Nganong Dili Na Ako Mahadlok nga Magpakigtambag kabahin sa Kahimsog sa Pangisip
Ang tagsulat nagpuyo sa Virginia, USA.
Ang pagpangayo og tabang nga akong gikinahanglan dii timailhan sa kahuyang o kapakyasan.
“Kinahanglan kang makigsulti sa magtatambag sa kahimsog sa pangisip.”
Kini nga tambag miabut nga usa ka dako nga surprisa. Bag-o lang nakong gisultihan ang usa ka suod nga higala mahitungod kon unsa ko ka kapoy sa pag-apil sa inila nga programa sa accounting, sa pagmintenar og relasyon, ug pagpakig-date isip usa ka bag-ong return missionary. Wala gyud nako ikonsiderar ang ideya sa therapy, ug akong gibati nga ang pagpakigsulti sa usa ka magtatambag alang lamang sa mga tawo kinsa adunay dakong mga problema o huyang kaayo nga moatubang sa mga hagit sa ilang kaugalingon. Ang akong higala adunay mga maayo lamang nga mga butang nga gisulti mahitungod sa iyang kaugalingong kasinatian sa pagpakigsulti ngadto sa usa ka magtatambag, mao nga nagsugod ko sa pagkonsiderar niini.
Sa wala madugay ang akong kabalaka migrabe. Human sa walay kinatulgan nga mga gabii sa pagkabalaka, nakahukom ko nga magpaiskedyul og appointment. Gikulbaan ko mahitungod kon unsa unyay isulti sa ubang mga tawo kon sila masayud nga ako makigkita og usa ka magtatambag, apan nianang puntuha ang akong kabalaka nakaapekto sa akong abilidad sa paglihok, mao nga miadto ko.
Pagbuntog sa Kabalaka
Didto sa appointment, ang magtatambag nangutana og daghang mga pangutana nga nakatabang kanako sa pagtubag sa akong kaugalingong mga pangutana. Ang magtatambag wala mohatag kanako og madyik nga kasulbaran sa akong mga pakigbisog. Wala usab ako niya gitratar nga usa ka buang—nakakita na siya og daghang mga tawo nga susama sa akong mga pakigbisog. Sa pipila ka paagi, sama kini nga miadto og medikal nga doktor. Usa siya ka propesyonal nga dunay kasinatian sa pagdayagnos sa problema ug adunay kahibalo sa pagtudlo nako unsaon sa pagpugong ug pagtambal ang kabalaka.
Apil sa ubang mga sugyot, ang magtatambag misugyot nga akong isulat ang akong mga pagbati ug mga hunahuna sa akong journal. Dako kaayo kini nga tabang sa pagbuntog sa akong kakulba. Nagsige usab ako og ehersisyo, naggahin og panahon uban sa mga higala ug pamilya, nagkaon og mahimsog nga pagkaon (o sama ka himsog sa usa ka tawo sa kolehiyo kinsa nagluto alang sa iyang kaugalingon), nagtuon sa mga kasulatan, nagsimba, ug nag-ampo.
Human makamiting sa magtatambag sa pipila ka higayon, duha ka butang ang nausab nako: Una, ako adunay bag-o, mas himsog nga panglantaw sa akong mga kakulba, sa akong kaugalingon, ug sa ubang mga tawo, ug ikaduha, gibati nako nga ako adunay mga himan nga makatabang nga akong magamit sa umaabut nga mga sitwasyon nga makaingon sa kakulba. Wala ako hingpit nga maayo sa kakulba, apan akong gibati nga makabuntog ra niini kon kini moabut na usab. Sukad niadto, wala na ko mobalik ngadto sa magtatambag, apan kon gikinahanglan nako, dili na ako mabalaka nga mangayo og tabang—akong nakat-unan nga walay rason nga mag-antus sa hilom o maulaw sa pagpangayo og propesyonal nga tabang alang sa isyu sa kahimsog sa pangisip.
Paghunong sa Pagkaulaw
Subo lang, adunay daghang mibati nga ikaulaw ang pagpatambal sa kahimsog sa pangisip, apan tingali mao kana tungod kay ang pipila wala makasabut nga ang pagpakigsulti sa propesyonal nga kahimsog sa pangisip sama ra ka importante sa pagpatambal sa bisan unsang pisikal nga sakit. Si Elder Jeffrey R. Holland sa Korum sa Napulog Duha ka mga Apostoles miingon: “ Kon kamo may appendicitis, ang Dios nagpaabut nga kamo mangayo og panalangin sa priesthood ug magpa-check up sa pinakamaayong doktor. Mao usab sa mga problema sa emosyon. Ang atong Amahan sa Langit naglaum nga kita mogamit sa tanang talagsaong gasa nga Iyang gihatag niining mahimayaong dispensasyon.”1
Ang mga panginahanglan sa kahimsog sa pangisip usab wala mahibaloi sa daghang mga tawo. Dili sayon hisgutan sama sa hilanat og nabalian og bukog. Apan kini sa gihapon mahitabo sa kasagaran. Ang World Health Organization mibana-bana nga daghang mga tawo nga adunay grabe nga mga problema sa kahimsog sa pangisip wala matambali: mga 35 ug 50 porsyento sa malamboon nga mga nasud ug 76 ngadto sa 85 porsyento sa naglambo nga mga nasud.2
Ang pagpangayo og tabang nga imong gikinahanglan dili timailhan sa kahuyang o kapakyasan. Ang Langitnong Amahan gusto nga kita magmahimsog, sa pangisip ug sa pisikal, ug mihatag nato og daghang “kahibulongang mga gasa” aron matabangan kita nga makasugakod sa pangisip ug emosyonal nga mga hagit sa pagkamortal, lakip sa:
Kahimsog sa Pangisip
Pag-ehersisyo
Mga Higala ug pamilya
Pagsunod sa ebanghelyo
Katulog og sakto
Mga lider sa Simbahan
Pagserbisyo sa uban
Usa ka propesyonal sa kahimsog sa pangisip
Himsog nga pagkaon
Dili kita makahimo sa pagbuntog kanunay sa hingpit sa tanang mga hagit sa kahimsog sa pangisip, ug sa kasagaran dili kini sayon, ug walay kasulbaran alang sa tanang mga tawo sa tanang sitwasyon. Apan kon buhaton nato ang labing maayo sa pagtabang sa atong kaugalingon gamit ang mga himan nga gihatag sa Langitnong Amahan kanato, ang Manluluwas motabang nato nga makadaug sa atong mga alantuson uban sa kasayon (tan-awa sa Mosiah 24:15), ug kita mapanalanginan og kalig-on ug paglaum alang sa atong mga paningkamot.