Te hāroʼaroʼaraʼa i tō ʼoutou haʼamaitaʼiraʼa patereāreha
Tē ora ra nā taʼata pāpaʼi i Illinois, Marite ’e i New York, Marite.
E nehenehe te ʼiteraʼa i te mau tufaʼa nō tō ʼoutou haʼamaitaʼiraʼa e tauturu ia ʼoutou ’ia ʼite i te ’arata’ira’a nō tō ʼoutou oraraʼa.
Man in maze © Digital Vision Vections/Getty Images
’Ua ’ī te oraraʼa i te mau mea mātau-ʼore-hia : I hea vau e tiʼa ai e haere i te haʼapiʼiraʼa ? E aha tā’u e tiʻa ’ia ha’api’i mai ? » E tāvini ānei au i te hō’ē misiōni ? ʼO vai tāʼu e tiʼa ’ia faʼaipoipo atu ? Mai te mea e hōroʼahia atu ia ʼoutou te hōʼē hōhoʼa fenua nō te tere atu nā roto i te mau faʼaotiraʼa ʼo te oraraʼa, e peʼe ra ānei ʼoutou i te reira ?
’Ua hōroʼa mai te Metua i te Ao ra ’e o Iesu Mesia ia tātou i taua huru hōhoʼa fenua ra—te mau haʼamaitaʼiraʼa patereāreha-—nō te hōroʼa ia tātou i te arataʼiraʼa i roto i tō tātou oraraʼa. Noa atu ē ’ua hōroʼahia ia tātou te hōroʼa nō te tiʼamāraʼa ’ia rave i te mau faʼaotiraʼa nō tō tātou iho manaʼo tiʼamā, e nehenehe tā te mau haʼamaitaʼiraʼa patereāreha e nīniʼi mai i te māraramara i niʼa i te mau ’ēʼa e hōpoi mai i te ’oa’oa.
E’ita rā e navaʼi i te fāriʼi-noa-raʼa i te hōʼē hōhoʼa fenua. E tiʼa ia tātou ’ia tuatāpapa, ’ia taʼa, ’e ’ia faʼaʼohipa i te auraʼa i roto i te hōhoʼa fenua. ’Oia atoʼa, ’ia māramarama ʼoutou i te reo tei faʼaʼohipahia i roto i tō ʼoutou haʼamaitaʼiraʼa patereāreha—to ʼoutou iho arataʼi i roto i te oraraʼa—e nehenehe ïa ʼoutou e ʼite ē ʼo vai ʼoutou i mua i te mata o te Atua ’e te huru taʼata e riro mai ai ʼoutou.
ʼA ʼite i tō ʼoutou tuatāpaparaʼa fētiʼi
ʼA tahi ’e te mea faufaʼa rahi roa, e faʼaʼite mai tō ʼoutou haʼamaitaʼiraʼa patereāreha i tō ʼoutou tuatātaparaʼa fētiʼi, ’aore rā te ’ōpū taʼa ʼē nō reira mai ʼoutou nō nā hōʼē ’ahuru ma piti ’ōpū nō Iakoba (tei piʼihia i muri iho ʼo ʼĪserāʼela). Noa atu e ʼere tātou pāʼātoʼa e mau huāʼai tiʼa nō Iakoba, tē haʼapiʼi nei te mau pāpaʼiraʼa moʼa ia tātou ē ’ua faʼaʼamuhia te mau melo ʼo te ʼĒkālesia i roto i te ʼutuāfare nō ʼĪserāʼela : « ʼO rātou atoʼa hoʼi tei fāriʼi i teie nei ʼevanelia, e parauhia rātou i tō ’oe na iʼoa ’e e taiʼohia rātou ’ei huāʼai nō ’oe, ’e e tiʼa mai rātou i niʼa ’e e haʼamaitaʼi ia ’oe ’ei metua nō rātou » (Aberahama 2:10).
’Ua parau ʼo Shelisa Schroeppel nō Utaha, Marite, « ’ua tauturu te ʼiteraʼa ē nō roto mai au i te ʼutuāfare nō Iakoba iāʼu ’ia māramarama i tō’u tumu i roto i teie oraraʼa ’e nō te aha vau i piʼihia ai i te tahi mau piʼiraʼa i roto i te ʼĒkālesia ».
E nehenehe atoʼa i tō ʼoutou haʼamaitaʼiraʼa patereāreha e faʼaʼite i te mau haʼamaitaʼiraʼa ʼo te ’āpeʼe i tō ʼoutou ʼāti taʼa ʼē. ’Ei hiʼoraʼa, e rave rahi mau melo ʼo te ʼĒkālesia nō te ’ōpū nō Epharaima, te hōʼē ’ōpū tei fāriʼi i te hōpoiʼa taʼa ʼē nō te haʼaparare i tō te ao te poroʼi nō te ʼēvanelia tei faʼahoʼihia mai (hiʼo Deuteronomi 33:13-17 ; PH&PF 133:26-34).
ʼA ʼimi i te aʼo nō ʼoutou iho
’Ia faʼaʼohipa-maitaʼi-ana’e-hia, e pāruru te hōʼē hōhoʼa fenua i te hōʼē rātere ’ia ʼore ’ia moʼe. ’Oia atoʼa, i roto i teie tere i niʼa i te fenua nei, e hōroʼa mai tō ʼoutou haʼamaitaʼiraʼa patereāreha i te aʼo ’e te arataʼiraʼa nō tō ʼoutou oraraʼa. E’ita tō ʼoutou haʼamaitaʼiraʼa patereāreha e parau noa ia ʼoutou e aha te rave, e nehenehe rā te reira e hōroʼa mai i te mau manaʼo nō niʼa i te mau ’ēʼa—mai te mea e ravehia nā roto i te faʼaroʼo—e nehenehe e tauturu ia ʼoutou ’ia ʼite ’ia faʼatano anaʼe ʼoutou i tō ʼoutou oraraʼa i niʼa i te hinaʼaro ʼo te Metua i te Ao ra. ’A tuatāpapa ai ʼoutou i tō ʼoutou haʼamaitaʼiraʼa patereāreha ’e ’a tūtava ai ʼoutou i te ora i te hōʼē oraraʼa ʼo te faʼahaere mai i te Vārua ʼo te Fatu, e nehenehe ʼoutou ’ia ʼite i te pārurura’a, te ʼoaʼoa ’e te arataʼiraʼa.
’Ua parau o Gabriel Paredes nō Lima, Peru, « te tahi ʼo te mau aʼo tei hōroʼahia mai iāʼu i roto i tōʼu haʼamaitaʼiraʼa, ’ua nehenehe noa iāʼu ’ia faʼaʼohipa mau ’e tōʼu ʼutuāfare i muri aʼe i tōʼu taʼatiraʼahia i tāʼu vahine faʼaipoipo.
« ʼAita i maoro roa ’ua uiui māua e aha te mea tā māua e nehenehe e rave nō te haʼapūai ’e nō te patu i tō māua ʼutuāfare ʼāpī. ’Ua pāhonohia tā māua uiraʼa nā roto i tōʼu haʼamaitaʼiraʼa patereāreha. ’Ua aʼohia vau ’ia tuʼu nā mua roa te faʼatura, te faʼaʼoromaʼi, ’e te here i roto i tōʼu ʼutuāfare, nō te mea teie ïa te tahi ʼo te mau niu faufaʼa rahi nō te ʼevanelia ʼa Iesu Mesia.
« I tō māua faʼatumuraʼa i niʼa i te reira, ’ua nehenehe iā’u ’e tāʼu vahine faʼaipoipo ’ia faʼaʼoroma’i i te mau fifi. Tē vai noa ra ā te tahi mau tāmataraʼa ’ei ʼutuāfare, e mea ʼoaʼoa rā māua. E au ra iā’u ē ’ua faʼahaʼamanaʼo mai te Fatu iāʼu nāhea e nehenehe ai iāʼu ’ia noaʼa i te ʼutuāfare Tāna i fafau iāʼu. ’Ua ʼite au ē tē paraparau nei te Fatu nā roto i te mau haʼamaitaʼiraʼa patereāreha ’e e tiʼa ’ia faʼaʼohipahia te aʼo i roto i te reira i roto i tō tātou oraraʼa ».
ʼA faʼaroʼo i te mau faʼaararaʼa
Eʼita te hōʼē hōhoʼa fenua e tāpaʼo i te mau ʼāti atoʼa nā niʼa i te aratiʼa, e faʼaʼoto pinepine rā te mau haʼamaitaʼiraʼa patereāreha i te mau faʼaararaʼa nō te pāruru ia tātou nā niʼa i te porōmu. E tauturu te tahi ʼo teie mau faʼaararaʼa ’ia pāruru ia tātou i te mana ʼo Sātane ; e nehenehe te tahi e haʼamāramarama mai ia tātou nāhea e nehenehe ai ia tātou ’ia haʼavī i te taʼata tino i roto ia tātou.
Nō Caitlin Carr nō Utaha, ʼaita te tahi ʼo te mau faʼaararaʼa i roto i tōna haʼamaitaʼiraʼa patereāreha i māramarama i te reira ihoa taime, ’ua hōroʼa mai rā te tuatāpaparaʼa i tōna haʼamaitaʼiraʼa patereāreha i muri i te mau hiʼoraʼa ʼāpī.
« I tōʼu fāriʼiraʼa i tōʼu haʼamaitaʼiraʼa patereāreha, ’ua faʼaarahia vau nō te mau taʼata o te tāmata i te faʼahahi ’ē atu iā’u i te parau mau nā roto i te parau au maitaʼi. ʼAita vau i feruri rahi roa i te reira ; e tiʼaturiraʼa pāpū tōʼu i te mau haʼapiʼiraʼa tumu tei haʼapiʼihia mai iāʼu.
« ’Ārea rā, i te matahiti i muri mai, ’ua faʼaruru atu vau i te mau manaʼo ’e te mau haʼapiʼiraʼa e au ra tei niuhia nā rāpae noa i niʼa i te parau-tiʼa ’e te aroha e ʼere rā. E au ra nō te mau vahi atoʼa teie mau poroʼi : Te mau veʼa, te fare haʼapiʼiraʼa, e te tae noa atu i te mau hoa piri. Noa atu ē ’ua ʼite au e ’aita teie mau haʼapiʼiraʼa ʼa te taʼata i tiʼa i te ʼopuaraʼa ʼa te Atua, ’ua hinaʼaro vau i te pāturu i teie mau manaʼo ʼāpī ʼo te ao ’e te ʼĒkālesia. ’Aita i maoro roa ’ua ʼite au e ʼore te taʼata e tiʼa ia faʼaroʼo i te fatu toʼopitiʼ (Mataio 6:24) ʼe eʼita e tiʼa iāʼu ’ia tiʼaturi i te paʼari ʼo te taʼata nei. ’Ua tātara te Metua i te Ao ra i tōʼu mau fēʼaʼa nā roto i te mau pāpaʼiraʼa moʼa ʼe ’ua faʼahau i tōʼu feruriraʼa ’e tōʼu ʼāʼau. ’Ei hopeʼaraʼa, ’ua haʼapūaihia tōʼu ʼiteraʼa pāpū ’e ’ua riro mai au ’ei taʼata pāpū i te pārururaʼa i te mea tāʼu i ʼite e mea mau ».
ʼA faʼananea i te mau hōroʼa ’e te mau tālēni
E nehenehe atoʼa tō ʼoutou haʼamaitaʼiraʼa patereāreha e faʼahiti i te mau hōroʼa ʼe te mau tālēni tā te Fatu i hōroʼa nō ʼoutou nō te paturaʼa i Tōna ra bāsileia. Mai te mea e faʼahiti tō ʼoutou haʼamaitaʼiraʼa i te hōʼē tālēni ʼo te ore i matauhia e ʼoutou, nō te mea paha ïa e ʼaita ā ʼoutou i ʼite atura ʼaore rā i faʼananea ā i teie tālēni. Nā roto i te tūtava-itoito-raʼa ’e te tauturu ʼa te Fatu, e nehenehe ia ʼoutou ’ia tupu ʼe ’ia faʼaʼohipa i teie tālēni ʼe te tahi atu ā.
E tauturu te faʼananearaʼa i tō ʼoutou mau tālēni ia ʼoutou ’ia ʼite i te mau mea taʼa ʼē tā ʼoutou e hōroʼa nō te ʼohipa ʼa te Fatu. ’Ua feruri hōhonu o Johanna Blackwell nō California, Marite, i te mau hōroʼa ʼe te mau tālēni i roto i tōna haʼamaita’iraʼa ’ia faʼahema-anaʼe-hia ʼoia i te faʼaau iāna ia vetahi ’ē : « ’Ia taiʼo anaʼe au i te mau parau i roto i tōʼu haʼamaitaʼiraʼa patereāreha, ’ua faʼahaʼamanaʼohia vau e ’ua haʼamaitaʼihia vau e te mau hōroʼa i hinaʼarohia e au nō te haʼavī i te mau tāmataraʼa ’e ’ia rave i te ʼohipa nō te haʼapeʼepeʼeraʼa i te ʼohipa ʼa te Fatu.
« Tē faʼaʼite mai nei tōʼu haʼamaitaʼiraʼa i tōʼu ’aravihi i te here, i te faʼaʼore i te hapa, ’e te tītauraʼa i te itoito ’ia ’āmui atu i te feiā na piha’i iho iāʼu. ’Ia faʼaʼohipa anaʼe au i teie mau hōroʼa, e haʼamaitaʼi te Fatu iāʼu ma te hōʼē hinaʼaro rahi ’ia fārerei ʼe ’ia tūʼati atu i te mau taʼata ʼe te mau taʼere ʼāpī. Nō reira, ’ua tupu tōʼu ʼiteraʼa pāpū i te rahi ē e mau tamariʼi anaʼe tātou pāʼātoʼa nā te hōʼē Metua Here i te Ao ra, ’e ’ua nehenehe iāʼu ’ia tāvini ia vetahi ’ē ’a tūtava ai tātou ’ia riro mai te Mesia ra te huru ».
ʼA māʼimi i te mau haʼamaitaʼiraʼa i fafauhia
Te hopeʼa, e heheu mai tō tātou mau haʼamaitaʼiraʼa patereāreha i te mau haʼamaitaʼiraʼa tei fafauhia mai e te Metua i te Ao ra ia tātou mai te mea e haʼapaʼo noa tātou. ʼAita e haʼapāpūraʼa nō niʼa i te taime e tupu ai teie mau fafauraʼa, e nehenehe rā ia tātou ’ia ʼite ē ’a ora noa ai tātou i te ʼevanelia ma te haʼapaʼo, e tupu ïa te reira, i roto ānei i teie oraraʼa aore rā i mua nei.
’Ua tiʼaturi Sergio Gutierrez nō Nevada, Marite, i te hōʼē fafauraʼa i roto i tōna haʼamaitaʼiraʼa patereāreha i te mau taime atoʼa e haʼapeʼapeʼa ʼoia nō niʼa i tāna mau ʼopuaraʼa ʼohipa i mua : « Tē haʼapeʼapeʼa nei au i te tahi mau taime nō niʼa i te pāpū ʼore o tōʼu oraraʼa i mua, tē vai nei rā te hōʼē fafauraʼa i roto i tōʼu haʼamaitaʼiraʼa patereāreha ʼo te faʼahau i tōʼu manaʼo. E tauturu teie nei fafauraʼa iāʼu ’ia ʼite ē ’ia tāmau anaʼe au i te rave itoito i te ʼohipa ’e i te haʼapaʼo, e fāriʼi ïa vau i te mau rāveʼa ’ia nehenehe iāʼu ’ia faʼa’amu i tōʼu ʼutuāfare ʼe ’ia patu i te ʼĒkālesia. ’Aita ā vau i ʼite pāpū e aha tōʼu tōroʼa ʼohipa tāʼu e hinaʼaro i te tītau, nā teie rā fafauraʼa i hōroʼa mai iāʼu te faʼaroʼo ’e te tiʼaturiraʼa ».
Mai te mea noa atu ē te uiui ra ʼoutou e aha ïa te hinaʼaro o te Metua i te Ao ra nō ʼoutou, ’aita ʼoutou i vai ʼoutou anaʼe. ’Ua ʼite te Fatu ē e faʼaruru ʼoutou i te mau ’ēʼa huru rau e nehenehe tā ʼoutou e rave i roto i tō ʼoutou oraraʼa, nō reira ʼOia i hōroʼa ai ia ʼoutou te hōʼē hōhoʼa fenua ’ia vai ’āfaro noa tō ʼoutou oraraʼa i niʼa i Tāna ʼevanelia. Eʼita te mau haʼamaitaʼiraʼa patereāreha e rave i tā tātou fa’aotira’a nō tātou, e nehenehe rā tā rātou e arataʼi ia tātou nō tā tātou iho heheuraʼa. Nā roto i tō tātou mau haʼamaitaʼiraʼa patereāreha, ’ua faʼaʼitehia ia tātou nāhea tātou e ō ai i roto i te ʼopuaraʼa a te Fatu ’ia haʼaputuputu ia ʼĪserāʼela nā roto i te haʼapiʼiraʼa mai i tō tātou ʼōpū ; ’ua hōroʼahia ia tātou te aʼo nō tātou iho, te mau faʼaararaʼa, ʼe te mau fafauraʼa; ’e ’ua haʼapiʼihia tātou nō te mau hōroʼa ʼe te mau tālēni taʼa ʼē tā te Metua i te Ao ra i hōroʼa nō tātou nō te tavini Iāna. ’Ia tāmata anaʼe ʼoutou i te ora mai te au i te tāʼātoʼaraʼa o teie nei mau tufaʼa o tō ʼoutou haʼamaitaʼiraʼa patereāreha, e nehenehe ïa ia ʼoutou ’ia ʼite ē ’ua ʼāfaro tā ʼoutou mau faʼaotiraʼa i te hinaʼaro ʼo te Fatu nō tō ʼoutou oraraʼa.