Mared, Mane, mo Fet
Man we i raet i stap laef long Asanti Rijen, Gana.
Fiancée blong mi mo mi i no gat tumas taem bifo mitufala i mared, mo mitufala i no gat mane tu, be mitufala i gat wan samting we i moa impoten: hem i fet.
Mi bin go long yang singgel adalt samit long Kumasi, Gana, i no from se mi nidim wan gelfren—mi bin blokem woman blong mi finis—be from se mi filim se mi nidim moa paoa blong pusum mi, mo samit ia bae i stret ples blong mi karem paoa ia. Yes, i tru, mi kasem ansa long ol prea blong mi long samit afta we Sista Call, wan senia misinari we oli putum hem blong wok wetem ol yang singgel adalt, i tokbaot olsem wanem tempol mared i impoten.
Taem i kam kolosap long en blong toktok, fes blong hem i jenis wantaem, mo hem i talem: “Yu no nidim mane blong yu mared—yu nidim fet.” Mi filim olsem we hem i stap toktok i kam stret long mi, be mi no ting se mi save mekem from se mifala i bin pem samfala samting finis blong rere long mared. Mi talem long miwan: “?Olsem wanem nao bae mi no nidim mane, be mi nidim fet nomo?”
Mi tingting long hemia, bakegen mo bakegen truaot long wik. Long semfala taem ia, mi bin askem miwan: “?I gat sam samting we God i no save mekem?” Long fas taem, mi tingting se no, i nogat; be afta, mi ting se yes, i gat sam samting. Be afta, wan kwestin i kam long mi: “?Olsem wanem nao bae i gat samting we Hem i no save mekem sapos Hem Hem I Gat Olgeta Paoa?” Spirit i tijim mi ansa ia: Ol blesing blong God oli dipen long hamas yumi stap obei long Hem. I no gat sam samting we Hem i no gat paoa blong blesem yumi long olgeta, be yumi mas invaetem olgeta blesing ia taem yumi praktisim fet blong mekem wanem Hem i wantem yumi blong mekem.
Afta long hemia, mi ringim woman ia we mi bin blokem hem finis, Priscilla, blong mitufala i toktok raon long ol plan blong mared. Nomata mitufala i no gat mane, mitufala i disaed blong jusum wan deit blong mared blong mitufala, be mitufala i no save disaed long wan stret deit. Mitufala i agri se bae hem i askem bisop blong hem se wanem deit i fri long wod mo stek kalenda. Aot long tufala deit ia we bisop i givim, mitufala i jusum 27 Septemba 2014—we i minim se !mitufala i gat samting olsem seven wik i stap blong kasem dei blong mared!
Priscilla i askem, “Obim [we i minim “hat blong mi” long lanwis ia, Igbo], yu yu gat sam mane? Taem i sot tumas.”
Mi ansa: “No, be mi gat sam fet.”
Hem i laf mo i talem: “I Oraet. Bae yumitu livim kakae mo prea.” Bae mi talem sot wanem i stap long 1 Nifae 3:7, hem i gohed, “Lod bambae i openem wan rod blong yumitu, from se Hem i givim komanmen long yumitu blong mas mared.”
Long semfala wik ia, oli bin pem mi from wan wok we mi bin mekem sam manis bifo. Nao, Priscilla i talem long mi se hem i wantem statem wan bisnis blong resemap moa mane. Wetem mane we mi bin winim, hem i pem sam hanbag blong woman we oli yusum finis, mo i salembak olgeta. Afta we hem i pem sam samting long lis blong hem, hem i gat yet dabol moa mane bitim we mi bin givim hem.
Long tetaem ia, mi no bin kasem wan wok nating. Evri wok promes, i no hapen. Mitufala i gat tu wik i stap, mo i gat sam samting yet we mitufala i mas pem. Fiancée blong mi i talem se bae mitufala i pusumbak deit. Mi mi talem nomo: “Bae wan merikel i hapen.”
Jes tu dei bifo mared blong mitufala, merikel i hapen: oli bin pem mi from wan wok we mi bin mekem ova tu wik i pas finis. Mi bin lanem tu se, wetem fet mo had wok, Lod bambae i blesem yumi blong mekem ol stret mo gud gol blong yumi oli hapen.
Mifala i bin gobak long bank blong karem mane blong jek ia, mo afta, mifala i go long maket blong pem haf blong ol samting we mifala i nidim long medel blong hevi ren, we mifala i tekem se heven i agri long aksen blong fet blong mitufala.
I no 24 aoa afta, mitufala i mared. Taem oli askem mitufala blong talem promes blong mitufala, filing ia i spesel, i no gat samting olsem we mi bin stap filim finis long laef blong mi. Mi filim se mi kasem wan mak, we mi biliv se mi save mekem evri samting tru long fet stat long poen ia i go. Afta long hemia, mifala i bin sil long Akra Gana Tempol.
Nomata we yu nidim sam mane blong rere from mared, samting we i moa impoten we yu nidim, hem i fet.