Mitinare ake a Moantaai n Oki: Tiaki Tii Ngkoe
Te tia korokaraki ae mai Buranti, e reirei i Utah, USA.
Roronrikirake aika kairake a tibwaia bwa a kanga ni kunea nanon ao te rau imwiin moantaain okiia man aia mition ao nakoim naba bwa ko kona naba.
Tamnei iroun Tiffany Myloan Tong
Mwaitiia mitinare ake a bwanin aia tai a kataia ni kakoroa nanon bukinaia ni “kaoiia tabeman bwa ana nakon Kristo”1 n uota “te kaantaninga ae korakora ao te kimwareirei ae bati” (Aramwa 56:17) nakoia aika mwaiti. Mitinare akanne, n aroia rorobuaka n ataein ni mwaane ake taan buaka inanon ana Boki Moomon, a buaka ni katoa bong ma “te korakora ae kamimi; ao ma te korakora ae bati” (Aramwa 56:56).
Ma ibuakoia 2,060 rorobuaka n ataein ni mwaane ake taan buaka, iai mai buakoia ae 200 ake “a tong ibukin buan raraaia” (Aramwa 57:25). Anne e karikiia bwa aki ninikoria? N aki rangi ni korakora? N aki rangi n nanomwaaka? Aaki rangi n tau n aroia ake tabeman? Bon ti aki naba teutana.
Ai bon aekakina naba, ngkami mitinare ake kam moantaai n oki nakon mweengami ibukin te kaangaanga n ami iango ke ibukin mamaran rabwatami e bon aki kee ninikoriami, kee korakorami, kee nanomwakami, ke ni keerikaaki aromi ni kororaoi. Teimatoami rinanon ami kaangaanga e bon—ao e na riai n—rangi ni kamimi. Ko a tia ni kawakinaki—tao n rangi ni kakaiaki n ikoaki, ma ko kawakinaki. Karawawataam, ngkai tao ni marurungin rabwatam, ami iango, ke maiun tamneim, e na riai ngkai n taraaki raoi (taraa Aramwa 57:28). Nakoia nake a moantaai n okirii mweengaia ibukin ae e irekereke ma te kororaoi, te rairannano bon iteran raoi manga kamaiuakim.
N aron te bitaki ngkai ko a mena ni mweengam, taraia raoi bwa ko anaa te tai ibukin kamaiuakim n aki toki n onimaki iroun te Atua (taraa Aramwa 57:27). E a tia ni kauringira: “Ngkana I anga te tua nakoia natiia aomata nako mwaane [ke aine] ni karaoa te mwakuri n arau”—te katooto, ni beku n te mition—“ao naati mwaane akanne [ao naati aine] a nako ma korakoraia ni kabane ao ma ake iai irouia ni karaoa te mwakuri anne, ao n aki toki n nanomatoa, ao aia kairiribai”—ae n ai aron, kangangan marurungin te rabwata ke aorakin te iango ke kaangaanga riki tabeua—“a roko i aoia ao n tukiia man karaoan te mwakuri anne, nooria, bon au kaantaninga n tangira te mwakuri anne n aki manga mena i baia … , ma ni butimwaea aia anga karea” (Reirei ao Berita Aika Tabu 124:49).
Man kaangaanga ake ko a tia ni karekei—ke ni manga rinanoi—ni buakanii, ngkana ko teimatoa ni beku ma te kororaoi ke n raira nanom ae bwanin, am anganano a kainanoaki ao a butimwaeaki iroun te Uea.
Tamnei iroun Getty Images
Warekean rongorongo aikai a na kona ni buokiko ni kunei anga ni kamaiuaki ao ni koauana bwa ko bon aki tiku n tii ngkoe ao tibwaan am rongorongo ana kona ni buokiia tabeman.
Ko na ataia bwa te Tia Kamaiu E a Tia n Rinanon Marakim
Iaon kawaiu n te wanikiba nakon au mition, I a iangoaia bwa e na kanga aron te butimwai ngkana I a okira mweengau. E na boo te takarua, au utu ao raraou ana inga ma ngai ao N a maiuakina nikiran maiu inanon te rau, ni kukurei n taian kakabwaia ake a roko ibukina bwa I oki ni mitinare ma te kamoamoaaki.
Te bwi-ma-teuana te namwakaina imwiina, iaon kawaiu n te wanikiba n okira mweengau, e bane te tai anne ni iango ma te raraoma bwa ai teraa ae e na riki imwiina. A tatanginga au utu, ao e ngae ngke a kukurei ao ni inga ma ngai, imwain ae e na bon riki, I a maroaa ma n akea au kaantaninga ibukin bong aika ana roko.
Te Tia Kamaiu e norii au bong aika aki nakoraoi. E ataia bwa tera au namakin ngke I wene iaon te kaniwene inanon teniua te wiiki n tang ao ni matu n aki kan iangoa te bwai ae e na riki. E ataia ae I kainanoa Ana kakorakora ibukina bwa bon akea temanna irarikiu ae e na mataata ke n namakina te nanokawaki are I rinanona. Ma E bon namakina. N na bon aki tokanikai n au mition ke ni moantaai n okira mweengau ngke arona bwa akea Ngaia.
Ali Boaza, Queensland, Aotiteria
Tatauraoi n Iriira Nanon te Uea
A bane n nakoraoi bwaai n tain au mition. Iai tataneiai aika a riaon kakoauakiia aika a na tiku inanou n aki toki. Ma e ngae n anne, imwiin waniua te namwakaina, E a moana n reke irou te nimaoraki. Imwiin te aki mamatam ao te tataro ae bati, I a kaokaki nakon mweengau. E a rangi n uruaki nanou. I iango bwa aio bon au kairua. I a katoka warekan koroboki aika tabu ao e a aikoa bati au tai n tataro. I iangoia bwa tao I aki karaoi bwaai ni kabane ake N na riai n tia ni karaoi bwa I aonga n tiku.
Ma I a ataia ae I bon kataaki bwa e na noraki ngkana N na teimatoa n onimakina te Uea. E bon kaangaanga, ma I katuka au onimaki Irouna, ao I a manga okira au mwakuri n te mition are I a manga rinanon naba bwaai aika a kamimi.
Imwiina, e a oki marurungiu. Ma n te tai aei ao I a anga nanou bwa na iriira nanon Tamau are i Karawa. Ma I a manga okira naba mweengau te kaua tai. E rangi ni kaangaanga, ma I ataia ae I kona n reiakinaki man bwaai ni kabane ake I a tia n rinanoi.
E ngae ngke I aki beku inanon 24 te namakiaina, I ataia ae I a tia ni beku n ae moan te tamaroa n au mition. I ataia bwa n te tai are I beku ibukin te Uea e bon manena ibukiu ao ibukiia aomata ake I buokiia. Ao I kakaitau nakon te Atua ibukin Ana Mwakuri ni Kamaiu ae akea tokina. E atai ni kabane ara kaangaanga ake ti rinanoi. Ao ngkana ti katikui ara onimaki Iaona ma nanora ni koaua, ti na bon aki tiku n tii ngaira.
Fillipe Hoffman, Goiás, Brazil
Tai Kabanea am Tai Ni Iangoia bwa Bukin Teraa
Iangoakin te moantaai n okira mweengam e bon aki karau nano. N te tai are e taekina te tia ibuobuoki, a roko namakin aika a mwaiti n au iango: Te Mama. Te Rau n Nano. Namakinan te Kairua. Rau. Te Nanokawaki. N te tai ae ti teuana.
I ataia ae e boutokaai te Atua ibukina bwa I kekeiaki rinanon te moan wiiki ni mweengau. Ao imwiina I a manga keiaki riki inanon te wiiki are imwiina. Ao are imwiina. Ni karokoa ae I a namakina ae I a bon marurung raoi. Tamau bon ngaia ae bane ana tai ni boutokaai ao e mwaneai man tararuaai. E tangiria ae e na mamarooro ao ni kabanea ana tai ma ngai. N aki imanono ni kan ata“tera te bwai ae riki,” ma e tii taraia bwa I uara.
Ngke e mate tamau imwiin te kaangaanga ngke e tamwarakea te bwaa tabeua te namakaina imwiina, I a ataia n akea te nano kokoraki bwa iai ana babaire te Atua ibukiu. N tiku irarikin tamau inanon te kabanea n namwakaina inanon maiuna e kakorakora au koaua n te babaire ni kamaiu. I tuai n ataia bwa e aera ngkai I moantaai n okira mweengau n aron are e riki, ma I reiakina naba bwa ngkana ko kabanea am tai ni iangoia bwa bukin tera, ngkanne ko na aki ataa te kamimi ae tamaroa are e a tia ni katauraoia te Atua ibukim ni katoa bong.
Kristen Watabe, Ohio, USA
Bita Aron Are ko Kantaningaia
Ngke e a korakora aorakiu ao I aki kona n reitanako au mition, I ataia ae e tangiria te Atua bwa N na okira mweengau, ma anne are bon kaitaraan te bwai are I tangiria. E bon bwara nanou naba ibukin waekoan kerikakin marurungiu, are e a kuneaki imwiina bwa ai moanan reken te aoraki ae e na teimaan, are e karika te mwauku.
Inanon maiuakinan aorakiu aio, I a namakina ae a akea bonganau. I kainanoa te ibuobuoki ae mwaiti ao I namakina ae a akea te bwai ae I kona n anga. Ma I ataia ae I riai n reitinako ni kakorakora au onimaki, ngaia are I kamatebwai, tataro, ao ni kataia n iriira te Tamnei. N te bongina n au tai ni kamatebwai n te Nu Tetemanti, I a noora te korobanna mai iroun James Tissot ae e atunaki Iesu e Tuangiia Abotoro bwa ana Motirawa. Te rongorongo aei ni Maraki 6:30–31 e waekoa ni karaua nanou. Ngke I noora Kristo bwa e taraiia Ana toro ake a motirawa, I namakina aron Ana tangira nakoia. Ao ngai.
N te tai naba anne, I a ataia bwa au kaantaninga are I iangoia ibukiu bon tiaki titebo ma ana kaantaninga te Atua ibukiu. Ni kawai tabeua, Ana iango ibukiu a bon onoti ibukin kakaewenakoau, ma a bon kaineti nakon are I kainnanoia. I rangi ni kakaitau ibukin te kawai are E reireiai ni butimwaea ni koaua Ana ibuobuoki ao Ana tangira ae e kororaoi. Ana onimaki ibukiu e anganai te kaantaninga are I kainnanoia bwa na waki nako.
Sabrina Maxwell, Utah, USA
Teimatoa ni Kawain te Euangkerio
I moantaai n okira mweengau man te Philippines Cebu East Mition. Ni iangoia ni kaokiokia n au iango bwa “tera ae I kona ni karaoia ae e kaokoro” ae I a aki ira “tuan aron te mitinare” ngkai I a moantaai n oki e bon matoatoa aron rinanoakina. Ngkai I beku i bon iaon abau, I korakai ni iangoia bwa I a tia ni kakerikaka au mwaanga ao n ataia ae I aki kakoroa nanon aia kantaniga. Ni kabotauai ma mitinare ake “a ira tuan” te oki ni mitinare e a anganai te taratara ae I aki kororaoi ke te ianena ngai.
N te tai naba anne, e reireiai te Uea bwa te mition bon teuana mai ibuakon te kawai ae ti kona naba ni beku iai Ibukina. Tiaki n te tabo ke maanra ma e kanga arom ni beku ibukina anne ae e kakaawaki. E reireiai bwa N na nanorinano ao n tiku ni kawain te euangkerio e ngae ngkana a nakobuaka bwaai nako ao a aki ira nanon au kaantaninga.
Jasper Gapuz, Philippines
Kabanea nanom iaon Tamara are i Karawa ao Iesu Kristo
I weteaki bwa N na beku n te New Zealand Wellington Mition. Ngke I a ataia ae I riai ni moantaai n okira mweengau, e roko au namakin ae I a tia ni uotiia rikaaki Tamau are i Karawa ao au karo.
I a tia n reiakina ae mwaiti man au mition ao man te bwai ae I rinanona aei. I bon aki riai n tiku iaon Tamara are i Karawa ao Ana Mwakuri ni Kamaiu te tia Kamaiu n aron are e reke irou ngke I moantaai n okira mweengau. I riai bwa N a kakoauaa te Atua ao ni butimwaea te bwai are E tangiria bwa N a rinanona ao n reiakinna. I aki kona ni kakeea mwakan Te Mwakuri ni Kamaiu ao aron karekean te koaua n ataakin ae Iesu Kristo bon au Tia Kamaiu. I a tia n ataia bwa e anganai te nanorinano te Atua ao n reireinai rinanon au kairua ao taai ni karawawataaki.
E aki taraaki bwa I mena iia, ke tao iai te ara ae I uouotia iaon bwabwau, bon ngai naba ana reirei Iesu Kristo. I ataia bwa e bon tangirai te Uea ao e mena i rarikiu, ao E tangirai bwa N na reitaanako au beku ibukiia tabeman. Ao e ngae ngke I a okira mweengau, I ataia ae bon tiaki ngai te aomata ae akea manenau ibukina bwa E buokai n riki bwa te aomata ae tamaroa rinanon te bwai are I rinanona.
Natasha Krisanalome, Thailand
Kakorakora am Itoman ma te Tia Kamaiu
E reke au tai ni beku n au mition i Anchorage, Alaska, USA. E rangi n aki karaunano te moantaai n okira mweengau ibukin te kaangaanga are e reke man tabiron toutoun waeu ao tabon rangau. E aki taraa ni bebete, ma a mwaiti tataneiai ake a tia n reireiai baika a kakaawaki ibukin te maiu aei. I ataia bwa Tamara are i Karawa iai ana babaire ni bwaai ni kabane ake a riki inanon maiura. I reiakinna naba bwa N a kanga n rinanon te kataaki n taraakina ae tamaroa riki. Reitakiu ma te Tia Kamaiu e rikirake ni korakora n aron are mai imwaina ibukina bwa I reiakina bwa e kanga aron kabonganan te kamaiu man korakoran Ana Mwakuri ni Kamaiu.
Tamara are i Karawa e buokai ni koaua rinanon taai ni kaangaanga. E ngae ngke I rootaki n te korakai n taai tabetai, I ataia bwa Tamara are i Karawa e taui aron bwaai ni kabane ao E ata te bwai ae I kainnanoia inanon maiu nakon are I ataia.
Amber Bangerter, Utah, USA
Ataia Bwa te Mwakuri ni Mitinare e Reitinako n te Tabo are Ko Mena Iai
I beku n te Hungary Budapest Mition. Ngke I okira mweengau ni moantaai, e bon matoatoa ibukina bwa ni kabane raou ni mitinare a bon tiku n aia mition ao I tangiria n reitinako n riki bwa te mitinare. E roko makan naba ae kaain te Ekaretia ana taraai ao ni motika taekau, ma ngaia, a bon bane n akoai ma te tangira ao a mataata n aron te bwai are I rinanona.
Inanon te tai ae maan, I a namakin te rau. I wareware n te rongorongo inanon te Riaona iaoia mitinare ake a moantaai n oki are e buokai n namakina te rau ibukina bwa I ataia ae ngaia bon tiaki tii ngai (taraa Destiny Yarbro, “Home Earlier Than Planned,” Riaona, Tianuare 2018, 44–47). Ao I katikua naba inanou ana taeka ai tinau ae kangai: “Te mwakuri ni mitinare e reitinako n te tabo are ti mena iai.”
Lucas Ludwig Saito, São Paulo, Brazil
Karawatai bwain Rarikim ni bwsaai aika Tamaroa
Bon tiaki au kaantaninga ae N na moantaai n okira mweengau man au mition, ao E rotai te mama ao te nakonnano ni kaitibo ma aomata nako. E ngae ngke bon teuana te kaangaanga inanon maiu, I bon rikirake naba man te taneiai anne. E katamaroa arou n riki bwa te aomata ae e tamaroa riki.
I okira mweengau bwa N na rinanon te kawai n rairannano. Tabeua rinerine ake I karaoi imwain nakou n au mition a bon aki kaineti ma ana tua ao ana reirei te euangkerio. Ibukin mamau ao nanou ni kan tiku inanon te Ekaretia, I bon aki rinanon te kawai n rairannano ma au bitiobi mai imwaina. Ma inanon tabeua te namwakaina, I namakina ae N na riai n okira mweengau n raira nanou bwa I aonga ni beku ma te karineaki ao te kororaoi.
Bwaai ake a kaungaai ngke I okira mweengau bon irakin waaki ake a karikirakea te maiu n tamnei, n aron kaean bootakin te Ekaretia, mwakuri n ibuobuoki, ao te tembora, ngke I a kona n nako iai. Te bwai ae e rangi ni buokai, ni iterana are teuana, bon aomata ake irarikiu—au utu, tabeman raraou, ao bon aomata ake I aki bobo ma ngaiia mai imwaina a kaota te tangira ao te akoi nakoiu.
Mwina ni kabane, bon man ana ibuobuoki te Uea ao te katooto n aron maiun te Tia Kamaiu irarikiu, e a karika manga okiu nako Florida ni kabanea au mition. Au kantanginga bwa ti na bane ni keiaki ni maiuakina maiun te Tia Kamaiu nakoia tabeman, e ngae ngke tao a moantaai n okira mweengaia ke a bon kainanoa te ibuobuoki.
Caigen Stuart, Utah, USA
Onimakina te Tia Kamaiu
I karekea te wewete n nako n te mition nako Zambia Lusaka Mition. Teuana te bwai ae moan te matoatoa ngkana ko moantaai n okira mweengam bwa membwa a aki mataata irouia mitinare ake a moantaai n oki.
Ngke I oki, ao I katukaki n te Onaoraki inanon teniua te wiiki, ao akea temanna te membwa man te ekaretia ae tareboniai ke ni kawarai. Aomata ake a roroko ni kawarai bon te tia kairiiri n te kurubu ao mitinare n anganai te toa ni katoa Tabati—ao anne e riki bwa I tuatua ngkana a kona ni karaoia. I bon rangi ni kainanoa aia ibuobuoki membwa ni kakorakora au onimaki iroun Iesu Kristo inanon moan wiiki akanne ngke I oki, ma I bon rinanona n tii ngai.
E reitinako n reireiai te Uea bwa e aera ngkai I moantaai n okira mweengau n aron are e kaantaningaaki, e ngae ngke e bon matoatoa n tabetai kakoauaana. I a ataia ngkai bwa moantaain okiu nakon mweengau e a karekea au tai ni kakaea au karo ma ana utu ao ni karikirakea te itoman ma ngaiia. E anganai te kona ni kunea bwa ngaia iai irou te aoraki ae e rota mwakurin rabwatau ae e a riki bwa irian maiu. Ao I a ata korakorau ao mamarau—te katooto, n arou n taekina “tiaki.” Imwaina, e bon kaangaanga irou bwa N a kangai tiaki nakon te bwai teuana ke te aomata temanna. I aki toki n anga nanou ni karaoi bwai nako ao ni moanibwaiia aomata, n aki tabe ma kainanou ke tabetabeu—anne e aki bure, ma ibukin te kataaki aei, I a reiakinna bwa ngaia n tabetai N na riai ni tara moa kainanou.
I reitinako ni kunei bwaai aika a boou ibukin te Uea ao e aera ngkai I moantaai n okira mweengau. A mwaiti kakabwaia aika a riki, ao I onimakina te Uea ni katoa bong. E ngae ngke n tabetai e matoatoa ao aomata a aki rangi ni mataata iai, I ataia ae e bon ataia te Tia Kamaiu. Ao I reitinako n Onimakinna ao Ana Mwakuri ni Kamaiu.
Lindi Chibase, Gauteng, South Africa
Te berita are e kuneaki inanon te reta ni wewete nakon te mwakuri ni mitinare, are e kanakoaki nakoim ngke ko a iangoia n rinanon te mwakuri aei, e na koro bukina: “E na kakabwaiako ibukin maiuakinan te raoiroi ao am beku ma te kakaonimaki?” Man te tararua ao te tabeaianga, e kona ni kamarurungaki ikoakim ao e na riki bwa te kawaii ni kona ni buokiia tabeman bwa a na nakon Kristo. Aio, ngkanne, bon taben te mitinare.