Te Euangkerio: Te Kawai ae Beebete ni Karekean te Maiu ae Akea Tokina
Lori Fuller bon te eteta ibukin te Friend maekatiin. E tatangira ni karekei baen aika boou, n ongongora nakon rongorongo iaon te rerio, ao ni kukanii amwarake man aba nako n te aonaaba. N tabetai e korei bwaai.
Ko a tia n iangoa aron kawakinan tuua e kabebetea riki maium?
N te namwakaina ae nako, ngai ma raraou tabeman ti karakina kanoan ara wiiki. Temanna te rao e tibwaia bwa e korakora uotana ni kamarurungan tinana man kabonganaan te kamanging. Teuaei e uarereke riki nakoiu, ao anne taraan te mwakuri ae rang rawawata nakoina.
Imwiina n te tairiki anne, e a bitaki te maroro nakon aron te kabanemwane iaon te moko ao aron temanna ae ti kina e a tia ni kabanea te bakete n tikareti n te bongina. (Karaoa te numera; bon te mwane ae mwaiti!) E kataia ni katokia ao neiei e a rinanon kangaanga ni katokan te moko. Natina te mwaane e a rang kukurei ngkai e a katokia. Tamana e a tia ni mate man aki kabonganaan raoi te turaki, are e a karika te kakamaaku iroun te ataei aei ni kabonganaan aekakin nako te turaki.
N tokina, ara maroro e a toki iaon te kobee—mwaitira nimakina irouia aomata ni katoa ingabong (ao ni bwakantaai ao n tabetai n te tairiki) ao aroia n aki kabongana ngkai a bon aki kona ni kabanemwane iaona ni katoabong.
Ngke I buti n okira mweengau, n iangoi maroro aikai ni kabane, e reke n au iango, “Taeka ni Wanawana bon aan te kawai are kabebetea maiun te aomata ae moan te bubura.” (Ngkana ko aki ataia, “kabebetean te maiu” bon te kawai ae e na kanakoraoa riki maium, ni maiuraoi riki iai, ao a bati riki. Ngke e kabwarabwara temanna iaon raain, kabebetean te maiu bon te bwai ae ataaki bwa “te iango ae tamaroa.”) Kaanga ai aron ae taekinna te Atua, “Aio te kawai ae kona kawakina iai am mwane, ni buokiko bwa ko na marurung, kawakiniia am ataei, ao n totokoi karawawata n te namakin, n ikotaki ma anuam ao tabeman aika kareke.” Kaanga ai aron ae te Atua E rinanon kaangaanga ni kabane ake ti kaaitarai ao e anganiira te kawai n totokoi iteran mwaitiia. …
Man ana tua nako te Atua, iai inaomatara n rineia bwa ti na iria ke ti na katinanikui. Ma ngke I iangoa Taeka ni Wanawana bwa te bwariko ni kairi mairoun te Atua are e uaia ni kataniira man kaangaanga aika a mwaiti, I iango, “Tera ngke arona bwa ni kabane ana tua te Atua a bane ni mwakuri n te kawai anne?” Ao ngkana tao Tamara are i Karawa ae tatangira, are e a tia ni rinanon te maiu aei ao ana kangaanga, e a tia n anganiira te boki ni kairi bwa e na buokiira n rinanon te maiu ni kauarerekea te maraki? Ao ngkana E anganiira ibukina bwa E tangiriira ao e tangiria ni kataniira?
Ko tangiria n rauaki ni bwaai ake ko karekei, ni kukurei ao ni kakaitau? “Ko na tai mataiakina ana auti raom” (Te Otinako 20:17).
Ko tangiria n totokoa te bure, kabureaki, kabwakamwane ibukin te kaotinakoaki ao roo ibukin boowi? Tangiria ni kawakina aia onimaki ao aia karinerine aomata—ao am mwakuri? “Ko na tai ira” (Te Otinako 20:15).
Tangiria n tiku ni kaan nakon te Atua bwa E aonga ni kona ni kairiko ao ni buokiko ni uoti uotam? “Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea” (Mataio 22:37).
Te rinan e reitinako ma e reitinako. Ni kabane tuua nako a kona ni kawakiniira man te maraki n nano, kabebetei maiura, kararoaira man te kangaanga, e na buokiira ni karekea te rau. Ao ni kabane ma te kabanemwane iai ae rang karako ke aki angaraoi. (Ao akea te kabanemwane iai ae kabwarabwaraaki!)
Ma te koaua I aki tangiria ni kauarerekei ana tua te Atua bwa tii bwaai ni kairi ke bwaai ni ibuobuoki ni kabebetean te maiu. A bubura riki nakon akanne. Ma a bon rang ni beebete naba. Tamara are i Karawa e aki kona ni kataniira man bwaai ni kabane. Ma ngkai te karo ae tatangira, E tangiria ni katauraoira ao ni kataniira man mwiin ara rinerine—man kairakira nakon ara rinerine aika a tamaroa riki.
E koaua, ti kona ni kawakin tuua ao e na bon riki naba bwaai aika aki raoiroi. Ngaia are e aera ti na tabe iai?
Ibukiina bwa ti aki kona n ataia bwa ti bon rang kawakinaki rinanon ara ongotaeka. Ibukina bwa e buokiira ni kainaomataira man te maiu ke ikoakin nanora. Ibukina bwa te ongotaeka e buokiira ni kaniira nakon te Atua. Ibukina bwa e karokoira n te tai n rairannano ngkana ti rinea ae kairua. Ibukina bwa ti onimakina te Atua bwa e ata aron kakabwaiakira ao kawakinara.
Te rinan e reitinako ma e a reitinako. E rang n abwabwaki riki nakon rinan ibukin aki kani kawakinan tuua.
Ibukin ae tamaroa ke ae buakaka, te Atua e anganai bwa N na rinea arou n ongotaeka are I tangiria. I kan kaan riki nakon mwaitin kaukan nanou nakon kakabwaia ake E katauraoi ibukiu. Ngaia are bukin tera ti kawakin tuua? Ibukina bwa I tangira maiu bwa e na tangaina nakon ana ibuobuoki te Atua are e kataia n anga.