ʻIkai Lahi Feʻunga e Houa ʻo e ʻAhó? Ko ʻeni ʻa e Founga ke Fakaʻaongaʻi lelei ai Ho Taimí
ʻIkai Lahi Feʻunga e Houa ʻo e ʻAhó? Ko ʻeni ʻa e Founga ke Fakaʻaongaʻi Lelei ai Ho Taimí
ʻI heʻetau palani ʻetau moʻuí mo fakaʻaongaʻi fakapotopoto hotau taimí, ʻe tāpuekina kitautolu ʻe he ʻEikí mo fakaivia kitautolu ke ngāue lelei ange ʻi Hono puleʻangá. ʻE lava ke tokoni hono fakaʻaongaʻi e ngaahi tefitoʻi moʻoni ko ʻení* ke tau moʻui ʻaonga mo teuteuʻi kitautolu ki he hakeakiʻí.
Vahevahe iiki e ngaahi taumuʻá ki ha ngaahi konga ʻe mapuleʻi lelei angé.
Ko e taumuʻa tefito kotoa pē ʻoku tau fokotuʻu, ʻe lava ke tau vahevahe ia ki ha faʻahinga taumuʻa ʻe tolu. Hili iá te tau lava leva ʻo fakapapauʻi e ngaahi ngāue fakaʻaho ʻoku fie maʻu ke tau fai ke fakahoko ai ʻetau ngaahi taumuʻá.
-
Ngaahi taumuʻa taimi lōloa. Ko e ngaahi taumuʻa tefitó ʻeni. Hangē ko ʻení, te tau lava ʻo fokotuʻu ha taumuʻa ʻo pehē “maʻu ha ngāue maʻuʻanga moʻui fakapalofesinale te u lava ai ʻo tokonaki maʻá ku pea mo kinautolu ʻoku ou tokangaʻí.”
-
Ngaahi taumuʻa lotolotó. Ko e ngaahi taumuʻa pau ange ʻeni ʻokú ne tataki koe ke ke aʻusia hoʻo taumuʻa taimi lōloá, hangē ko e “maʻu ha mataʻitohi mei he ʻunivēsití.”
-
Ngaahi taumuʻa taimi nounoú. ʻE lava ke ke fakakakato e ngaahi taumuʻa ko ʻení ʻi ha vahaʻataimi nounou ʻaupito. ʻI hono fakakakato kinautolú ʻokú ke ngaʻunu ofi ange ai ki hono fakakakato hoʻo ngaahi taumuʻa lotolotó mo e taimi lōloá. Ko ha fakatātā ʻo ha taumuʻa taimi nounoú ko e “ʻoua naʻa teitei liʻaki ha kalasi he semesitā ko ʻení.”
-
Ngaahi ngāue fakaʻahó. ʻOku totonu ke fakaiku e ngaahi meʻa ʻoku tau fai fakaʻahó ki heʻetau fakahoko ʻetau ngaahi taumuʻá. Mahalo ko ha ngāue fakaʻaho ko e “fakakakato e ngaahi ngāue fakaako ʻoku ʻosi ki ʻapongipongí.”
Fokotuʻu e ngaahi taumuʻa ʻi he ngaahi tafaʻaki kehekehe.
ʻE lava ke fakaʻaongaʻi e sīpinga ʻoku ʻoatu ʻi ʻolungá ke fokotuʻu ʻaki e ngaahi taumuʻa ʻi he tafaʻaki kotoa pē ʻo ʻetau moʻuí. Naʻe faleʻi mai ʻa ʻEletā Lōpeti D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá ke tau nofotaha ʻi he ngaahi tafaʻaki ʻe fā ko ʻení:
-
Fakalakalaka fakalaumālié
-
Fakalakalaka fakatuʻasinó
-
Fakalakalaka fakaako, fakatāutaha, mo e ngāue maʻuʻanga moʻuí
-
Fakalakalaka ʻi he hoko ko ha tangataʻifonuá mo e mo fakasōsialé.1
ʻI heʻetau fokotuʻu e ngaahi taumuʻa ʻi he ngaahi tafaʻakí ni, ʻoku totonu ke tau manatuʻi maʻu pē e faleʻi ko ʻeni meia Palesiteni M. Lāsolo Pālati, ko e Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá: “Fokotuʻu ha ngaahi taumuʻa ʻoku napangapangamālié—ʻikai ke fuʻu lahi pe fuʻu siʻisiʻi, pea ʻikai fuʻu maʻolunga pe fuʻu maʻulalo. Hiki hifo hoʻo ngaahi taumuʻa te ke lava fakahokó pea ngāueʻi kinautolu ʻo fakatatau ki honau mahuʻingá. Lotua ha tataki fakalangi ʻi hono fokotuʻu ho taumuʻá.”2
Te tau hoko ai ‘o anga faka-Kalaisi ange.
‘I heʻetau fokotuʻu e ngaahi taumuʻa māʻoniʻoní mo puleʻi lelei hotau taimí ke fakahoko kinautolú, ʻoku tau hoko ange ai ʻo hangē ko Sīsū Kalaisí. Naʻe pehē ʻe ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku ou fakamālō kia [Kalaisi] ʻi heʻene puleʻi fakaofo e taimí, ʻo ʻikai teitei ngāue hala ʻaki ha momeniti, kau ai e ngaahi momeniti ʻo e fakakaukaulotó. Naʻa mo e ngaahi momeniti kotoa pē ʻo ʻene moʻuí naʻe fakahaaʻi ai hono lakanga tauhí.”3