Mekem Ol Desisen: Fridom blong Mekem Joes O Revelesen
Hem we i raet i stap long Yuta, YSA.
Taem we yumi tokbaot ol bigfala desisen, ?hamas nao yumi nidim blong stap dipen long God blong Hem i talem wanem yumi mas mekem?
Pikja i kam long David Green
Evri dei, wanwan long yumi bae i fesem plante desisen. Sam oli ol samting nating, olsem, “?Bae mi werem wanem tedei?” “?Wanem nao mi kakae long lanj taem?” “I stret taem blong pem wan niu trak, o mi save wet longtaem moa smol?” Be plante taem tumas, yumi stap kam blong mekem wan bigfala desisen—“?Bae mi gobak long skul?” “?Bae mi akseptem wok ia?” “?Bae mi muv i go long wan niu siti?” “?Bae mi pem wan haos?” “?Bae mi go long deit wetem man o woman ia?” “?Bae mi maredem man o woman ia?” mo sam moa olsem.
Taem yumi fesem ol bigfala desisen blong mekem, yumi mekem—stret—yumi tekem moa taem blong mekem wan joes. Yumi stap folem advaes we Lod i givim long Oliva Kaodri long Doktrin mo Ol Kavenan 9:8–9, we Lod i talem:
“Be, luk mi talem long yu, se yu mas stadi gud long hem insaed long maen blong yu; afta, yu mas askem long mi sapos hem i raet, mo sapos hem i raet, bambae mi mekem jes blong yu i gat wan filing we i hot insaed; from hemia, bambae yu filim se hem i raet.
“Be sapos hem i no raet, bambae yu no gat ol filing olsem ia, be bambae tingting blong yu i fasfas, mekem se bae yu fogetem wanem we hem i rong.”
I nomata se hemia i wan gudfala kaonsel, taem we i kam long taem blong tekem ol bigfala desisen, samtaem yumi stap dipen tumas long pat ia we God i stap talem long yumi wanem we i raet, mo yumi no dipen tumas long pat ia we Hem i stap talem se yumi mas stadi long hem insaed long maen blong yumi. Yumi kam se yumi stap wet nomo se God i konfemem ol desisen blong yumi, mekem se yumi letem ol gudfala janis oli pas long fored blong yumi. Maet bae yumi luksave rol blong fridom blong joes, be yumi fraet tumas blong mekem wan desisen we i save tekemaot yumi long rod ia, yumi aot long “plan” ia we i stap, mo yumi ting se eni nara samting we i no mekem hat blong yumi i wom, o sapos i no gat wan voes we i kam long heven, hemia i minim se desisen blong yumi i rong. Long plante long yumi, presa ia we i stap bitwin fridom blong mekem joes mo revelesen we i blong yumiwan, i lidim yumi i go long wan bigfala kwestin: ?Wanem nao rol blong God blong stap helpem yumi blong mekem ol desisen?
Rol blong God long Taem Yumi Mekem Desisen
Maet kwestin ia, ansa blong hem i kamaot klia tru long stori blong brata blong Jared. I gat wan paten blong stap groap insaed long stori ia, we i stap tijim yumi abaot wei we God i stap wet se bae yumi mekem ol desisen. Afta we Lod i miksim ol lanwis long Taoa blong Babel, Jared i bin askem brata blong hem blong askem Lod sapos bae oli aot long graon, mo sapos i olsem, bae oli go wea (luk long Ita 1:36–43). Brata blong Jared i askem, mo Lod i lidim olgeta i go long so. Taem oli stap travel i go, Lod i toktok long olgeta; Hem i stap long wan klaod mo Hem i stap lidim olgeta long evri wokbaot blong travel blong olgeta. Long en, oli kasem solwota, mo oli stap ia blong fo yia.
Long en blong fofala yia ia, God i talem long brata blong Jared blong bildim ol bigfala sip, mo blong oli rere blong krosem bigfala solwota. Taem brata blong Jared i luksave se, insaed long ol sip ia, i no gat ea, hem i folem sem paten ia blong go long God mo askem wanem hem i mas mekem. Olsem we hem i ting long hem, Lod i ansa, i talem hem ol ditel samting blong mekem ol hol long top mo botom blong sip. Traem luksave paten blong revelesen kasem naoia: God i givim olgeta wan plan, oli askem ol kwestin long rod blong mekem plan ia i kamtru, mo God i talem, mo i givim ditel ansa.
Be afta we oli mekem hol long ol sip, brata blong Jared i luksave se ol sip oli no gat laet. Wan moa taem bakegen, hem i askem God se bae hem i mas mekem wanem. Be God i no ansa, be i askem: “?Wanem nao yu wantem se mi mas mekem blong yufala i save gat laet insaed long ol sip blong yufala?” (Ita 2:23). Hem i nomo givim ol ditel olsem we Hem i bin mekem fastaem, be long taem ia, Lod i bin wet se brata blong Jared bae i disaed wanem blong mekem.
Kaen ansa olsem we i kam long Lod, i wan ansa ia we i had blong andastanem taem yumi stap traem blong mekem wan desisen. Oli tijim yumi blong prea mo wet blong kasem ansa; mekem se, fulap taem yumi stap wari taem yumi no harem wan samting olsem ansa. Plante taem, yumi stap askem yumiwan sapos we, taem i no gat wan klia ansa, ?hemia i olsem “tingting i fasfas” mo i stap soem se joes blong yumi i rong? Sam nara taem, yumi stap askem yumiwan sapos hem i minim se ?yumi no stret mo no gud inaf blong harem ansa, o sapos i tru we yumi stap askem samting wetem “tru tingting”? (luk long Moronae 10:4). Be nambatri ansa, we samtaem yumi no tingting long hem, i we—mebi olsem brata blong Jared, God i stap wet blong yumi mekem desisen blong yumiwan.
Mekem Wan Desisen
I no longtaem i pas, mi fesem wan situesen we i givim jalenj long mi long wei we mi stap tingting long fridom blong mekem joes mo revelesen we i blong miwan. Taem mi stap kam kolosap long en blong graduet long skul, mi gat plante defren wok long plante defren taon, mo mi no save disaed se bae mi tekem wijwan. Olsem brata blong Jared, mi bin gat sam taem we mi bin prea from wan bigfala desisen, mo God i ansarem wetem wan ansa we i stret wantaem. Mi bin dipen long ol fas eksperiens ia, mo mi stat blong prea mo askem God blong helpem mi blong disaed we bae mi tekem wijwan wok. Mi bin mekem pat blong mi tu blong lanem moa abaot wanwan wok we oli open i stap, mo mi bin kaonsel wetem plante pipol. Be i nomata hamas mi prea mo livim kakae, ol heven oli no toktok, mo mi no bin kasem wan ansa.
Las dei blong mekem desisen i stap kam kolosap, mo mi stat blong fraet. Be, hemia i kaen desisen we Lod i mas kea from, so ?from wanem nao Hem i no stap ansa? Mebi Hem i no kea tumas se bae mi jusum wanem wok, be Hem i kea moa se bae mi muv i go long wijwan taon, from se joes ia bae i jenisim laef blong mi. Oltaem nomo Lod i bin kea abaot ol desisen blong mi bifo, ?so from wanem Hem i no kea long desisen ia tu?
Be yet, i nomata se hamas mi traem, i no gat ansa i kam. Mi stat blong askem miwan sapos mi bin mestem rod, mi go longwe long God, mekem nao se Hem i no ansa long mi. Mi stap askem miwan tu se, ?sapos mi no harem i from we, long maen blong mi, mi no bin wantem harem ansa ia? Nao long en, dei bifo las dei i kam, mi bin save se mi mas mekem wan joes, mekem se mi yusum gud jajmen blong mi mo mi bin mekem wan desisen. Long naet ia, prea blong mi i simpol, mi askem sapos Hem i save talem long mi se ansa blong mi i rong o no. Be mi stil no kasem wan ansa, mekem se mi gohed mo mi akseptem wok.
Sam manis afta, mi stil gat kwestin long desisen blong mi, mekem se mi askem wan prishud blesing blong kasem pis long maen blong mi. Long blesing ia, oli talem long mi se mi no bin kasem wan ansa long prea blong mi from se Lod i glad wetem desisen we mi bin mekem. Blesing ia i kam sapotem advaes we mi bin kasem faswan long misin presiden blong mi, we i bin talem long mi se, plante taem, i no rili mata wanem desisen yumi stap mekem. God i wantem yumi blong lanem olsem wanem blong stanap long tufala leg blong yumi, mo disaed wei we bae yumi lidim laef blong yumi. Misin presiden blong mi i rimaenem mi bakegen se God, olsem Papa blong yumi long Heven, bae i no panisim yumi mo tekemaot ol janis we Hem i bin promesem sapos yumi rili stap traehad blong faenemaot wanem blong mekem.
Brata blong Jared, sapos hem i bin wantem, i save givim eni wei blong putum laet long ol sip ia, mo bae i oraet nomo wetem Lod. Poen blong eksperiens ia, i no blong brata blong Jared i mekem fet blong hem i kam strong moa, be tu, i blong hem i lanem olsem wanem blong mekem wan desisen.
Praktis blong Yusum Fridom blong Mekem Joes
Long wan lukluk we i go long taem we i no save finis, blong stap praktisim fridom blong mekem joes, hem i wan pat we i nid blong wanwan man o woman i gro. Sapos yumi no gat hemia, yumi no save mekem ol kaen desisen we bae i helpem yumi kasem ful paoa blong yumi. Blong gro, semmak olsem evri nara samting insaed long gospel, i kam “tijing folem tijing, rul folem rul,” (2 Nifae 28:30). God i wantem yumi blong kam wan pipol we i stap rere, i no wan pipol we i paralaes i stap, mo Hem i wantem luk se yumi stap yusum fridom blong yumi blong mekem joes blong yumi save laef gud.
Taem yumi faenem olsem wanem blong mekem balens bitwin fridom blong mekem joes mo revelesen, bambae yumi gat eksperiens ia blong stap rili gro long saed blong spirit. Hemia nao wanem i bin hapen long brata blong Jared. Afta we hem i tingting long problem blong hem, hem i bin wok blong katem 16 ston aot long wan bigfala ston, mo i bin askem God blong i tajem olgeta ston ia blong oli saen (luk long Ita 3:1–5). Long tetaem ia, God i ansa, mo evri samting i bin jenis. Hem i no harem voes blong God we i kamaot long wan klaod, be brata blong Jared i bin luk Lod, we i bin kamkamaot long hem long bodi blong Hem, be tu, i bin soem long brata blong Jared ol bigfala visen blong wol, mo evri samting we bae i kam yet (luk long Ita 3:6–26.). Hem i posibol se brata blong Jared bae i no rere long saed blong spirit blong kasem visen ia, sapos, long fas ples, hem i no bin gro tru long eksperiens ia blong mekem desisen blong hemwan.
Taem yumi stap mekem ol desisen blong yumiwan,i gud tumas blong folem advaes blong Alma, blong “askem advaes long Lod long evri wok blong [yumi]” (Alma 37:37). Taem we Lod i nidim yumi blong mekem wan spesifik desisen, bambae Hem i letem yumi save mo bambae Hem i stopem yumi blong go long rong rod. Be, yumi tu, yumi mas rere blong stanap mo muv i go fored wetem fet, i nomata se ansa i kam o i no kam. Sapos yumi stap kipim ol kavenan blong yumi, mo stap tru long gospel blong Jisas Kraes, bae yumi gat tras long yumiwan, gas tras long ol stret mo gud desisen blong yumi, mo gat pis ia se Lod i glad wetem ol hadwok blong yumi.