Të Kërkosh Krishtin në Vend të Errësirës së Pornografisë

Tetor 2019

Të Kërkosh Krishtin në Vend të Errësirës së Pornografisë

couple on a beach

Kur planifikojmë artikujt për të rinjtë në moshë madhore, ne shpenzojmë shumë kohë duke menduar për çështjet me të cilat ata po përballen tani. Ka kaq shumë. Por teksa po shkëmbenim mendime për këtë muaj, u drejtuam te një temë që na ka prekur ne personalisht, shokët tanë dhe njerëz të tjerë të panumërt: dalja në takime dhe pornografia. E dinim se planifikimi për këtë pjesë do të ishte i vështirë. Në fund të fundit, pornografia ndikon te kaq shumë njerëz në mënyra që e copëtojnë zemrën, nganjëherë jetëshkatërruese. Dhe për të rinjtë në moshë madhore beqarë, ajo mund ta bëjë të ardhmen të duket edhe më të pasigurt nga sa e bën tashmë, veçanërisht gjatë përgatitjes për martesë.

Ne vërtet e pamë dorën e Atit Qiellor të na e udhërrëfente punën tonë teksa filluam të marrim ngjarje nga të rinj në moshë madhore marrëdhëniet e të cilëve ishin ndikuar nga pornografia. Dhe e shohim se ka më shumë sesa vetëm një grimë shpresë për martesa të përjetshme të lumtura dhe pa varësi. Përse? Sepse secila ngjarje më vete dëshmon për fuqinë jetëndryshuese, shpresëdhënëse, shëruese të Jezu Krishtit dhe Shlyerjes së Tij.

Pra, nëse e shihni veten në një marrëdhënie që është prekur nga pornografia, ju ftojmë ta lexoni pjesën e këtij muaji me artikuj të treguar nga njerëz të tjerë të lënduar, të cilët e dinë fare mirë se beteja kundër pornografisë është e vërtetë. Këta artikuj trajtojnë tema të tilla se si ta ngrini çështjen e pornografisë kur po dilni në takime dhe se si ta trajtoni atë (faqe 44), si të reagoni kur dikush e pranon se po lufton me pornografinë (vetëm në format elektronik), se si falja dhe shërimi janë të mundur për të dy njerëzit (vetëm në format elektronik) dhe se si Shpirti mund t’ju drejtojë ta dini se si të vijoni në marrëdhënien tuaj (vetëm në format elektronik).

E dimë që, nëse ju mbështeteni te Shpëtimtari dhe e ftoni Shpirtin në jetën tuaj teksa kërkoni përgjigje, Ati Qiellor do t’ju udhëheqë në drejtimin e duhur për gjendjen tuaj të pashoqe. Errësira e pornografisë mund të jetë e spikatur në botë, por drita shëruese e Shpëtimtarit shkëlqen më shumë se cilado errësirë. Gjithçka na duhet të bëjmë, është ta kërkojmë Atë.

Sinqerisht,

Çejkëll Uordlei dhe Mindi Selu

redaktorët e pjesës kushtuar të rinjve në moshë madhore të Revistave të Kishës

Këshilla Më e Mirë …

Në vend që t’u kërkonim të rinjve në moshë madhore këshillën e tyre më të mirë për dikë i dashuri apo e dashura e së cilës apo të cilit ka pasur probleme me pornografinë, këtë muaj kemi marrë këshillë nga Presidenti M. Rasëll Ballard, President Veprues i Kuorumit të Dymbëdhjetë Apostujve. Ai këshilloi:

“Çdo njeri që takoni do të ketë pasur sfida në jetë. Pornografia është një nga sfidat kryesore që hasim sot. Megjithatë, pornografia duket sikur po e fiton ndeshjen duke shkatërruar jetë, marrëdhënie dhe familje.

Cilido që po merr parasysh martesën, meriton sinqeritet dhe ndershmëri të plotë me atë që synon ta ketë bashkëshort/e. Bisedoni me njëri‑tjetrin dhe zbulojeni se çfarë synimesh ka dhe se çfarë po bën ai apo ajo që të bëhet ‘një shenjtor nëpërmjet shlyerjes së Krishtit Zot’ (Mosia 3:19). …

Nëse jeni në një marrëdhënie ku njeriu me të cilin/ën po dilni në takime po përpiqet sinqerisht të gjejë liri nga përdorimi i zakonshëm ose nga varësia nga kjo ‘drogë e re’, ju mund të jeni në gjendje ta ndihmoni atë. Tepër burra e gra vuajnë në heshtje sepse ne pa dashje i kemi dënuar ata që janë të varur nga pornografia. Prindërit, pjesëtarët e familjes dhe miqtë mund të bëjnë shumë më tepër për t’i ndihmuar ata që janë në telashe, duke qenë të gatshëm t’i dëgjojnë dhe të japin përkrahje dhe nxitje.

Megjithatë, të dashurit/at nuk janë përgjegjës/e për t’i ‘shpëtuar’ miqtë e tyre nga mëkati; çdo njeri e ka atë përgjegjësi për veten e vet.

Vetëm ju mund të vendosni, me ndihmën e Zotit, se si të vazhdoni në një marrëdhënie në të cilën pornografia luan një rol në jetën e një shoku a shoqeje jete të mundshëm në të ardhmen. Nëse zgjidhni të qëndroni në një marrëdhënie me dikë që ka probleme me këtë tundim, ndihmojeni atë të kthehet te Perëndia me lutje, me agjërim dhe me studim të rregullt të shkrimeve të shenjta. Përveç kësaj, nxitini takimet me prindërit, pjesëtarët e familjes, udhëheqësit e priftërisë dhe këshilltarët profesionistë për të marrë ndihmë dhe përkrahje shtesë.

Gjithmonë ka shpresë nëse ata zgjedhin sinqerisht ta zhvillojnë këtë betejë. Mund të mos jetë e lehtë, por ia vlen!”

Nga një fjalim me pyetje e përgjigje dhënë në Universitetin “Brigam Jang” më 14 nëntor 2017.

Cila është këshilla më e mirë që keni marrë ndonjëherë mbi planifikimin për të ardhmen? Dërgojeni përgjigjen tuaj te liahona.ChurchofJesusChrist.org brenda datës 31 tetor 2019.