Sa Ou Tauivi e Faatoilaloina Ponokalafi. Aisea o le a Ia le Mafai ai?

Taofia le igoa

Ina ua ou iloa sa i ai se faafitauli tau ponokalafi a la’u uo tama, sa ou taumafai i le mea sili e fesoasoani ia te ia e liliu atu i le Faaola mo se fesoasoani.

E alala le tusitala i Kuatemala.

Sa ou tafao faamasani i se alii talavou o le sa ou matua alofa faavalea i ai mo le tusa ma le tausaga. Sa ou manatu moni lava o le a ou faaipoipo atu ia te ia! Ae ou te lei manatu o le tafao faamasani ma ia o le a aumaia ai a’u e faafesagai ma se faafitauli na ou tauivi e faatoilaloina i lo’u malosi atoa.

A o o’u sauni e alu i se misiona, sa ou alu i la’u epikopo ma ta’uta’u atu ia te ia sa ou tauivi ma ponokalafi i taimi ua tuanai. I le mavae ai ona ou salamo ma ave ese lea avega mai lo’u agaga, sa ou le manatu lava o le a toe aafia lo’u olaga i ponokalafi. Ae na ou sese.

Ina ua ou iloa o lenei alii sa ou fuafua e faaipoipo atu i ai sa faaaogaina ponokalafi, sa ou naunau e fesoasoani ia te ia ma lagolago ia te ia ina ia faatoilaloina. Sa ou uia le faatulagaga o le salamo ma le taumafaiga e foia muamua ponokalafi, ma sa ou iloa le mea e mafai ona faia e le Alii mo Ia. Ae na foliga mai o taimi uma na ou taumafai ai e taitai atu o ia i le fesoasoani na ia moomia e faatoilaloina lona faafitauli, e sese lava le taunuuga o mea. Na foliga mai e lei manao o ia i se fesoasoani. Ina ua mavae sina taimi, na ou iloa ai e le’i tutusa o ma manatu e uiga i ponokalafi. Ioe, o ma’ua uma o tagata o le Ekalesia, ae o aoaoga o le talalelei e foliga mai e le tutusa uiga ia i ma’ua uma.

Sa ou le mautonu. Sa ou alofa ia te ia, ma sa ou talitonu o le i ai o se fesoasoani, e na te mafai ai ona faatoilaloina lenei faafitauli. Sa ou lagonaina foi le lamatia ona sa ou faafesagai ma le faafitauli lava lea e tasi lea sa ou galue malosi ai e faatoilalo i le taimi ua tuanai. Sa ou filifili i se tasi po e tatalo ma ole atu mo le atamai mai le Tama i le Lagi ia iloa ona agai i luma ona sa ou moomia le mana e tetee ai faaosoosoga, ma sa ou moomia foi ona iloa pe faapefea ona lagolagoina le tagata sa ou fuafua e faasoa i ai lo’u olaga.

Ina ua oo mai le tali mulimuli ane, sa ou lagoinaina le filemu ma sa ou iloa e tatau ona ou talanoa atu i le alii o loo ou faauo faamasani i ai faatasi ma se faamoemoega i le mafaufau. Sa ou manao e faailoa atu ia te ia le mea na ou faamoemoeina mai le faauo faamasani atu i se tasi, o le faaipoipo atu lea i le malumalu ma mauaina ni fanau. Sa manaomia ona ou iloa po o ōgatasi o ma lumanai ma pe o ia agai atu i le Faaola. Sa tatau ona ou iloa pe tatau ona faaauau le ma mafutaga. Sa maualuga ou faamoemoega mo lea mea ma sa ou talitonu a uma ona ma talanoa, o le a lelei mea uma.

O se aoauli mafanafana lea na ou faasoa atu ai ia te ia a’u miti ma sini e uiga i lo’u aiga i le lumanai ma le tausia o la’u fanau i le talalelei. I le faateia ai o a’u, ina ua mavae ona ia faalogo mai ia te a’u, sa ita ia te a’u. Na ou iloa ai sa eseese tele o ma manatu e uiga i le lumanai. Sa ou faanoanoa, a e peitai sa ou lagonaina le filemu, ma sa ou iloa le tali mo a’u o le faamuta lea o le ma mafutaga. Sa le’i i ai o ia i se tulaga lea sa na manao ai e taumafai e faatoilalo ona faafitauli i ponokalafi po o le liliu atu i le Faaola mo se fesoasoani, ma sa le mafai ona ou fesoasoani ia te ia pe afai na te le manao i le fesoasoani.

Mo sina taimi, sa ou manatunatu pe aisea lava i le mavae ai ona ou faia o le mea sa’o ma faia mea uma sa mafai ona ou faia e fesoasoani ai ia te ia, ae o loo iu lava i le ta’e o lo’u fatu i ni vaega e miliona na nutililii ai. Ae mulimuli ane, sa maligi ai ou loimata mulimuli mo ia ma sa ou taulai atu i lena filemu sa ou lagonaina ina ua ou faamutaina la ma’ua fesootaiga faaleuo. Na ou iloaina o lena tali na sau mai le lagi.

Ua silia ma ni nai tausaga talu ona maea le ma fesootaiga faaleuo ma lena alii. Ma ou te vaaia pea o ia o se tagata lelei sa avea ai o ia. Ae sa ou iloa e moomia ona ia alu i le Faaola mo se fesoasoani—e le mafai ona ou faamalosia o ia. O loo i ai lana filifiliga ma o loo i ai foi la’u filifiliga. Talu mai lenei aafiaga, sa ou taumafai e mulimuli i le siufofoga o le Agaga Paia e aunoa ma se faatuai. Ou te iloa e i ai se fuafuaga a le Tama Faalelagi mo i tatou uma ma e mafai ona tatou faatuatuaina a o tatou faia faaiuga e faalagolago i musumusuga a le Agaga, e Na te le tuua lava i tatou ia taitaieseina. Na te saunia lava i tatou mo le lelei o mea e oo mai.