Pito Ka Pamaagi aron Mobati sa Diwa sa Pasko
Ang kabuhong ug ang mga kalingawan makalingaw, apan ang sadya nga pagpangalagad maoy yawe aron mabati ang diwa sa Pasko.
Mga paghulagway pinaagi ni Michael Mullan
“Sama gyud og dili Pasko.”
Nakahunahuna ka na ba og sama niana? Tingali gibati nimo kana karon gayud: Bisan giunsa nimo sa pagpalanog ang mga kanta sa Pasko o sa kadaghang cookies sa Pasko ang imong gitulon, wala lang gyud ka mobati sa diwa sa Pasko.
Kon daw nahisama ka niana, o kon ikaw naglantaw karong tuiga nga mapun-an ang imong pagbati sa diwa sa Pasko, padayon sa pagbasa!
Si Presidente David O. McKay (1873–1970) mihimo niini nga yano: “Ang espiritu sa Pasko mao ang espiritu ni Kristo, nga mopalambo sa atong kasingkasing sa inigsoong gugma ug pakighigala ug modasig kanato alang sa mabinationg pagserbisyo.”1 Si Bonnie L. Oscarson, kanhi Kinatibuk-ang Presidente sa Young Women, miuyon: “Ang paagi aron molambo ang diwa sa Pasko mao ang pagkamanggihatagon ngadto sa uban ug pagsebisyo.”2
Ang pagpangadorno sa mga kahoy ug pagpanghatag og mga gasa maoy mga pamaagi sa pagsaulog sa Pasko, apan ang yawe aron mobati sa diwa sa Pasko mao ang pagpangalagad sa uban. (Basaha ang milabay nga artikulo, “Pagpangalagad sama sa Gibuhat sa Manluluwas,” alang sa pagkat-on og daghan pa mahitungod sa pagpangalagad.)
Ug maayong balita! Adunay daghang talagsaong mga paagi sa pagpangalagad sa uban atol sa Kapaskohan. Sulayi ang pipila niini, ug sa dili madugay bation nimo ang kainit sa Espiritu ug mobati nga mas duol sa Manluluwas—ang tinuod nga espiritu sa Pasko!
1. Bisitaha ang nagmasulub-on.
Hunahunaa kadtong imong mga nailhan kinsa posibling walay pamilya ug mga higala nga ikauban atol sa mga adlaw sa pasko. Ikonsiderar ang pagbisita og tawo nga gulang na o tawo nga bag-o lang nimong nasilingan. Ang pagtabang bisan sa usa lamang ka tawong nagmasulub-on dako kaayo nga impluwensya. Sama sa gipasabut ni Elder David A. Bednar sa Korum sa Napulog Duha ka mga Apostoles, nga si Kristo “nangalagad sa mga ‘tawo,’” pinaagi sa tinagsa-tagsa nga pagtabang.3 Makabuhat kita sa sama nga paagi.
2. Lakaw og panaygon.
Nahibalo ba mo nga ang atong propeta ganahan og mga daygon sa Pasko? Lanog man kini nga pagpanganta sa “makalingaw nga yanong mga kanta bahin ni Santa” o matinahurong pagpanganta sa paborito ninyong mga himno mahitungod sa Manluluwas, si Presidente Russell M. Nelson mituo nga ang pagpaambit og musika ngadto sa uban usa ka talagsaong paagi sa “tinuoray nga pagbati sa tinuod nga diwa sa Pasko.”4
3. Tan-awa ang imong palibut sa dili ka pa motan-aw sa imong celfon.
Dili kinahanglang anaa sulod sa imong bulsa sa tibuok adlaw ang imong celfon, apan ang pagkaanaa nimo ug pag-focus niadtong mga anaa sa imong palibut usa ka maayo kaayong paagi aron mabatyagan og balik ang diwa sa Pasko.
“Imbis mopunit mo sa celfon aron motan-aw unsay gibuhat sa inyong mga higala, hunong, tan-aw sa palibut, ug pangutan-a ang inyong kaugalingon, ‘Kinsa ang nanginahanglan nako karon?’” miingon si Sister Oscarson. “Tingali ikaw ang hinungdan sa pagtimbaya ug pag-impluwensya sa kinabuhi sa usa ka higala o sa paghatag og pagdasig sa usa ka higala kinsa hilum nga nakigbisog.”5
4. Buhata ang pipila ka ekstrang mga bulahaton.
Ang paglimpyo ba sa balay, pagtanyag nga moatiman sa bata, o ang paghimo og bisan unsang ekstrang buluhaton sa balay makatabang gayud aron mobati ka sa diwa sa Pasko? Kon buhaton nimo kini uban ang tukma nga katuyoan, makatabang gayud kini! Samtang nanarapo ka o nanglimpyo, paghunahuna kabahin sa tawo nga imong giserbisyuhan. Hunahunaa ang dakong kalipay sa imong pamilya o mga higala tungod sa imong gasa sa pagkugi og trabaho!
5. Panghatud og pipila ka ganahang mga pagkaon nga pahalipay Pasko!
Sa paghisgot bahin niadtong mga cookies sa Pasko nga imong gitulon bag-o lang, unsa kaha og sa kadali magluto ka sa paborito nimong mga pagkaon nga pahalipay sa Pasko? Tingali ikaw mismo nakakaon na og pipila niini (o mas daghan pa), apan ang yawe aron mobati sa diwa sa Pasko dinhi mao ang pagpanghatag niini.
6. Mopaambit og video sa Pasko.
Mopaambit og usa ka mensahe sa Pasko diha sa social media. Basaha ang mga Mormon Messages sa Pasko alang sa pipila ka mga ideya. Imo usab nga mapasanag ang adlaw sa usa ka tawo pinaagi sa pagpaambit og mga video sa Simbahan nga Pangpasko nga anaa sa Mormon.org. Imo kining mapadala ngadto sa imong higala o ipaambit kini sa kaugalingon nimong pahina.
7. Sekretoha ang paghimo niini.
Unsa ka daghan ang mahimo nimong sekreto nga pagserbisyo nga dili ka masakpan? Pwede kang magbilin og mga grocery o mga gasa dapit sa iyang pultahan, magbutang og mubo nga sulat sulod sa bulsa sa jacket—apan siguroang walay mahibalo nga ikaw ang mihimo niini! Hinumdumi “[I]tago ang imong limos” (Mateo 6:4).
Pagpangalagad sa Pasko
Ang mga mokidlap-kidlap nga suga ug daghang mga adorno makatingala ug makalingaw sa imong pagsaulog sa pasko, apan kon hisgutan ang pagbati sa tinuod nga espiritu sa Pasko, ang sadya nga pagpangalagad mao ang yawe.
“Aron tinud-anay nga makasaulog sa pag-anhi [sa Ginoo] sa kalibutan, kinahanglan gayud kitang mobuhat sama sa Iyang gibuhat ug motabang dala ang kapuangod ug kalooy sa atong isig katawo,” si Elder Dieter F. Uchtdorf sa Korum sa Napulog Duha ka mga Apostoles miingon. “Mahimo nato kini kada adlaw, pinaagi sa pulong ug buhat. Himoon nato kining tradisyon sa Pasko, bisan asa pa kita—nga mahimong mas mabination og gamay, mas mapasayloon og gamay, dili kaayo mohukom, mas mapasalamaton, ug mas manggihatagon sa pagpaambit sa atong kaabunda ngadto sa nanginahanglan.”6