Ko e Ngaahi Fiemaʻu ʻa e Tautahí—mo Homau Fāmilí
ʻOku nofo ʻa e tokotaha naʻá ne faʻú ʻi Virginia, USA.
Ne ma pehē naʻe haohaoa ʻema palani ki he taimi ke maʻu ai ha fānaú, ka naʻe liliu ha ngaahi meʻa naʻe ʻikai ke ma pule ki ai.
ʻOku ʻikai faingofua ki he ngaahi hoa mali tokolahi ʻa hono palaniʻi ʻo e fāmilí. ʻOku lahi ha ngaahi meʻa ke fakakaukauʻi pea lahi fau ha ngaahi meʻa ʻoku hoko ʻi he moʻuí. Aʻu ki he taimi ʻokú ke pehē ai ʻoku ʻi ai haʻo palani leleí, ʻe ʻi ai e kiʻi meʻa siʻi ʻe hoko ʻo liliu ai e meʻa kotoa.
ʻOku kau homau fāmilí ki he kautaú. ʻOku ou ʻi he Tautahi ʻAmeliká, pea ʻoku makatuʻunga ʻa e meʻa kotoa ʻi he “fiemaʻu ʻa e Tautahí.” ʻOku mau ʻalu ki he feituʻu mo e taimi ʻoku tuʻutuʻuni ʻe he Tautahí. ʻI he taʻu ʻe ua kuohilí, ne ma maʻu ai mo hoku uaifi ko Saná ʻema ʻuluaki tama fefine ko ʻIsapelí. Neongo ko ha liliu lahi ia ka naʻe fakafiemālie pē ʻema moʻuí he naʻá ku kei ako pailate. Hili ha taʻu ʻe taha mei hono fanauʻi ʻo ʻIsapelí, ne ma ongoʻi ʻoku taimi ke toe feingaʻi mo ha taha. Ne mei ʻosi ʻeku ako pailaté pea vahe au ki heʻeku fuofua ʻiunití.
Ne fakafokifā hono vahe au ke u ʻalu ʻi he taimi pē ko iá ʻo ngāue fakakautau ʻi ha māhina ʻe fitu. Ne ma faʻu leva ha palani lelei. Te u ʻalu ʻo ngāue pea te ma feinga ke feitama ʻi heʻeku fokí mai pē. ʻE vaha lelei ai ʻema fānaú ʻo hangē ko ʻema fiemaʻú, pea ngalingali te u ʻi ʻapi ʻi ha taimi lōloa. Ne ma lotua ia pea ongoʻi ko e meʻa ia ke faí.
Ne u ʻilo ʻi ha pongipongi Mōnite ʻe taha kuo liliu ʻa e “fiemaʻu ʻa e Tautahí” pea te u ʻalu ki ha ʻiuniti kehe, ʻo toutou folau ʻi ha taʻu ʻe taha pea ʻalu ʻo ngāue fakakautau ʻi ha māhina kehe ʻe fitu ʻi he hili iá. Ne liliu fakafokifā ʻema palaní, pea naʻe ʻikai ke ma ʻilo e meʻa ke faí. Ne kei fakakaukau pē ʻa Sana ʻoku kei lelei pē ʻema palaní, ka naʻá ku toutou talaange he ʻikai fenāpasi ia mo ʻeku taimi-tēpilé. ʻE fiemaʻu ke ma tatali kae ʻoua kuó u foki mei he ngāue fakakautaú, pea ʻe vaha ange ʻema fānaú ʻi heʻema fiemaʻú.
Meʻa mālié naʻe falala ʻa Sana ʻe lelei e meʻa kotoa kapau te ma fakahaaʻi ha tui. Ne u talaange ʻoku sai pē ia kiate au, ka ʻo kapau te ma fili ke feitama hangē ko e palaní, te u mavahe ʻi ha kiʻi taimi nounou mei heni ʻo ngāue fakakautau pea ʻe pau ke ne nofo tokotaha pē mo e pēpeé. ʻIkai ngata aí, he ʻikai ke u ʻi ai ke tokoni ʻi hono tokangaʻi ʻa ʻIsapelí. Ne u ʻilo naʻe lototoʻa hoku uaifí, ka naʻe ʻikai ke u ʻilo ʻa hono lahí.
Ne ma fili ke fai ʻema palaní pea naʻe tāpuekina kimaua ʻo vave ʻene feitamá. Ne u mavahe ʻi he māhina ʻe ono nai ʻo e taimi ne feitama ai ʻa Saná. ʻI hono fitu māhiná, ne u mavahe ai ʻi he ngāue fakakautaú, pea ʻiloʻi te u foki mai kuo māhina nima pe ono ʻa e pēpeé.
ʻI he ʻaho ʻe taha ofi ki he ʻaho fāʻele ʻa Saná, naʻe fakataimi-tēpileʻi ke u folau ʻi ha vaka pongipongi ka naʻe kaniseli peá u toe foki ai ʻo mohe. Hili ha ngaahi houa mei ai, ne ui au ʻe heʻeku ʻōfisa komanitaá (CO) ke u haʻu ki hono ʻōfisí ʻi he taimi pē ko iá. ʻI heʻeku aʻu ki aí, naʻá ne fakaʻaliʻali mai ha ʻīmeili meia Sana ʻo pehē naʻá ne langā pea ʻoku ʻalu ki he falemahakí. Meʻa mālié naʻe tonu e ongo ʻa Saná ke ʻīmeili fakatouʻosi mai kiate au mo e ʻōfisá he ʻoku vave ange ʻene maʻu ʻa e ʻīmeilí. Ne talamai ʻe he ʻōfisá te u lava ʻo ngāueʻaki ʻene telefoní, pea ne u lava ke telefoni mo Sana lolotonga ʻene fāʻelé, ʻa ia naʻe faingofua ange ʻa hono fāʻeleʻi ʻo e pēpē ko ʻení ʻia ʻIsapeli. Naʻe lototoʻa ʻaupito ʻa Sana ʻi he loki fāʻelé neongo ʻene ʻi ai tokotahá. Naʻe moʻui lelei ʻaupito ʻa ʻAlekisisi ʻi hono fanauʻi maí. Kapau naʻe ʻikai ke kaniseli ʻeku vaká pe ʻikai ʻīmeili mai ʻa Sana ki heʻeku CO, ne ʻikai ke u mei kau ʻi ha meʻa pea ʻikai malava ke fanongo ki he fuofua tangi ʻa ʻAlekisisí.
Ne ma ʻilo hili ha kiʻi taimi mei ai te u foki ki ʻapi ʻo mālōlō mei he ngāué ʻi ha ngaahi uike siʻi. Ne ma fakatou fiefia ke u feʻiloaki mo ʻAlekisisi kimuʻa ʻi he taimi ne ma tomuʻa palani ki aí. Naʻe fakafiefia ʻeku hifo mei he vakapuná pea vakai atu ki he tokolahi ange hoku fāmilí.
Ne ma fakatou ako mo Sana ha lēsoni mahuʻinga fekauʻaki mo e tuí mo e fakafalala ange ʻi he toʻukupu ʻo e ʻEikí. Ne ma faʻu ha palani naʻá ma ongoʻi ʻe ngāue lelei taha ia ki homa fāmilí mo homau tūkungá. Ne liliu ha ngaahi meʻa ne ʻikai ke ma lava ʻo puleʻi, ka naʻe akoʻi au ʻe Sana kapau te tau ongoʻi e fakamoʻoni mai ʻa e Laumālie Māʻoniʻoní ʻoku totonu ha palani, ʻoku totonu ke tau tauhi ki ai. Ko e meʻa pē ʻoku fie maʻu ke tau faí ke fokotuʻu ha palani mo e ʻEikí pea fakahaaʻi ha tui. Naʻe ʻikai hoko ia ʻo hangē ko ia naʻá ma ʻamanaki ki aí, ka naʻe hoko ia ʻi he tokoni ʻa e ʻEikí ʻaki ʻEne ngaahi “ʻaloʻofa ongongofuá” (vakai, 1 Nīfai 1:20).