Au a Valu meu Ra-wa na veivakatotogani ni sara iYaloyalo Vakasisila Na Cava me Sega Kina Okoya?

Tarovi na vakaraitaki ni yaca

Ena noqu mai kila ni dau sara iyaloyalo vakasisila ko noqu i tau, au a tovolea ena noqu i gu meu vukei koya me kere veivuke mai vua nai Vakabula.

Dusidusi nei Edita: Na sara iYaloyalo vaksisila e dau vakacacana na veiwekani ni veigadivi nodra e vuqa na isausauvou ena veisala e vuqa. Na veika sotavi ka cauraki tiko ena nodra i wase na isausauvou ni vula oqo e vakaraitaka na draki ni bula kei na digidigi ka vakatabaki dua vei ira yadua era volavola. Era sa soli yani me vakavure vakasama ena nomu vakasaqara na i vakatakila me ganita na draki ni bula duidui ko ni sotava

E vakaitikotiko mai Quatemala o koya e vola

Au a gadiva tiko e dua na gonetagane kau domoni koya sara vakalevu ena loma ni dua na yabaki. Au nanuma ga niu na vakamautaki koya vakaidina! Ia au sega sara ni nanuma ni noqu gadivi koya keirau na veirai mata tale kina kei na leqa vata ga kau a tovolea ena dua na gauna meu ra-wa.

Ena noqu vakarau tiko meu kaulotu, e a gadrevi vei au meu raici noqu bisopi meu vakatusa niu a vakatotogani tu ena iyaloyalo vakasisila ena dua na gauna sa oti. Ni oti noqu veivutuni ka kauta tani vei au nai colacola oqo mai yaloqu, au sega ni namaka niu na mai sotava tale na leqa oqo ena noqu bula. Ia Au a cala.

Ena noqu mai kila ni dau sara iyaloyalo vakasisila na tagane kau navuca meu na vakamautaka, Au a vakadeitaka meu vukei koya ka tokoni koya me ra-wa na veivakatotogani oqo. Au sa lakova oti na salatu ni veivutuni kei na sasaga ni kena valuti na iyaloyalo vakasisila e liu, kau kila kina na cava ena rawa ni vakayacora vua na Turaga. Ia ena gauna kece au dau tovolea meu tuberi koya kina ki na veivuke e gadreva me ra-wa kina na bolebole oqo, e dau medre na veika kece. E sega ni dau gadreva me vukei. Ni oti e dua na gauna, au siqema rawa ni sega ni tautauvata na neirau nanuma baleta na iyaloyalo vakasisila. Io, keirau lewe ni Lotu ruarua, ia na ivakavuvuli ni kosipeli keirau sega ni duavata kina ena kena ibalebale.

Au sa rarawa dina. Au a domoni koya, kau vakabauta kevaka ena vukei, ena ra-wa na bolebole oqo. Au sa yalo ririko talega baleta niu sotava tale tiko na leqa vata ga kau a tovolea ena noqu i gu taucoko meu ra-wa ena dua na gauna sa oti. Ena dua na bogi au sa guta meu masu ka kerea na loma vuku ki vua na Tamaqu Vakalomalagi ena sala meu toso kina ki liu baleta niu gadreva na kaukauwa meu rawa ni saqata kina na veitemaki, kau gadreva talega meu kila na sala meu tokona kina na tamata kau navuca tiko me na watiqu.

Ni yaco mai na kena i sau, au vakila na vakacegu kau kila meu na vosa vua na tamata kau gadiva tiko ena vakasama e dei. Au vinakata me kila o koya na veika au namaka mai vua e dua au gadiva tiko, o ya na vakamau ena valetabu kei na vakaluveni. Au gadreva meu kila se keirau muavata tiko kina na neirau veisiga ni mataka ka keirau vakanamata tale tikoga vua nai Vakabula. Au gadreva meu kila se me tomani tikoga na neirau veigadivi. E cecere na noqu nanamaki ena veika oqo kau vakabauta ni oti neirau veivosaki, sa na vinaka na veika kece.

Ena dua na yakavi siga au a wasea vei koya na noqu tatadra kei na navunavu baleta noqu matavuvale ena veisiga ni mataka ka ra susugi na gone ena kosipeli. E ka ni kurabui vei au, ni oti nona rogoci au, e a qai cudruvi au. Au vakila ni duidui na neirau vakasama me baleta na bula e se bera mai. Sa ka levu na noqu rarawa, ia au vakila na vakacegu, kau kila nai sau ni noqu taro me sa muduki na veigadivi. A sega ni tiko o koya ena dua na vanua me tu vakarau kina me valuta rawa na nona vakaleqai tiko ena iyaloyalo vakasisila se gole vua na iVakabula me vukei, ka au sega ni rawa ni vukei koya kevaka e sega ni gadreva na veivuke.

Ena loma ni dua na gauna, au vakananuma se cava e mai voroki kina na utoqu kina milioni na veitikina dina ga niu a vakayacora tiko na veika e dodonu meu vukei koya kina. Sa qai yaco mai na gauna, me turu kina nai otioti ni wainimataqu ki vua kau sa vakanamata kina vakacegu ka a yaco vei au niu mai tinia na neirau veigadivi. Au kila ni isau ni taro e a lutu mai lomalagi.

Sa oti oqo e vica na yabaki mai na gauna ka muduki kina na neirau veigadivi. Kau se raici koya tikoga ni tamata vinaka me vaka noqu kilai koya mai liu. Ia au kila ni o koya e gadrevi me gole vua nai Vakabula me vukei—Au na sega ni rawa ni vakasaurarataki koya. E tiko nona galala ni digidigi ka tiko talega na noqu. Mai na veika sotavi qo, au sa dau tovolea meu muria na domo ni Yalo Tabu ka sega tale na loma tarotaro. Au kila ni tiko e dua na ituvatuva nei Tamada Vakalomalagi vei keda kece sara me rawa ni da nuitaka me vaka eda sa cakava na vakatulewa e yavutaki ena veivakauqeti ni Yalo, ka na sega ni laiva o Koya me da muataki vakatani. Ena veigauna kece sa dau vakarautaki keda o Koya ki na veika vinaka ena yaco mai.

Rabailevu na nomu Rai

Kevaka e mai vakalatilati ena nomu veiwekani na saravi ni iyaloyalo vakasisila, wilika nai kuri ni itukutuku oqo ena Veigadivi kei na iYaloyalo vakasisila ka kunei ena nodra tabana na isausauvou ena Okotova 2019 ni Ensign kei na Liaona. Na vei itukutuku oqo era solia na rai duidui eso kei na bula vakasinaiti ena vakabauta me sotavi kina na bula ni veigadivi kei na saravi ni iyaloyalo vakasisila

Raica na YA Weekly, ena iwasewase ni Young Adults ena Gospel Library app, me baleta na lewenivola veivakauqeti vei ira na isausauvou e veimacawa.

Sa rawa mo vakauta mai nomu italanoa, vakasama, kei na railesu e tara cake na vakabauta ki na liahona.ChurchofJesusChrist.org Keimami sa waraka toka na nomuni cau.