Ngaahi Moʻoni ʻe Nima ʻOku Tokoni ke Fokotuʻu e Kuohilí ʻi Hono Tuʻunga Totonú
ʻOku kau ki hono maʻu ha mahino ki hotau hisitōliá ha founga ʻo e akó mo e ʻiló te ne lava ʻo fakamālohia ʻetau fakamoʻoní, tokoni ke tau ikuʻi e loto veiveiuá, fakahoko e ngaahi talanoa lelei tahá, ʻiloʻi e tokāteline moʻoní, mo fakaleleiʻi ʻetau fakakaukaú. Ka ʻikai ke tonu e vakai ki aí, ʻe lava ke hoko ʻa e kuohilí ko ha fakatupunga puputuʻu pea te ne holoki ʻetau fakamoʻoní mo fakatupu ha ongoʻi veiveiua.
ʻE lava ke tokoni e ngaahi tefitoʻi moʻoni ʻe nima ko ʻeni meia Keith Erekson, ko e talēkita ʻo e Laipeli Hisitōlia ʻa e Siasí, ke mahino kiate kitautolu e kuohilí.
1. Kuo mōlia atu e kuohilí—ko e ngaahi kongokonga pē ʻoku toé. ʻOku tau lolotonga fakakaukau ʻoku mōlia atu e konga lahi ʻo e kuohilí. Ka ʻoku kei toe mai pē ha ngaahi konga ʻo e kuohilí. Kuo pau ke tau ako e ngaahi lekooti ʻoku toé kae manatuʻi ʻoku ʻikai ke nau fakafofongaʻi kānokato e kuohilí.
2. ʻOku ʻikai lea ʻa e ngaahi moʻoniʻi meʻá, ka ko kinautolu ʻoku fai e talanoá. Koeʻuhí ko e taʻekakato e ngaahi konga ʻo e kuohilí ʻoku maʻú, ʻoku feinga leva e kakai ʻe niʻihi ke fakatahatahaʻi e ngaahi kongá ke fai ʻaki ha talanoa. Kuo pau ke tau fakakaukau maʻu pē ki he taha ʻokú ne fai e ngaahi talanoá, founga ʻoku nau fai aí, mo e ʻuhingá.
3. ʻOku kehe ʻa e kuohilí mei he lolotongá (pea ʻoku SAI PĒ IA) ʻI heʻetau fekumi ke ʻuhingamālie e ngaahi konga ʻo e kuohilí mo e ngaahi talanoa fekauʻaki mo iá, ʻoku tau ʻiloʻi ʻoku kehe e ngaahi vakai ʻo e kuohilí ia mei heʻetau vakai ʻatautolú. ʻOku liliu e tafaʻaki fakaemāmani kotoa pē ʻo e aʻusia ʻa e tangatá ʻi he fakalau ʻa e taimí ʻi ha ngaahi founga iiki mo lahi fakatouʻosi.
4. ʻOku fai e maʻu hala ki he kuohilí mei he ngaahi fakamahamahalo ʻo e lolotongá Koeʻuhí naʻe kehe e kuohilí mei hotau kuongá, kuo pau ke tau tokanga makehe ke ʻoua ʻe fai ha ngaahi fakamahamahalo fekauʻaki mo e kuohilí ʻo fakatefito ʻi heʻetau ngaahi fakakaukau mo e tuʻunga ʻulungaanga mahuʻinga he lolotongá. Ko e taimi lahi, ko e ngaahi palopalema mo e kuohilí ko ha ngaahi fakamahamahalo kovi pē ia ne fai ʻi he lolotongá.
ʻOku fie maʻu e loto fakatōkilaló ki hono ako e hisitōliá Mei heʻetau fakakaukau he ʻaho ní, ʻoku mahino ʻoku tau ʻilo lahi ange ʻi he meʻa ne ʻilo ʻe kinautolu ne kau atu ki aí, fekauʻaki mo e ola ʻo e kuohilí, ka ʻoku siʻi fau foki ʻetau ʻilo ki heʻenau aʻusia ʻi he moʻui he taimi ko iá. ʻOku fie maʻu ki ai e loto fakatōkilaló ke fakahaaʻi ʻoku ʻikai ke tau ʻiloʻi e meʻa kotoa pē, ke tatali ʻi he faʻa kātaki ki ha ngaahi tali lahi ange, pea ke hokohoko atu ke ako.