Berglind Guðnason
Árnessýsla, Iceland
Berglind (imawi) vata kei na tacina yalewa o Elín ena (imatau). Ni yacovi Berglind edua na yaluma titobu ni lomabibi e se qai bau sotava, a vakila ni a sega ni rawa ni toso tale. Ena nona dolavi koya mai ena vuku ni leqa e sotava tiko vei ira na lewe ni matavuvale kei na itokani, sa kunea o koya na bula sereki vaka vakasama ka vakayalo tale ga ena vei iyaragi e sa vakarautaka tu na Tamada Vakalomalagi.
Mindy Selu, Dauveitaba
E sa dau yacovi au tu mai na bula ni lomabibi niu se qai yabaki 13. Ena dua na gauna, sa ca vakalevu sara na veika kece kau nanuma meu sa kauta tani na noqu bula. Au vakila ni sa sega na noqu inuinui ena gauna o ya. Au a nanuma, “Au na sega sara ni kune marau. Au na sega ni rawata edua na ka.”
A yaco e dua na gauna au nanuma kina ni iwali ni noqu leqa o ya meu biuta na Lotu baleta niu sa sega tale ni nuitaka e dua na ka. E rawarawa sara mo cakava na veika e sega ni dodonu mo dau cakava e Iceland. Na Lotu e lailai sara eke. O au ga kei iratou na taciqu keitou lewe ni neitou kalasi ni Lotu ena neitou tubu cake mai. Au vakila na galili kei na dua na gauna au sega ni vinakata meu laki Lotu.
E vuqa na tamata e Iceland era biliga vakatikitiki na Lotu. Era sa tekivu gunu na tamata ni ra se gone. Au mai coriti ena veika o ya, kau mani sega tu kina ni lotu ena dua na gauna ena noqu bula. Au sega ni vakasakita na tikina o ya, ia e dua na tiki ni ka au sotava ka au vuli mai kina. Au a vulica edua na vosa nei Elder Jeffery R. Holland kau taleitaka na ka e kaya: “Na bula makawa meda vuli mai kina ka kua ni bula tiko kina. … Ni da vulica oti na veika e gadrevi meda vulica … , meda qai rai ki liu, ka nanuma tiko ni vakabauta e dau vakanamata tiko ga ki liu.”1
Ena dua na siga niu a sotava tiko na dredre, au wilika sara na noqu veivakalougatataki vakapeteriaki. Niu wilika tiko, Au qai kila ni tiko na noqu veisiga ni mataka. Na Kalou e tiko e dua nona ituvatuva me baleti au, ka lomani au tale ga. Na lako ki Lotu, vakayagataka na sakaramede, wiliki ni ivolanikalou kei na masu sa kauta mai na rarama kei na bula marau vakalevu ki na noqu bula. Au sa qai kidava mai, “Ni veika oqo era vukei au sara ga.” Oqori na gauna au kila kina niu a dau vinakata tu ga na kosipeli ena noqu bula. Niu lako sivita mai na veika au sotava, au kila ni kosipeli e maroroya na noqu bula, kau sa marau sara ga kina.
Na veitalanoataki ni noqu bula ni lomabibi kei na matavuvale kei na itokani e sa veivuke sara vakalevu. E veimuataki ki na veivuke tale eso. Au a sega ni vinakata meu gunu wainimate se lako vei ira na kenadau ni mate oqo. Au dau tukuna tiko ga vei au, “E tiko kei au na Kalou.” Ia sa vakarautaka na Kalou na iyaya e vuqa tale eso, me vaka na wainimate kei na veivakasalataki, me da vakayagataka me ikuri ni veika vakayalo.
Niu sa tekivu wilika vakalevu cake na noqu ivolanikalou ena veisiga ka toro voleka vua na Kalou ena masu, au a ciqoma e vuqa na veivakalougatataki kei na ivakatakila ka sa noqu inaki oya me na vukei ira na tani. Au vakila ni vuqa vei keda eda sotava na leqa ni bulabula ni vakasama ka da tovolea meda vunitaka tu. Na noqu bula ni lomabibi kei na veidredre e sotavi sa vakavulica vei au ni sa vinaka cake meda dolavi keda ka veitalanoa vata kei ira na tani. O noqu itokani e qai dolavi koya mai vei au me baleta na nona sotava tiko na bula ni lomabibi. Keirau veivosakitaka sara ka keirau waqa vata tiko ena veika oqo.
Eda sega soti ni dau raica na dredre era sotava tiko na so, ia au dau veilakoyaki voli ena so na gauna ka raici ira na tani ka vakila ni Kalou e kilai keda vakayadua sara. E lomani keda o koya ka kila vakavinaka na cava eda lako curuma tiko. Ka rawa ni da veivukei vakai keda.
Ena veigauna ni noqu bula lomabibi, au sa vulica meu dau taroga, “Na cava au rawa ni vulica mai na dredre oqo?” ka sega ni “A cava au sotava kina na dredre oqo?” Au taleitaka na Ica 12:27, e kaya kina ena qai vakayacora me vu ni nodra kaukauwa na veika malumalumu kevaka eda sa vakabauti Jisu Karisito. Oqo e dau veivakacegui vei au.
Eda a digitaka kece meda lako mai ki vuravura. Eda a kila ni da na mai sotava na rarawa ena vuku ni veivakatovolei. Oqo na vuna e yaco kina na bula me taleitaki. Baleta ni da sa kila tiko na veika vinaka ena yaco mai. Eda kila ni kevaka eda muria na iVakabula ena veigauna dredre e rawa ni noda na bula tawamudu kei na veivakalougatataki kece sara sa waraki keda tu.
Kau sa raica rawa sara na noqu sa veisau ena vuku ni dredre au a lako curuma mai. Na Veisorovaki ni iVakabula e dina, sa veisautaki na yaloqu, kau sa tekivu me kaukauwa cake. Au vakila ni vaka au sa duatani mai na kequ ituvaki me vaka e liu. Era vakila na tamata ka ra kaya, “O iko sa duatani.” Edua na gonevuli e koronivuli e kaya, “Au raica e dua na duidui kei na rarama vei iko.” E matalia baleta e sega ni lewe ni lotu o koya, ka keirau se bera ni bau veitalanoa vinaka mada mai liu.
Ena gauna a bibi tu kina na kequ mate, era dau kaya vei au na tamata, “Ena yaco me vinaka cake.” Au sa dau oca sara ga ni rogoca, e dina ni matalia na kena i irogorogo, ia e sa ka dina.
Ia o iko o vinakata mo bula vinaka mai. Au sa vulica ni o sega ni rawa ni namaka mo vinaka cake ena nomu sega ni cakava e dua na ka. E dodonu mo na vinakata mo marau ka vakabauta ni ko rawa ni rawa-ka ka tiko nomu veisiga ni mataka. Sa ka bibi mo nanuma tiko ni o lomani mai vei ira e vuqa na tamata, oka kina na Tamada Vakalomalagi. Era sa tiko taucoko me ra vukei iko.
Au sega ni tadra niu na mai tiko marau me vaka au sotava tu oqo. Eso na gauna au se sasaga bula tiko, ia ena vei iyaragi sa solia vei au na Tamada Vakalomalagi, au sa rawa ni valuta kina. Oqo, niu vakila niu lutu tiko yani ki na na bula ni lomabibi au dau kaya vei au niu ka lomani, e tiko na tamata meu vosa vei ira, ka na yaco me vinaka na ka kece.
Na sotavi ni leqa ni bula lomabibi sa vakayacori Berglind me vakila vakavinaka cake kina na sala e rawa ni da veivukei kina vakai keda ena lako curumi ni bolebole. “Na Kalou e kilai keda vaka yadua sara, Ka lomani keda, ka kila vinaka na veika kece eda lako curuma tiko. Ka da rawa ni veivukei vaka i keda.”
O Berglind sa raica vei koya e dua na veisau ena vuku ni veibolebole ni nona bula. “Na Veisorovaki ni iVakabula e ka dina,” a kaya. “Sa veisau na yaloqu, kau sa yaco me kaukauwa mai. Au vakila niu sa duatani mai na kequ ituvaki me vaka e liu.”
“Niu sa tekivu wilika vakalevu cake na noqu ivolanikalou ena veisiga” e tukuna o Berglind, “Au sa ciqoma e vuqa na veivakalougatataki kei na ivakatakila ka sa noqu inaki meu vukei ira na tani. Au taleitaka na Ica 12:27, e kaya kina enai qai vakayacora me vu ni nodra kaukauwa na veika malumalumu kevaka eda sa vakabauti Jisu Karisito. Oqo e dau veivakacegui vei au.”