, ao e kona ni buokiko n raira nanom ao ni kamarurunga tamnei rinanon nakom nakon Iesu Kristo. E tangirira ni buokira te Uea, ma ti riai n anaa te moan mwaneka anne nakon te rairannano. N te aro anne ti na kona n noora te berita iroun Itaia 1:18 bwa e na kakoroaki nanona: “ngkana tao ai aron kunnikai aika a uraura ami bure, ao a na riki ni mainaina n ai aron te tino.” Ao ibukin karaoan te rairannano anne, te bitiobi e tauraoi n ibuobuoki.
I kakoaua bwa te Atua e maiu ao Iesu Kristo bon ara Tia Kamaiu. Ngaiia ni kauoman a rang n tangiriira!