Kappukōt Aenōm̧m̧an n̄an Eok make im Ro jet ilo Iien Jorrāān ko
Erkein rej rualitōk wāween ko n̄an jipan̄ kwe make im ro jet en̄jake aenōm̧m̧an eo n̄e ej pen mour.
Bwebwenato in mour im pija ko jān Getty Images
Jet iien mour ej āinwōt tarpok im kapokpok. Komaron̄ inepata kōn abņōņō ko an baam̧le, ājmour, jorrāān ko ilo jikin jikuuļ, ak jabdewōt oran iien ko rekakkure ilo laļ in rainin. Ekōjkan ad loe aenōm̧m̧an eo an juon make ilo juon laļ eo ejorrāān? Men̄e ejabwe aenōm̧m̧an eo am̧ ej itok jān m̧akūtkūt ko ejjeļo̧k am̧ maron̄ ie ak jān men ko komaron̄ kareeli im ukōti, erkein jet iaan ļōmņak ko n̄an jipan̄ eok pukōt aenōm̧m̧an eo itulowa kōn Jisōs Kraist.
4 Wāween n̄an Kappukōt Aenōm̧m̧an n̄an Kwe make
-
Kalimjōk wot indeeo
Epen am nej en̄jake aenōm̧m̧an eļan̄n̄e kwoj kalimjok wōt inepata ko an jidik wōt iien. Bōtaab n̄e kwoj kalimjōkļo̧k men ko reļļapļo̧k, karōk in m̧ōņōņō eo an Anij, komaron̄ loe aenōm̧m̧an ilo am̧ jeļā bwe ta eo ekōmettak kiiō eban aitok an pād. N̄an waanjon̄ak, tam̧peļ eo ej jipan̄ kōj kalimjōk wōt mour indeeo. Būreejtōn Gordon B. Hinckley (1910–2008) eaar ba bwe ilo tampeļ eo “kom̧ naaj jeļā juon aenōm̧m̧an me kom̧ij jamin naaj bar loe jabdewōt jikin.”1
-
Kōtļo̧k ta eo ejjeļo̧k am̧ maron̄ ioon
N̄e juon men ilikun maron̄ eo am̧ ej bōkļo̧k aenōm̧m̧an eo am̧, ekapopo n̄an en̄jake ejjeļo̧k kōjatdikdik ak illu. Bōtaab ejjab jipan̄ n̄an kalimjōk men ko kojjab maron̄ ukōti. Ijello̧kin, kepaakļo̧k Rilo̧mo̧o̧r eo n̄an kappukōt aenōm̧m̧an ilowa jekdo̧o̧ņ n̄e kwoj en̄jake bwe ejjab em̧m̧an an laļ in kōm̧m̧an n̄an kwe. Em̧ōj An kar kallim̧ur n̄an jilkinwaj Rikaenōm̧m̧an eo, Jetōb Kwojarjar (lale Jon 14:26–27).
-
Jeorļo̧k an ro jet bōd
Ekkā wōt men eo epen tata n̄an bōjrak inepata kake ej nana eo kwoj en̄jaki ke juon eaar bōd ņae eok. Bōtaab Elder Dieter F. Uchtdorf jān Doulul eo an Rijilōk ro Jon̄oulruo ekar katakin: “Jenaaj bōk lan̄lōn̄ eo an jeorļo̧k bōd ilo mour ko ad make eļan̄n̄e jej m̧ōņōņō in leļo̧k lan̄lōn̄ in n̄an ro jet. Āinwōt juon tōprak, Jetōb eo an Irooj enaaj kaobrak ad kōn lan̄lōn̄ in koba ippān aenōm̧m̧an eo an jerbal jim̧we (lale Mosaia 4:2-3).”2 Oktakļo̧k n̄an Rilo̧mo̧o̧r eo emaron̄ jipan̄ kanemkwoj eok jān edodo ko an en̄jake im kobrak kōn aenōm̧m̧an.
-
Ukweļo̧k im lōke ilo Kraist
Jekdo̧o̧n ta ej em̧m̧an eo ej waļo̧k ilo mour eo am̧, ineek eddo eo an jerawiwi enaaj aolep iien enaaj bōk aenōm̧m̧an eo am̧. Jet iien jej aikuj bisop eo ad n̄an jipan̄ kōj lukkuun ukweļo̧k. Bōtaab jej aolep aikuj ukweļo̧k aolep raan im, kōn Pinmuur eo an Jisōs Kraist, erom erreo jān aolep men ko me rej bōbrae kōj jān ad erom āinwōt E.
4 Wāween ko n̄an Jipan̄ Ro jet Kappukōt Aenom̧m̧an eo
-
Kwaļo̧k kōn gospel eo an Jisōs Kraist
Āinwōt ad maron̄ lo aenōm̧m̧an n̄an kōj make jāņ kalimjōk wōt Rilo̧mo̧o̧r eo, jemaron̄ bar ba Kajien n̄an ro jet āinwōt “eo ej rikajutak aenōm̧m̧an” (Mosaia 15:18). N̄an waanjon̄ak, kajjieon̄ kwaļo̧k juon eoon ak naan jān kweilo̧k eo eļap me eaar jipan̄ eok ekkatak eļapļo̧k kōn Jisōs Kraist.
-
Kwon juon rikōm̧m̧an aenōm̧m̧an
Jipan̄ ro m̧ōttam̧ im ro jeim im jatūm̧ ņa mejļan tarpok ko. Āinwōt Antai-Nipai-Liai ro ilo bok in Alma, jemaron̄ kalbwin kein tariņae ko—kein tariņae ko āinwōt ruruwe, ukōt nana n̄an nana, ak ļōm̧ņak kōn juon make—im jānij n̄an kein jerbal ko an aenōm̧m̧an: kōnono ilo jouj, pokake kein ko an Anij im jeorļo̧k an ro jet bōd (lale Alma 24:19).
-
Kwon juon riron̄jake eo em̧m̧an
Jet iien armej ro rej apan̄ rej aikuj kōnono ilo ejjeļo̧k ņojak kōn ļōm̧ņak ko aer im en̄jake ko ijello̧kin dāpiji wōt ņai itulowa. Jejjab aikuj ņa mejļan inepata ko aer n̄an er, ak jemaron̄ ron̄jake abūņōņō ko aer im leļo̧k jipan̄, kwaļo̧k iakwe eo āinwōt an Kraist im meļeļe.
-
Jerbal in karejar n̄an ro ilo ward eo am̧ im jukjuk in pād eo
Komaron̄ bōk kuņaam̧ ilo im̧ōņ kōppād ko an ro ejjeļo̧k m̧weer, jerbal āinwōt juon rijipan̄ katakin eo m̧ōttam̧, ak bōktok m̧ōn̄ā n̄an juon baam̧le kāāl ilo ijo kwoj jokwe ie. Jipan̄ armej kappukōt aenōm̧m̧an eo ilo men ko redik. Ilo an lōn̄ juon jikin n̄an m̧ōn̄ā im kiki ejjab oktak, juon rikatakin eo ļōke, ak juon kallim̧ur bwe juon eo ej kea ewōr juon an kareel ekajoor.
Jisōs eaar kōnono naan in kaenōm̧man kein n̄an aolep ro rej apan̄ n̄an kappukōt aenōm̧m̧an eo: “Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧. N̄a ij lewōj n̄an kom̧, jab āinwōt an laļ lewōj. En jab pok būruemi, im en jab lōļn̄o̧n̄” (Jon 14:26–27). Eļan̄n̄e jej kepaakļo̧k kōj make im ro jet n̄an Jisōs Kraist, jemaron̄ loe aenōm̧m̧an eo jekdo̧o̧n n̄e mour ej pen.