Nakauli og Sayo Kay sa Giplano
Ang tagsulat nagpuyo sa Arizona, USA.
Dunay daghang paagi sa pagpadayon sa pagserbisyo sa Ginoo ug sa pagpangita og kahulugan human makauli og sayo gikan sa misyon.
Ang akong mga ginikanan nakaserbisyo og misyon. Sa batan-on pa nakadungog ko sa ilang mga istorya sa misyon ug nagdamgo sa adlaw nga ako makaserbisyo sa Ginoo isip full-time nga misyonaryo.
Ang pag-andam sa akong misyon mao ang usa sa labing bililhong panahon sa akong kinabuhi. Mas duol ko sa Ginoo kay sa kaniadto. Nadawat nako ang akong mission call ngadto sa Budapest Hungary Mission ug misulod sa Provo Missionary Training Center (MTC), determinado sa paghatag sa tanan ngadto sa akong Langitnong Amahan.
Sa MTC usa ka talagsaon nga espirituhanon nga kasinatian alang nako. Samtang nahimo kong mas suod sa Ginoo, sinsero akong nag-ampo nga andam kong mobuhat sa bisan unsa nga Iyang isugo ug misaad nga akong higugmaon ang mga taga-Hungary sa akong tibuok kasingkasing.
Sa dihang hapit na mahuman ang akong kasinatian sa MTC, nasakit ko. Human sa mubo nga panahon sa amo aron magpaayo, gihatagan ko og oportunidad sa pagpadayon sa akong misyon sa Hungary. Gibutang ko uban sa talagsaong trainer, si Sister Sunshine Nestor, kinsa mitudlo nako unsaon sa pag-ila sa inadlaw nga malumong kalooy ug mga milagro sa Ginoo.
Human sa pipila ka mga bulan, nasakit ako pag-usab. Bisan si Sister Nestor ug ako nagpadayon sa pagtrabaho kutob sa among mahimo, kinahanglan akong mopauli pag-usab.
Sa akong hunahuna akong gipakyas ang Ginoo tungod kay wala ko makaserbisyo og “full” nga misyon. Nagtuo ko nga duna pay mga taga-Hungary nga “kinahanglan” nakong tudloan kon wala pa unta ako masakit. Naghunahuna ko kon wala ba koy igong hugot nga pagtuo nga mamaayo tungod kay, human sa tanan, ang Ginoo manalipod sa Iyang mga misyonaryo. Wala gayud nako isipa nga ang akong sakripisyo ngadto sa Ginoo dili lang ang paghatag og usa ka tuig ug tunga sa akong kinabuhi, apan sa pagsakripisyo sa matang sa misyon nga akong gipaabut.
Ang Akong Pagpangita og Kahulugan diha sa Panimalay
Sa akong paggawas gikan sa eroplano nga mopauli na, dili nako malikayan ang paghunahuna nga akong gibiyaan ang labing importante nga trabaho sa akong kinabuhi diha sa mission field. Nagkinahanglan og panahon, apan nakat-unan nako nga dunay trabaho sa panimalay nga makahatag usab og kahulugan sa akong kinabuhi.
Bisan unsa pay inyong rason sa pagpauli og mas sayo gikan sa misyon kay sa gipaabut, hukmi karon sa paghimo niini nga kasinatian nga usa ka lakang sa pagpadayon sa inyong kauswagan, dili ang pag-atras. Miuli ko tungod sa medikal nga mga rason, apan ang uban mopauli sa lain-laing mga rason lakip na ang kalapasan. Isip resulta, pipila sa mga ideya sa ubos mahimong dili magamit sa inyong sitwasyon. Pag-ampo ngadto sa Ginoo sa pagpangita og mga paagi sa pagserbisyo Kaniya diha sa panimalay. Pananglitan, kon ikaw mipauli tungod sa kalapasan ug dili pa takus nga mosulod sa templo, makakita gihapon kamo og kahulugan kon kanunay mong molakaw libut sa nataran sa templo ug maningkamot nga mobalik sa Iyang balaan nga balay sa umaabut.
Gawas sa pagbasa sa akong mga kasulatan, pag-ampo, ug pagtambong sa simbahan ang matag usa sa mosunod nga mga lakang sa akong panaw importante aron ako mamaayo.
1. Pagpadayon sa mga Relasyon
Ang akong unang lakang sa pagpangita og kahulugan sa akong kinabuhi mao ang papadayon sa mga relasyon uban sa mga Santos ug sa mga misyonaryo didto sa Hungary. Sulod sa taud-taod nga panahon, mahinamon akong maghulat sa mga preparation day nga ako makadawat og mga email gikan ni Sister Nestor ug sa akong mga kompanyon sa MTC. Moangkon ko, nga dili sayon nga mobasa bahin sa misyon sa akong mga kompanyon o sa pagpakigsulti sa mga taga-Hungary nga akong gikamingawan pag-ayo. Apan sa akong paghinumdom karon, nakaamgo ko nga importante nga ako mamaayo nga makadungog bahin sa mga milagro nga nahitabo didto.
2. Indexing Online
Ang akong manghud nga lalaki, malumong gisugo sa akong maalamon nga inahan, sa pagkombinser nako nga magsugod og indexing. Sa sugod mitrabaho ko og grupo sa mga ngalan aron lang malipay sila, apan usa ka adlaw usa ka registry sa mga ngalan sa taga-Hungary migawas sa akong screen. Ang Espiritu midasig nako ug mitudlo nako nga makatabang gihapon ko sa pagdala og mga kalag nga taga-Hungary ngadto ni Kristo—ngadto sa laing bahin sa tabil!
3. Paghimo og mga Tumong
Human sa misyon, ang tanan nakong mga tumong sa kinabuhi sa wala pa ang misyon ingon og dili na makab-ut tungod sa akong bag-ong kondisyon sa panglawas. Apan paglabay sa panahon nakaamgo ko nga dunay mga tumong nga akong mahimo samtang naghigda. Mga tumong sama sa pagbasa sa Jesus the Christ “mga tumong nga mahimo ra samtang naghigda” ug buhaton kini kada adlaw.
4. Eskwela og Balik
Usa sa akong mga tumong sa kinabuhi sa wala pa ang misyon mao ang paggradwar sa kolehiyo. Ang pagtambong og klase lisud tungod sa akong sakit ug sa kanunay nga pag-adto sa doktor, ang akong papa miawhag nako nga mokuha og online nga mga klase sa Brigham Young University Independent Study. Dili lang mahimo kini nga tumong bisan maghigda ko, apan nakaamgo ko nga tingali makahimo pa ko og mas daghang mga tumong sa wala pa ang misyon kay sa akong gihunahuna nga posible.
5. Pagserbisyo og Online Mission
Usa ka adlaw didto sa simbahan, usa ka sister miduol sa akong mama ug miingon, “Nakahibalo ba ka nga si Destiny makaserbisyo og online indexing mission?” Kining wala paabuta nga pangutana mao ang tubag sa akong mga pag-ampo. Nakaserbisyo ako sa Ginoo sulod sa siyam ka bulan isip usa ka indexing support Church-service missionary. Misyon kini nga mahimo nako!*
6. Pagtudlo sa Pagpangandam sa Misyon
Samtang naanad na ko sa pagdala sa kondisyon sa akong panglawas, nagsugod ko sa pag-eskwela sa usa ka community college samtang maghimo sa akong online mission. Gihangyo ko sa pagtudlo og pagpangandam sa misyon sa duol nga institute. Ang pagtudlo nakatabang nako nga makaamgo nga ang akong kadasig alang sa misyonaryo nga buhat wala mawala ug nga bisan sa akong mubo nga misyon nakahatag nako og daghang mga kasinatian nga mahimong bililhon sa akong mga estudyante.
7. Pagboluntaryo sa MTC
Human sa malampusong pagtambong sa semester sa kolehiyo nga duol sa akong balay, mibalhin ko ngadto sa Utah, USA, aron moeskwela sa BYU. Sa sinugdanan, maglisud ko sa paglakaw agi sa Provo MTC nga dili mobati og kalit nga nagkalahi nga mga emosyon. Apan nagsugod ko sa pagboluntaryo matag semana sa MTC ug nakamatikod nga makaayo nga makahimamat sa talagsaong mga misyonaryo nga ipadala ngadto sa akong pinalanggang Hungary.
8. Pagpahigayon og Buhat sa Templo
Usa ka sister nga taga-Hungary, si Edit, kinsa nag-andam og dul-an sa 150,000 ka mga ngalan alang sa templo mihangyo nako nga modala sa pipila sa iyang mga ngalan ngadto sa templo. Makalipay ang paghimo sa makaluwas nga mga ordinansa alang niini nga mga taga-Hungary!
Hinay-hinay nga Pagkaayo Pinaagi sa Iyang Buhat
Ang pagserbisyo og misyon mao ang akong labing importante nga damgo sa kinabuhi ug, masabtan, nga mibati ko nga napakyas sa dihang mas sayo ko nga miuli kay sa gipaabut. Sa makadiyot, naglisud ko nga mohisgot sa akong misyon. Kinahanglan nga akong buntugon ang pagbati sa kapakyasan. Kinahanglan kong makat-on sa paghukom sa bili sa akong misyon pinaagi sa akong tinguha sa pagserbisyo kay sa gitas-on. Bisan wala ako makaamgo niini niadtong higayuna, ang matag usa niini nga mga lakang nga naghatag og kahulugan sa akong kinabuhi nakapaayo usab.
Sulod sa daghang tuig nabalaka ko nga ang pagbalik ngadto sa Hungary lisud alang nako sa emosyonal nga paagi. Sa dihang mibiyahe ko didto, sa ikaduhang adlaw akong naamgohan nga wala lang nako batia nga walay sakit, gibati usab nako ang tumang kalipay nga nakabalik. Nasayud ko nga ang Langitnong Amahan mihatag nako og oportunidad nga makasinati sa makaayo nga gahum sa Pag-ula sa Manluluwas. Nasayud ako karon nga pinaagi sa Pag-ula ni Jesukristo, ang tanang mga butang mahimong sakto sa katapusan.