Foki Vave ki ʻApi Teʻeki ʻOsi
ʻOku nofo ʻa e tokotaha naʻá ne faʻú ʻi ʻAlesona, USA.
ʻOku lahi ha ngaahi founga ke te kei tauhi ai ki he ʻEikí mo fai ha meʻa ʻoku ʻuhingamālié, hili e foki teʻeki ʻosi mei he ngāue fakafaifekaú.
Naʻe ʻosi ngāue fakafaifekau fakatouʻosi ʻeku ongo mātuʻá. Naʻá ku fanongo ʻi heʻeku kei siʻí ki he ngaahi talanoa ʻo ʻena ngāue fakafaifekaú mo fakaʻānaua ki he ʻaho te u lava ai ʻo tokoni ki he ʻEikí ko ha faifekau taimi kakato.
Ko e teuteu ki heʻeku ngāue fakafaifekaú ko ha taha ia ʻo e ngaahi taimi mahuʻinga taha ʻo ʻeku moʻuí. Naʻá ku ofi ange ki he ʻEikí ʻi ha toe taimi kimuʻa. Naʻe maʻu hoku uiuiʻi fakafaifekaú ki he Misiona Budapest Hungary peá u hū ki he Senitā Akoʻanga Fakafaifekau ʻi Polovó, mo fakapapau ke foaki ʻeku moʻuí kotoa ki heʻeku Tamai Hēvaní.
Naʻe hoko ʻeku ʻi he MTC ko ha aʻusia fakalaumālie taʻeʻamanekina kiate au. ʻI he fakaʻau ke u ofi ange ki he ʻEikí, naʻá ku lotu fakamātoato ke u loto fiemālie ke fai ha meʻa pē te Ne kole pea mo palōmesi te u ʻofa ʻi he kakai Hungalí ʻaki hoku lotó kotoa.
Naʻá ku puke ʻi he ofi ke ʻosi ʻeku ʻi he MTC. Hili ʻeku kiʻi mālōlō nounou ki ʻapi ʻo fakaakeaké, ne tuku mai kiate au ha faingamālie ke hoko atu ʻeku ngāue fakafaifekaú ʻi Hungali. Naʻe tuku ke u hoa mo ha hoa taki lelei ko Sisitā Sanisaini Nesitā, ʻa ia naʻá ne akoʻi au ke u fakatokangaʻi ʻa e ngaahi ʻaloʻofa ongongofua fakaʻahó pea mo e ngaahi mana ʻa e ʻEikí.
Hili ha ngaahi māhina siʻi, naʻá ku toe puke. Neongo naʻá ku ngāue mo Sisitā Nesitā ʻi he lelei taha naʻá ma lavá, ka naʻe pau ke u toe foki ki ʻapi.
Ne u fakakaukau, kuó u ʻai ke tōnoa e ʻEikí he kuo ʻikai ke u fakahoko ha ngāue fakafaifekau “kakato.” Naʻá ku tui pau naʻe kei ʻi ai ha kakai Hungali naʻe “totonu” ke u akoʻi kapau naʻe ʻikai ke u puke. Naʻá ku fifili pea naʻe ʻikai nai feʻunga ʻeku tuí ke u moʻui, koeʻuhi, he ʻoku maluʻi ʻe he ʻEiki ʻa ʻEne kau faifekaú. Naʻe ʻikai ke u teitei fakakaukau ko ʻeku feilaulau ki he ʻEikí ke foaki ha taʻu ʻe taha mo e konga ʻo ʻeku moʻuí, ka ke feilaulauʻi ʻa e faʻahinga ngāue fakafaifekau naʻá ku fakakaukau ki aí.
Ko ʻEku Fekumi ki ha ʻUhingamālie ʻi ʻApí
Ko e taimi naʻá ku hifo ai mei he vakapuná heʻeku fokí, naʻe ʻikai ke u mapukepuke ʻeku fakakaukau kuó u liʻaki e ngāue ʻaonga taha ʻo ʻeku moʻui ʻi he malaʻe ngāue fakafaifekau. Naʻe kiʻi fuoloa, ka naʻá ku toki ʻilo naʻe ʻi ai ha ngāue ʻi ʻapi te ne toe lava ke ʻomi ha ʻuhingamālie ki heʻeku moʻuí.
Tatau ai pē pe ko e hā e ʻuhinga hoʻo foki teʻeki ʻosi mei hoʻo ngāue fakafaifekaú, fakapapau he ʻahó ni ke ʻai e aʻusiá ni ko ha sitepu laka kimuʻa ʻi hoʻo fakalakalaká, kae ʻikai ko ha sitepu fakaholomui. Naʻá ku foki mai ʻi ha ngaahi ʻuhinga fakafaitoʻo, ka ʻoku foki mai e niʻihi ʻi he ngaahi ʻuhinga kehekehe, kau ai e maumaufonó. ʻI heʻene peheé, ʻe ʻi ai ha ngaahi fakakaukau ʻi lalo he ʻikai fekauʻaki mo ho tuʻungá. Lotua ha ngaahi founga ki he ʻOtuá ke ke tokoni ai kiate Ia mei ʻapi. Hangē ko ʻení, kapau naʻá ke foki mai ko ha maumaufono pea ʻoku teʻeki ai ke ke taau ke ʻalu ki he temipalé, te ke kei lava pē ʻo maʻu ha ʻuhinga kapau te ke toutou ʻeva takai ʻi he tuʻa temipalé mo tukupā ke ke foki ʻi ha ʻaho ki Hono fale toputapú.
Makehe mei hono lau ʻeku folofolá, lotu, pea mo ʻalu ki he lotú, naʻe mahuʻinga e ngaahi sitepu takitaha ko ʻení ʻi heʻeku fononga ki hoku fakamoʻuí.
1. Kei Fetuʻutaki pē
Ko ʻeku ʻuluaki sitepu ʻi hono kumi e ʻuhingamālie ʻeku moʻuí ko ʻeku kei fetuʻutaki mo e Kāingalotu pea mo e kau faifekau ʻi Hungalí. Taimi ʻe niʻihi, naʻá ku ʻamanaki lelei atu ki he ngaahi ʻaho teuteú ke u maʻu ai ha ʻīmeili meia Sisitā Nesitā mo hoku ngaahi hoa MTC. Te u pehē pē; naʻe ʻikai faingofua ʻi he taimi ʻe niʻihi ke u lau e meʻa ne hoko he ngāue hoku ngaahi hoá pe talanoa mo e kakai Hungali naʻá ku ʻofa ki aí. Ka ʻi heʻeku vakai atu he taimi ní, ʻoku ou fakatokangaʻi naʻe mātuʻaki mahuʻinga ʻeku fanongo ki he ngaahi mana naʻe hoko aí ki heʻeku moʻui leleí.
2. Ngāue Fakatohi-hohoko ʻi he ʻInitanetí
Naʻe fakaʻaiʻai au ʻe hoku kiʻi tokouá, pea teke au ʻe heʻeku faʻeé, ke u kamata ngāue fakatohi-hohoko ʻi he ʻinitanetí. ʻI he kamataʻangá naʻá ku ngāue pē ki ha ngaahi hingoa ke fiemālie ai, ka ʻi ha ʻaho ʻe taha ne ʻi ai ha ngaahi hingoa Hungali kuo lesisita ne ʻasi hake heʻeku komipiutá. Naʻe nofoʻia au ʻe he Laumālié mo akoʻi au te u kei lava pē ʻo tokoni ke ʻomai e kakai Hungalí kia Kalaisi—mei he tafaʻaki pē ʻe taha ʻo e veilí!
3. Fokotuʻu ʻo e Ngaahi Taumuʻá
Naʻe hangē ne taʻe-maaʻusia ʻa ʻeku ngaahi taumuʻa kotoa kimuʻa ʻi heʻeku ngāue fakafaifekaú ʻi he tūkunga foʻou ʻo ʻeku moʻuí, he taimi ne ʻosi ai ʻeku ngāue fakafaifekaú. Ka, naʻá ku fakatokangaʻi ʻi he fakalau atu ʻa e taimí, naʻe ʻi ai ha ngaahi taumuʻa naʻe lava ke u fakahoko ʻi heʻeku tokotó. ʻOku ou ui ʻa e ngaahi taumuʻa hangē ko hono lau e tohi Sīsū ko e Kalaisí, ko ha “ngaahi taumuʻa tatau” pea ngāueʻi fakaʻaho ia.
4. Ko e Foki ki he Akó
Ko e taha ʻeku ngaahi taumuʻa ʻi he moʻui kimuʻa pea ngāue fakafaifekaú ke ʻosi mei ha ʻunivēsiti. Neongo ʻe faingataʻa e maʻu kalasí ʻi hoku fokoutuá pea mo e lahi e sio ki he toketaá, ka naʻe fakalotolahiʻi au ʻe heʻeku tangataʻeikí ke ʻai haʻaku kalasi ʻi he ʻinitanetí mei he Ako Feʻaveaki ʻa e ʻUnivēsiti Pilikihami ʻIongí. Naʻe ʻikai ngata pē he hoko ʻeni ko ha taumuʻa ne malava ke maaʻusiá, ka naʻá ku toe fakatokangaʻi foki mahalo te u malava ke fakahoko ha ngaahi taumuʻa kimuʻa he ngāue fakafaifekaú ʻoku lahi ange ʻi he meʻa naʻá ku ʻuluaki fakakaukau ʻe malavá.
5. Ko e Ngāue Fakafaifekau ʻi he ʻInitanetí
Naʻe haʻu ha fefine ki heʻeku fineʻeikí ʻi ha ʻaho ʻe taha ʻi he lotú, ʻo ne pehē ange, “ʻOkú ke ʻilo ʻe lava ʻa Tesitinī ʻo ngāue fakafaifekau fakatohi-hohoko ʻi he ʻinitanetí?” Ne hoko e fehuʻi taʻe-ʻamanekina ko ʻení ko ha tali ki heʻeku ngaahi lotú. Naʻá ku lava ʻo tokoni ki he ʻEikí ʻi ha māhina ʻe hiva ko ha faifekau tokoni tohi-hohoko he Siasí. Ko ha ngāue fakafaifekau ʻeni te u lava ʻo fai!*
6. Faiako ʻi he Kalasi Teuteu Ngāue Fakafaifekaú
ʻI he fakaʻau ke u poto ange hono tokangaʻi ʻeku tūkunga moʻui leleí, naʻe kamata ke u ako ʻi he kolisi fakakoló mo fakahoko ʻeku ngāue fakafaifekau he ʻinitanetí. Naʻe kole mai ke u akoʻi e kalasi teuteu ngāue fakafaifekaú ʻi ha ʻinisititiuti ofi mai. Naʻe tokoni ʻeku faiakó ke u fakatokangaʻi kuo teʻeki hōloa ʻeku vēkeveke ki he ngāue fakafaifekaú pea naʻa mo ʻeku kiʻi ngāue fakafaifekau taimi nounoú, naʻá ne ʻomi kiate au ha ngaahi aʻusia lahi ʻe lava ke mahuʻinga ki heʻeku kau akó.
7. Ko e Ngāue Taʻe-totongi ʻi he MTC
Hili haʻaku lavaʻi lelei ha faʻahitaʻu fakaako ʻe taha ʻi ha kolisi ofi mai ki hoku ʻapí, naʻá ku hiki leva ki ʻIutā, USA, ke ako ʻi BYU. ʻI he kamataʻangá, naʻe ʻikai ke u faʻa lava ʻo luelue ofi ki he MTC ʻi Polovó mo taʻe-ongoʻi ha ngaahi ongo fehangahangai. Ka naʻá ku kamata ke ngāue taʻe-totongi fakauike ʻi he MTC, mo fakatokangaʻi ko hoku moʻui lelei ʻangá ke feʻiloaki mo e kau faifekau lelei naʻe ʻomi mei hoku fonua ʻofeina ko Hungalí.
8. Ko e Fakahoko ʻo e Ngāue Fakatemipalé
Naʻe kole mai ha fefine Hūngali ko ʻĪtiti kiate au, kuó ne ʻosi teuteu ha meimei hingoa ʻe 150,000 ki he temipalé, ke ʻave ha niʻihi ʻo ʻene ngaahi hingoá ki he temipalé. Ko ha meʻa fakafiefia ke fakahoko e ngaahi ouau fakamoʻuí maʻá e kakai Hungali ko ʻení!
Fakamoʻui Māmālie ʻi Heʻene Ngāué
Taha ʻo e ngaahi fakaʻānaua mahuʻinga taha ki heʻeku moʻuí ke u ʻalu ʻo ngāue fakafaifekau pea naʻá ku ongoʻi naʻe mole ha meʻa ʻi he taimi naʻá ku foki teʻeki ʻosi ai ki ʻapí. Naʻá ku fāifenga ke talanoa fekauʻaki mo ʻeku ngāue fakafaifekaú ʻi ha taimi lahi. Naʻe pau ke u ngāue lolotonga ʻeku ongoʻi tōnounoú. Naʻe pau ke u ako e founga ke fakafuofuaʻi ai e mahuʻinga ʻo ʻeku ngāue fakafaifekaú ʻaki ʻeku fie ngāué kae ʻikai ko hono lōloá. Neongo naʻe ʻikai ke u fakatokangaʻi ia he taimi ko iá, ka naʻe toe ʻomi ʻe he ngaahi sitepu ki he ʻuhinga ʻo ʻeku moʻuí ha moʻui lelei kiate au.
Naʻá ku tailiili ʻi ha ngaahi taʻu lahi naʻa hoko ʻeku foki ki Hungalí ko ha meʻa faingataʻa fakaeloto kiate au. Ka ʻi he faifai peá u folau ki aí, naʻá ku toki fakatokangaʻi ʻi he ʻaho hono hokó naʻe ʻikai ngata pē ʻi he ʻikai ke u toe ongoʻi ha felāngākí, ka naʻá ku toe ongoʻi fōngia foki ʻi he fiefia ke fokí. Naʻá ku ʻiloʻi kuo foaki mai ʻe he Tamai Hēvaní kiate au ʻa e faingamālie ke aʻusia e mālohi faifakamoʻui ʻo e Fakalelei ʻa e Fakamoʻuí. ʻOku ou ʻiloʻi he taimí ni ʻoku tuʻunga ʻi he Fakalelei ʻa Sīsū Kalaisí, hono fakatonutonu e meʻa kotoa pē ʻi he ngataʻangá.