Kila na Nomu Veivakalougatataki Vakapeteriaki
Erau vakaitikotiko na a vola mai Illinois, Amerika, kei New York, Amerika.
Nomu kila na veitiki eso ni nomu veivakalougatataki e rawa ni vukea me muadonu na nomu bula.
Man in maze © Digital Vision Vections/Getty Images
E sinai tu ena noda bula na veiwasawasa tawakilai: Meu laki vuli ki vei? Na cava meu vulica? Meu laki kaulotu beka? O cei beka meu vakamautaka? Kevaka e soli vei iko e dua na mape mo sokota kina na veivakatulewa ni bula, o na vakamuria beka?
Erau sa solia vei keda na Tamada Vakalomalagi kei Jisu Karisito e dua na mape vakaoqori—na veivakalougatataki vakapeteriaki—me muataka na noda bula. E dina ni sa soli vei keda na isolisoli ni galala ni digidigi me da digidigi kina ena noda dui lewa ga, na veivakalougatataki vakapeteriaki e rawa ni vakararamataka na sala ena kauta mai na marau levu duadua.
Ia e sega ni sa rauta ga me tiko e dua noda mape. Sa dodonu me da vulica, kila, ka vakayagataka na ibalebale ni veika e tu ena mape. Sa vakakina, ni sa yaco mo kila na vosa e vakayagataki ena nomu veivakalougatataki vakapeteriaki—na nomu idusidusi vakataki iko ena bula—sa na rawa mo kila se o cei o iko ena mata ni Kalou kei na vanua e rawa ni o yaco kina.
Kila na Nomu Kawa
Taumada ka bibi duadua, na nomu veivakalougatataki vakapeteriaki ena tukuna na nomu kawa, se na mataqali cava mai na mataqali e tinikarua i Jekope (o koya a qai vakatokai e muri me o Isireli) o wili kina. E dina ni sega ni o keda taucoko eda kawa dina i Jekope, e vakavulici keda na ivolanikalou ni da vakubeci na lewe ni Lotu ki na yavusa i Isireli: “Raica ko ira kecega sa vakabauta na ivakavuvuli oqo, era na vakatokai ena yacamu, io era na okati me nomu kawa, ka ra na tacake ka vakacaucautaki iko, ni o sa tamadra” (Eparaama 2:10).
E kaya o Shelisa Schroeppel mai Utah, Amerika, “Niu kila niu lako mai na yavusa i Jekope e vukei au meu kila na kequ inaki ena bula oqo kei na vuna au kacivi kina ena veikacivi eso ena Lotu.”
E rawa ni vakamacalataki talega ena nomu veivakalougatataki vakapeteriaki na veivakalougatataki tale eso e salavata kei na nomu mataqali. Taura mada, e levu na lewe ni Lotu era lako mai na mataqali i Ifereimi, na mataqali ka kena itavi na vakatetei ni kosipeli vakalesui mai ki vuravura (raica Nai Vakarua 33:13–17; V&V 133:26–34).
Vakasaqara na iVakasala Baleti Iko
Ni vakayagataki vakadodonu na mape ena taqomaka na dauveilakoyaki me kua ni lakosese. E vakakina, ena ilakolako ni bula vakavuravura oqo, e rawa ni vakasalataki iko na nomu veivakalougatataki vakapeteriaki me muadonu kina nomu ilakolako. E sega ni tukuna sara vakadodonu vei iko na nomu veivakalougatataki vakapeteriaki na veika mo cakava, ia e rawa ni vakabasikata vei iko na vakasama baleta na sala—ke sasagataki ena vakabauta—ena rawa ni vukea mo kila ni sa taudonu na nomu bula ki na lomana na Tamada Vakalomalagi. Ni o vulica na nomu veivakalougatataki vakapeteriaki ka segata mo bula ena dua na ivakarau ena sureta na Yalo ni Turaga, sa na rawa ni o kunea na veitaqomaki, reki, kei na ibalebale ni bula.
E kaya o Gabriel Paredes mai Lima e Peru, “Eso na ivakasala a tukuni vei au ena noqu veivakalougatataki a qai rawa ga niu vakayagataka vakavinaka sara ena noqu matavuvale niu sa vauci oti vei watiqu.
“Ena dua na gauna lekaleka oqo keirau vakasamataka tiko na cava keirau rawa ni cakava me vaqaqacotaki ka tarai cake kina na neirau matavuvale vou. A saumi na neirau vakatataro mai na noqu veivakalougatataki vakapeteriaki. Au vakasalataki kina meu vakabibitaka na veirokorokovi, dauvosota, kei na loloma ena noqu matavuvale, baleta ni oqo eso na yavu bibi ni kosipeli i Jisu Karisito.
“Ni keirau vakanamata ena veika oqo, sa rawa ni keirau ulabaleta na leqa kei na watiqu. Se yaco tiko ga na bolebole ena so na gauna, ia keitou dau mamarau. Au vakila ni vaka e vakananuma tiko mai na Turaga na sala meu rawata kina na matavuvale e yalataka vei au o Koya. Au kila ni dau vosa mai na Turaga ena veivakalougatataki vakapeteriakiI ka me vakayagataki ena noda bula na ivakasala e tu kina.”
Muria na iVakasala
E sega ni dau vakatakilakilataki ena mape na itatarabe ena salatu, ia kalougata, ni dau vakavoqataki ena veivakalougatataki vakapeteriaki na ivakasala me da taqomaki kina ena ilakolako. Eso na ivakasala oqori e vukea noda taqomaki mai na veivakayarayarataki nei Setani; eso tale e rawa ni vakavukui keda ena iwalewale e rawa ni da ulabaleta kina na tamata vakayago e tu e lomada.
Vei Caitlin Carr mai Utah, a sega ni matata sara vakatotolo na ivakasala ena veivakalougatataki vakapeteriaki, ia ni qai vulica e muri na nona veivakalougatataki qai votu mai eso na vakasama vovou.
“Niu ciqoma na noqu veivakalougatataki vakapeteriaki, au a vakasalataki me baleti ira na tamata era na tovolea me ra vagolei au tani mai na dina ena vosa kamica. Au a sega ni vakasamataka sara vakalevu; e dei tu na noqu vakabauta ena ivunau au sa vakavullici kina.
“Ia, ena yabaki ka tarava a yaco mai eso na vakasama kei na ivakavuvuli, ka kena irairai e cake ni yavutaki ena savasava kei na loloma ia e sega. E vaka me lako mai ena veiyasana kecega na itukutuku oqo: na tabana vakaitukutuku, koronivuli, vei ira sara mada ga na itokani voleka. E dina ga niu kila tu ni veisaqasaqa kei na ituvatuva ni Kalou na ivakavuvuli eso oqo, au raica niu vinakata meu tokona ruarua na vakasama vou vakavuravura oqo kei na Lotu. E totolo noqu raica rawa ni ‘sega e dua na tamata sa qarava rawa e le rua na Turaga’ (Maciu 6:24) vakakina ni dodonu meu kua vakararavi ena yalomatua vakatamata. A walia na Tamada Vakalomalagi na noqu vakatitiqa mai na ivolanikalou ka tukuna ki na noqu vakanananu kei na yaloqu na vakacegu. Sa yaco kina me qaqaco noqu ivakadinadina kau sa tudei vakalevu cake ena noqu taqomaka na veika au kila ni dina.”
Taracake na iSolisoli kei na Taledi
E rawa talega ni tukuni ena nomu veivakalougatataki vakapeteriaki na isolisoli vakayalo kei na taledi sa solia vei iko na Turaga mo tara cake kina Nona matanitu. Kevaka e tukuni ena nomu veivakalougatataki e dua na taledi ka vou vei iko, e rawa ni baleta ni se bera ni o donumaka e dua na madigi mo kila se tara cake kina na taledi oqori. Ena sasaga vagumatua kei na veivuke ni Turaga, e rawa ni o tubu mo waqawaqa ni taledi oqo kei na vuqa tale.
Nomu tara cake nomu taledi ena vukea mo raica ka kila na veika bibi o na cau kina ena cakacaka ni Turaga. Dau vakananuma o Johanna Blackwell mai California, Amerika, na isolisoli kei na taledi ena nona veivakalougatataki ni temaki me vakatauvatani koya kei ira tale eso: “Niu raicalesu na malanivosa ena noqu veivakalougatataki vakapeteriaki, dau vakananumi vei au niu sa vakalougatataki tu ena isolisoli au gadreva meu ulabaleta kina na veivakatovolei ka vakaitavi ena vakatotolotaki ni cakacaka ni Turaga.
“E tukuna vei au na noqu veivakalougatataki na noqu rawata meu dauloloma, veivosoti, ka yaloqaqa meu veimaliwai kei ira era tu wavoliti au. Niu vakatovotovotaka na isolisoli oqo, sa vakalougatataki au na Turaga ena gagadre levu meu sotavi ira ka veikilaiyalo kei ira na tamata kei na itovo vou. Sa yaco kina na noqu ivakadinadina ni da luvena kece e dua na Tamada Vakalomalagi dauloloma, ka sa rawa niu qaravi ira na tani ni da segata yadua me vaka na Karisito vakalevu cake.”
Vakasaqara na Veivakalougatataki sa Yalataki Tu
Kena iotioti, e vakatakila vei keda na noda veivakalougatataki vakapeteriaki na veivakalougatataki sa yalataka tu vei keda na Tamada Vakalomalagi kevaka eda sa yalodina tikoga Vua. E sega ni vakadeitaki na gauna ena qai yaco mai kina na yalayala eso oqo, ia eda rawa ni kila kevaka eda bulataka tikoga na kosipeli ena talairawarawa, era na vakayacori, se ena bula oqo se na bula sa bera mai.
O Sergio Gutierrez mai Nevada, Amerika, sa dau vakararavi ena dua na yalayala ena nona veivakalougatataki vakapeteriaki ena gauna e dau lomaleqataka kina nona ituvatuva vakacakacaka ni mataka: “Ena so na gauna au dau nuiqawaqawa ena veilecayaki ni noqu veisiga ni mataka, ia e dua na yalayala ena noqu veivakalougatataki vakapeteriaki e dau vakaceguya na noqu vakasama. Na yalayala oqo e vukea meu kila kevaka au cakacaka tikoga vakaukauwa ka yalodina tiko, au na rawata na veika e gadrevi meu qarava kina noqu matavuvale ka tara cake na Lotu. Au sega ni kila vinaka sara na sala vakacakacaka au via sasagataka ia, ni tu vei au na yalayala oqo sa kauta mai na vakabauta kei na yalodei.”
Kevaka o dau vakataroga se cava na lomai Tamada Vakalomalagi ena vukumu, e sega ni o iko duadua. Sa kila tu na Turaga ni da na sotava e vuqa na sala duidui e rawa ni da sasagataka ena noda bula, sa vakarautaka kina o Koya vei iko e dua na nomu mape me taudonu kina na nomu bula ki na Nona kosipeli. E sega ni rawa ni vakatauca na lewa me baleti keda na veivakalougatataki vakapeteriaki, ia e rawa ni tuberi keda ki na noda dui ivakatakila yadua. Mai na noda veivakalougatataki vakapeteriaki, sa vakaraitaki kina na ivakarau eda vakacurumi kina ena ituvatuva ni Turaga me da vakasoqoni Isireli ena noda kila na noda mataqali; sa dui soli vei keda na ivakasala, veivakayaloqaqataki, kei na yalayala yadua; ka vakavulici vei keda na isolisoli kei na taledi duidui e solia vei keda na Tamada Vakalomalagi me da qaravi Koya. Ni o tovolea mo bula me vaka na veitiki kece sara ni nomu veivakalougatataki vakapeteriaki, ena rawa ni o kila ni nomu vakatulewa sa koto ena loma ni nona lewa na Turaga me baleta nomu bula.