O Osigataulaga Na Ou Faia ia Auai Ai i le Ekalesia
E tele ni mea na ou lafoaiina ina ia auai ai i le Ekalesia, ae peitai ua anoanoai mea ua ou toe maua mai ai.
E alala le tusitala i Sikotilani.
Mo tagata O Le Ekalesia a Iesu Keriso o le Au Paia o Aso e Gata Ai, o le upu ositaulaga e anoanoai ona uiga. A ou mafaufau i le ositaulaga, ou te mafaufau ia Iesu Keriso i le Faatoaga o Ketesemane po o luga o le satauro i Kolokota. Peitai, o osigataulaga faatauvaa i aso uma ua avea o se taumafaiga moni mo le toatele o tagata o le Ekalesia, e aofia ai ma a’u talu ona avea a’u ma se tagata [o le Ekalesia].
Sa ou fanau ma ola a’e i Sikotilani e ni matua lelei, ae ana le 18 ou tausaga ou te le iloa sa i ai i fafo atu se mea e sili atu le lelei. Sa ou iloa lava sa i ai se Atua, ae na faatoa ou iloaina lata mai nei e i ai Sona sootaga patino ia te a’u.
O le taimi muamua lava na ou auai ai i le Ekalesia, sa le afaina lava i lo’u aiga. Ae sa tele ni masalosaloga na talafo mai e a’u uo. Sa latou suesueina le Ekalesia ma talitonu ai i le tele o faamatalaga sese e uiga i ai. Sa latou ta’uina le Ekalesia o se vaega e ese lava ona talitonuga, ma fai mai ia te a’u ua tumu i pepelo ma sa ou valea i lo’u auai ai. Ae sa ou iloaina i totonu o lo’u loto, o le Ekalesia moni lenei. Ou te manatu e leai se mea e mafai ona suia lea mea. Ma ina ua ou fai atu i a’u uo ou te iloa e moni, na suia a latou faamatalaga i tauemuga.
O le po lena sa ou tatalo ai mo se fesoasoani i a’u uo. Ou te le’i manao e lusi i latou, ae ou te le’i manao e avea a’u ma se autu o a latou tauemuga. Ina ua uma la’u tatalo, ou te manatua le mauaina o le uunaiga manino lenei: “Afai o nei tagata o ni au uo lelei, o lona uiga o le a latou tutu faatasi ma oe. O le a latou le ulagia oe.” Sa ou mulimuli i lena uunaiga, ma ina ua leai se suiga, sa ou faamatuuese loa na faauoga, lea sa matuai faigata, ae talu mai lena taimi, ua ou maua ai ni uo maoae i le Ekalesia—o uo o le a tutu mo a’u, e tusa lava po o le a.
O le isi osigataulaga sa taitaia a’u faaleagaga e fai, o la’u galuega. Ae ou te le’i auai i le Ekalesia, sa ou faigaluega ai i se pa pia, ma e ui ina e leai ni aoaoga o le talalelei e faasaga i lenei [galuega], ae sa le lelei o’u lagona e uiga i ai. Sa amata ona ou suea se galuega fou ma maua vave ai se galuega i se faleaiga lea e laitiiti lava se ava malosi e faatauina ai, ma e pulea e se tasi o aiga sili ona agalelei ua ou feiloai i ai!
O lea la, o le mea a ia, e ui ina manaomia e lo tatou auai i le Ekalesia ona faia ni osigataulaga, pe o le taimi, lagolelei, po o le a lava, o na osigataulaga e tauaogaina lava. Atonu e laiti mamao a’u osigataulaga pe a faatusatusa atu i osigataulaga a isi, ae na tutusa lava le faigata, ma ua latou faamalosia ai a’u—aua o a tatou osigataulaga uma lava i aso taitasi ma taimi tatou te tuuina atu i le Alii o le a faamalosia ma faaleleia ai i tatou uma lava.
Ua ou iloa o le Ekalesia moni lenei e tasi a Iesu Keriso. Ua ou iloa o loo i ai so tatou perofeta i le lalolagi i aso nei, ma mo lenei mea ua matuai ou fiafia ai. Ou te faafetai mo le molimau ua ou maua ma le faaaliga tatou te maua e ala i le avea ma ni tagata agavaa o le Ekalesia. Ou te iloa afai tatou te taumafai ia alolofa le tasi i le isi e pei ona faia e Keriso, o le a faamanuiaina moni i tatou. Ou te alofa i lenei talalelei—ua suia ai lo’u tagata.
O Nicky o se sifi kuka i se motu laitiiti i Sikotilani e i fafo mai o le talafatai i sisifo. E fiafia o ia e tietie uila i luga o mauga, alo vaa, ma le fagota. O ia o se tamaitiiti e leai ni ona uso po o ni tuafafine, ma e ese le latalata i ona matua, e ui lava e na’o ia le tagata o le Ekalesia i lona aiga. Sa papatiso o ia i le 18 o ona tausaga, ma e faamoemoe e auauna atu i se misiona pe a mafai!