Kairake n Ikawai
Teuana te Bwai ibukin Taai Aika Ana Roko ae I Kona ni Baireia
Kamataata n te tamnei iroun Getty Images
Te namakin are e teimatoa inanou e a kaangaanga bwa N aki tabe iai. Ai bon 28 au ririki, I teimatoa n tuai n iein ao I aki koaua raoi n te bwai are I tangiria ni karaoia ni mwkuri aika a ririeta e ngae ngke e rang tamaroa au mwakuri ae te neeti ni kabung. I namakinna bwa aron nako maiu a bon aki nakoraoi. I nanououa n rinerine inanon maiu ao I aki ataia bwa te kawai raa ae N na toua. I a bon namakinna ae I bua.
N te bong teuana ngke I a namakina te bwarannano, temanna te rao ae I tuai man taetae ma ngaia n te tai ae maan e a tarebooniai. Ngke e titiraki bwa I uara, I kabwarabwarai namakin akanne ni kabane ake I bon korakai ni kaitarai. E ongora ao imwiina e taku, “E Raoiroi, ma e uara maium n tamnei?”
“O eng, anne e nakoraoi,” I a bon kaeka naba n ae tawe. “I tuai n namakina ae aekakin aei mai imwaina ma I a kaan riki nakon te Atua inanon maiu.”
E kaeka, “Ngkanne ko na aki raraoma n tebwai riki teuana.”
Onimaki n Ana Baire te Atua ae Kororaoi
Man te maroro anne, I a atai bwaai aika uoua. Te moan, I kakaitau bwa iai au koaua ae matoatoa n te euangkerio are e a tia ni kaokaki ao ni kona ni maiuakin tuua ao n namakina te reitaki ma karawa.
Maiuakinan te riki n toronibwai n te maiu n tamnei e rangi ni kakaawaki irou, ao I teimatoa n reiakinna bwa N na kanga ni karekei kaotioti mai i karawa ni maiu. Te tataro ao kamatebwaian booki aika tabu ni katoa ingabong bon bwaai aika beebete ake I namakinna bwa a karika te bitaki ae korakora nakoiu ni karekean kaotioti. I namakina naba te reitaki ma karawa ngke I kataia ni karaoa te akoi, ni maiuakina te marurung bwa e aonga n riki bwa raou n tainako te Tamnei, n ongotaeka nakon tuua, ao n rairannano ni koaua.
Te kauoua, I ataia bwa au kaeka nakon ana titiraki raraou e bon aki eti—I iango bwa e bon “kororaoi” maiun tamneiu, ma I riai ni karekea riki te onimaki, n aki rangi n raraoma, ao n onimakina te Atua bwa e na karaoi bwaai ake I aki kona ni bairei taekaia.
Riki ngkana tabeua aron nako maiu aki nakoraoi n aron are I tangiria, I ataia bwa te bwai ae kakaawaki bon te mwakuri inanon te onimaki ao ni kaotia nakon te Atua bwa I kabongana inaomatau n rinerine ni karaoi rinerine aika a raraoi. I a tia n reiakinna bwa ngkana aki nakoraoi waaki inanon te maiu n aron are I kantaningaia, nanona bwa I kona n reirei ao n rikirake ni kawai ake n na bon aki kona ni karaoi.
I aki reke iangoana ae ngkana e koro 29 au ririki na raraoma ibukin au mwakuri ao te mwaneka are imwiina ni maiu. Ma, e ngae ngke ni kabane bwaai aikai a bane n aki ataaki, I kakoaua bwa te Atua iai ana baire ae kororaoi ibukiu. E ataia raoi bwa tera ae e na riki ao tera ae I kainnanoia, ao E na tararuai n tainako (taraa Mataio 6:28–34). N ai aron are e reirei Unimwaane L. Todd Budge man te Itingaun, “Ngkai e bon kangaanga aron ataakina, riki inanon maiura ngkana e korakora te kakaitara ao maiura a kaangaanga, ti kona n namakina te rau n atakina bwa te Atua n raoiroina ae aki totoki ni buokiira ni karokoira nakon mweengara i karawa,” (“Consistent and Resilient Trust,” Liahona, Nov. 2019, 48).
Karaka riki te Onimaki, Kauarerekea te Raraoma
Ni boong tabeua e moanna ni kaangaanga aron te maiu, ma ngkana I iangoia raoi, I ataia bwa n na bon aki raraoma. Teutana imwiin teutana, I a ataia bwa I riai n onimakina te Atua teutana riki ao ni kauarerekea raraomaeakinan bwaai aika I aki kona ni bairei. Teuana te bwai I kona ni baireia ibukin taai aika a na roko bon onimakinan te Atua ao ni mwakuriia bwa N na rikirake ni kaan riki nakoIna ni katoabong.
Ngkana I namakina te bua, e na bon tau te ota ibukiu bwa N na waaki rake inanon baika I aki atai ao ni waaki nako. Ao ngkana I kamwakura te onimaki ao n teimatoa iaon te berita, ngkana I teimatoa n uringnga bwa antai raoi ngai ae natiia kaaro ake i Karawa ao ni kataia ao ni manga kataia riki, a na bon riki bwaai n aroia are a kantaningaaki iai, ao anne riki te bwai ae kakaawaki.