O Nisi Taimi e Faia Ai e le Tama Faalelagi ia Tatou Faatalitali mo Faaaliga— ma E Le Afaina Lena
E oo mai faaaliga i le taimi o le Tama Faalelagi. E le o o matou loto.
Sa avea a’u ma se faifeautalai fou o le a tuua le nofoaga autu e aoao ai faifeautalai, ma ou te lei iloa pe moni le Tusi a Mamona.
Na ou talitonu e moni. Sa ou faitauina e le aunoa i le tele o taimi ma tatalo e uiga i ai, e pei lava ona faatonu mai e Moronae (tagai i le Moronae 10:3–5). Ae ou te lei mauaina lava se tali! A aunoa ma lena malamalama, o le a mafai faapefea ona ou aoao atu ma molimau atu i tagata o Romania? Sa manaomia ona ou iloa mo au lava ia, ma sa manaomia ona ou iloaina nei.
I se tasi o afiafi na matou suesue filemu ai i le potuaoga o la matou NAF, sa ou uumauina a’u tusitusiga paia ma punou lo’u ulu.
“Tama Faalelagi,” sa ou tatalo le leoa ai, “ua tele taimi ua ou faitauina ai lenei tusi. Afai o le a ou faaauau pea o se faifeautalai, e tatau ona ou iloa: pe moni ea?”
Faatasi ai ma ou mata o loo moeiini pea, sa ou suesueina le tusi.
Sa oo o’u lima i le Mosaea 1:6: “E, oʼu atalii e, ou te manao ia outou manatua ua moni nei upu, ma ua moni foi nei talafaamaumau. Ma faauta, o papatusi foi a Nifae, ia ua i ai talafaamaumau ma upu a o tatou tamā mai le taimi na latou tuua ai Ierusalema seia oo mai i le taimi nei, ua moni i latou; ma e mafai ona tatou iloa lo latou moni ona ua i ai i luma o o tatou mata.”
O na upu na taia ai a’u e aunoa ma se fuaitau o se mau na i ai muamua pe talu mai lena taimi. O soo se mea lava o le upu moni na oso ese mai le itulau. E pei ona saunoa Iosefa Samita e uiga i lona lava aafiaga, na “foliga mai na sili atu ona ulu mai ma le malosi tele i lagona uma o lou loto” ia upu (Iosefa Samita—Talafaasolopito 1:12). Sa faafuasei ona ou lagonaina le faatumulia o le toafilemu ma le faamoemoega nai lo le fefe po o le popole.
I se taimi vave lava, sa ou iloa ai o le Tusi a Mamona o le afioga a le Atua ma sa auina mai e le Tama Faalelagi lena savali ia te a’u. Sa pei o Ia fetalai mai ia te a’u, Ua uma ona e iloa. Alu loa e galue.
Ma sa ou faia.
Aisea e Faatali ai?
Sa ou suesue ma tatalo e uiga i le moni o le Tusi a Mamona mo le tele o tausaga ae ou te lei mauaina se tali. O lea na ou mafaufau ai, Aisea na tatau ai ona ou faatalitali mo se taimi umi mo le faaaliga e moni? Pe sa le lava ea lo’u faamaoni? Pe na le lava ea foi lo’u faatuatua? Masalo! Ae, ailoga. Ou te manatu na faatalitali le Alii mo se avanoa lelei e aoao mai ai ia te au se lesona taua: o faaaliga e le o se mataupu faigofie.
E le oo mai faaaliga ona tatou te mananao ai. E oo mai faaaliga pe a tatou manaomiaina. Ma e oo mai i le taimi a le Tama Faalelagi, ae le o o tatou ala. Na te silafia o tatou manaoga, ma e mafai ona tatou faatuatuaina Lana fuafuaga ia avea ma fuafuaga sili—e tusa lava pe manaomia ai se onosai.
Na aoao mai Elder David P. Homer o le Fitugafulu e faapea “o nisi taimi e telegese ai lava ona oo mai tali . . . aua e le o le taimi sao lea, aua e le manaomia se tali, pe ona ua faatuatuaina i tatou e le Atua e faia le faaiuga mo i tatou lava” (“Faalogoina o Lona Siufofoga,” Liahona, Me 2019, 43).
O nisi taimi ou te manatu ai e tele atu le faatuatuaina o a’u e le Atua nai lo a’u ia te a’u lava ia! E taufaafefe le faia o faaiuga taua e aunoa ma le taitaiga mai ia te ia. Ae a ou popole tele i ai, ou te manatuaina le folafolaga lenei mai ia Elder Richard G. Scott (1928–2015) o le Korama a Aposetolo e Toasefululua: “A e ola amiotonu ma o loo e galue ma le faatuatua, o le a le tuuina oe e le Atua e agai mamao atu e aunoa ma se uunaiga o le lapataiga pe afai na e faia se filifiliga sese” (“Faaaogaina o le Meaalofa Faalelagi o le Tatalo,” Liahona, Me 2007, 10).
A tatou faia le mea e mafai ona tatou faia e maua ai tali ma faia ni filifiliga lelei, e mafai ona tatou mautinoa o le a taialaina i tatou e le Tama Faalelagi, e tusa lava pe tatou te le iloaina Ona ala. E le tatau ona tatou fefefe. O loo leoleoina i tatou e le Tama Faalelagi ma le alofa. O le a oo mai faaaliga—atonu e le o taimi tatou te mananao ai, ae pe a tatou manaomia moni lava.