Fakaʻilekitulōnika Pē: Kakai Lalahi Kei Talavoú
Founga ʻOku ʻAonga ai e Mālohi Faifakamoʻui ʻa e Fakamoʻuí ki he Fakatomala mei he Angahala Fakasekisualé
ʻI heʻeku hoko ko e pīsope ʻo ha uooti ʻa e kau taautaha kei talavoú, ne u ngāue ai mo e kakai lalahi kei talavoú ke tokoniʻi kinautolu ke nau fakatomala mo fakamaʻa kinautolu ʻe he Fakalelei ʻa Sīsū Kalaisí.
ʻI heʻeku hoko ko e pīsope ʻo ha uooti ʻa e kau taautaha kei talavoú, ne u ngāue ai mo ha kakai lalahi kei talavou tokolahi ke tokoniʻi kinautolu ke nau fakatomala mo maʻa mei he angahala fakasekisualé. Kapau ʻokú ke foua e hala fonongá ni, ʻoku ʻikai fekauʻaki e fakamatalá ni mo e ngaahi sitepu ʻo e fakatomalá—ʻoku fekauʻaki ia mo e founga ʻoku fakaʻaongaʻi ai kiate koe e mālohi faifakamoʻui ʻo Sīsū Kalaisí mo e ngaahi tāpuaki ʻo ʻEne Fakaleleí. ʻOku ou lotua ke ke ongoʻi ha ʻamanaki lelei ʻi hoʻo ʻiloʻi e lahi ʻo ʻEne ʻofa mo e Tamai Hēvaní ʻiate koé.
Ne maʻu ʻe he tokolahi ʻo e kakai lalahi kei talavou ne u ngāue mo iá ha fakakaukau hala fekauʻaki mo e fakatomala mei he angahala fakasekisualé. Te nau fai ha ngaahi lea hangē ko e, “He ʻikai fie teiti pe mali ha taha ia mo au koeʻuhí naʻá ku ʻosi feohi fakasekisuale kimuʻa,” “ʻOku ou ongoʻi hangē ʻoku ʻikai ke u taau au mo ha taha he kuó u fefaʻuhi mo e ponokalafí,” “Kuo mole hoku faingamālie ke mali temipalé koeʻuhí ko ʻeku ngaahi fehalākí,” pe, “He ʻikai ke u toe lava ʻo akoʻi e fono ʻo e angamaʻá ki ha kau mēmipa kehe pe ki heʻeku fānau he kahaʻú he kuó u maumauʻi ia.”
Ko hono moʻoní, ne ʻikai ke nau tui ʻe lava ʻe he Fakamoʻuí ʻo toʻo moʻoni ʻenau “angahala kula ʻahoʻahó” pea ʻai ia ke hangē “ko e ʻuha hinaekiakí” (vakai, ʻĪsaia 1:18). Ne nau aofangatuku hala ʻo pehē: “ʻI he lahi ʻeku fakatomalá pea ʻi he lahi e fakamolemole ʻa e Fakamoʻuí, te Ne lava ʻo liliu ʻeku ngaahi angahalá mei heʻene kula mumuú ki he lanu pingikī maama.”1
ʻOku ʻikai maʻu e faʻahinga fakakaukau ko ʻení mei he Tamai Hēvaní. ʻOku maʻu ia meia Sētane, ʻa ia ʻokú ne loto ke ke fakakaukau kuo taumuʻa valea hoʻo kahaʻú koeʻuhí ko hoʻo ngaahi fehalākí. Ka, ʻoku finangalo e Tamai Hēvaní ke ke ongoʻi ʻamanaki lelei ʻo fakafou ʻi he Fakamoʻuí. ʻOkú Ne finangalo ke mahino kiate koe ʻa e tokāteliné ʻi hono fakaleá tonu: “ʻe hinehina hoʻo ngaahi angahalá ʻo hangē ko e ʻuha hinaekiakí”—kae ʻikai lanu pingikī.
Ngaahi Lēsoni fekauʻaki mo e ʻOfa ʻa e ʻOtuá
Te ke lava ʻo vakai ki he moʻoni ʻo e ongo ʻoku maʻu ʻe he Tamai Hēvaní kiate koe ʻi hoʻo fakatomala mei he angahala fakasekisualé, ʻi he talanoa fakatātā ʻo e foha maumau koloá (vakai, Luke 15:11–32). Ko e foha maumau koloá ko ha fakatātā fakaofo ia ʻo e ngaahi angahala kehekehé, ka ʻoku akoʻi ʻe he Fakamoʻuí e talanoa fakatātā ko ʻení ʻi he tuʻunga fakamamahi tahá koeʻuhí ke tau lava kotoa ʻo ʻiloʻi ʻoku ʻofa e Tamai Hēvaní ʻiate kitautolu ʻo tatau ai pē pe ko e hā pea ʻoku fakaʻaongaʻi e Fakalelei ʻa Sīsū Kalaisí kiate kitautolu hono kotoa.
Ko ha lēsoni ʻeni ʻe tolu te tau lava ʻo ako mei he foha maumau koloá:
-
ʻIloʻi Ko e ʻUluaki Sitepú ʻa Hono ʻIloʻi ʻOku Fie Maʻu Ke Ke Fakatomalá
Hangē ko e foha maumau koloá, mahalo kuo ʻi ai ha taimi kuó ke vakavakaiʻi moʻoni ai koe ʻi “[hoʻo] potó” (vakai, Luke 15:17) ʻo ʻiloʻi ʻoku fie maʻu ke ke liliu pe fakatomala. ʻOku ʻikai fakamā e ngaahi momeniti ko ʻení; ko ha ngaahi momeniti ia kuo ʻomi ʻe he ʻOtuá te ke lava ai ʻo maʻu ha ʻamanaki lelei ʻe fakamolemoleʻi koe. Ko ho ʻuluaki sitepu ʻeni ki he Fakamoʻuí.
-
Maʻu ha Mahino Kuo Teʻeki Liliu ho Mahuʻingá
ʻOku ou fakakaukauloto ki he foha maumau koloá, ʻi he ʻikai mahino kiate ia e mālohi ʻo e Fakamoʻuí mo e ngaahi tāpuaki ʻo ʻEne Fakaleleí, naʻá ne tomuʻa fakakaukau kuo liliu e meʻa te ne lava aʻusiá, ko hono mahuʻingá, mo e kahaʻú koeʻuhí ko ʻene ngaahi angahalá. Naʻá ne mahalo te ne toe foki ʻo ʻikai toe laka ange ʻi ha “tamaioʻeiki [ngāue] totongi.” Ka ko hono moʻoní, naʻá ne kei hoko pē ko ha foha ʻofeina, ʻo hangē tofu pē ko hoʻo hoko maʻu ai pē ko ha ʻofefine pe foha fakalangi ʻofeina ʻo e ʻOtuá.
-
ʻIloʻi ʻOku Tatali Mai e Tamai Hēvaní mo e Fakamoʻuí ke Fakamolemoleʻi Koe
ʻOku fakamatalaʻi ʻe hotau Fakamoʻuí e fakafeangai ʻa e tamaí ʻi he taimi ne foki mai ai e foha maumau koloá, ke akoʻi e ongo ʻoku maʻu ʻe he Tamai Hēvaní kiate koe ʻi hoʻo tautapa kiate Iá: “Ka ʻi heʻene kei mamaʻo ʻaupitó, naʻe mamata ʻa ʻene tamaí kiate ia, pea manavaʻofa, mo lele, pea fāʻofua ia, ʻo ʻuma kiate ia” (Luke 15:20).
ʻOku ou tui naʻe fakaʻohovale ki he foha maumau koloá e fakafeangai ʻa e tamaí. ʻOku ou fakakaukauloto atu ki heʻene halotulotú, mo sio ki he fofonga ʻene tamaí, pea pehē, “kuó u angahala ki he langí, pea ʻi ho ʻaó, pea ʻoku ʻikai te u kei ʻaonga ke ui ko ho foha” (Luke 15:21). Ka naʻe fakatui leva ʻe he tamaí ha pulupulu ki he uma ʻa hono fohá mo ha mama ki hono nimá. Ne ʻikai ke ne fakamaaʻi hono fohá, ne ʻikai ke ne ʻita, ne ʻikai ke ne fakamālohiʻi ia ke ne kole fakamamate, pea naʻe ʻikai ke ne teitei tafuluʻi ia—naʻá ne fiefia pē ʻi he maʻu ʻe hono fohá ha liliu ʻo e lotó pea foki ange kiate iá.
Ko ha momeniti mahuʻinga ʻeni ʻoku tokoni ki hono fakatātaaʻi e founga ʻo e tali ʻa e Tamai Hēvaní ʻi hoʻo foua e ʻuluaki sitepu ko ia ki he fakatomalá. ʻOkú Ne tatali atu mo finangalo ke fakamolemoleʻi koe. ʻOkú Ne fiefia fakatouʻosi mo e Fakamoʻuí ʻi he taimi ʻokú ke tautapa ai kiate Kinaua ke tokoniʻi koe ke ikunaʻi hoʻo ngaahi angahalá.
Ko e Tāpuaki ʻo e Fakatomalá
Ko hoku fatongia ko e pīsopé ke tokoni ki he kakai lalahi kei talavoú ke nau fakaʻaongaʻi e mālohi ʻo e Fakamoʻuí mo e ngaahi tāpuaki ʻo ʻEne Fakaleleí. Ne u feinga ke muimui ʻi he sīpinga ʻo e ʻofa ʻa e Tamai Hēvaní ki he kakai lalahi kei talavou loto-toʻa (ʻoku ou lau honau niʻihi ko ha kau moʻungaʻi tangata), ʻa ia ne nau loto-fiemālie ke vahevahe mai ʻenau ngaahi angahalá, ko e fakaʻamu ke fakaleleiʻi kinautolu ʻe he Fakamoʻuí. Pea ne u mātā hono fakahoko e fakalelei ko iá.
Ka ne u mātā foki e fefaʻuhi ʻa e tokolahi ʻo e kakai lalahi kei talavoú ni mo Sētane, ʻa ia naʻá ne lohiakiʻi kinautolu ke fakapōpulaʻi ai pē kinautolu. ʻOku ʻikai ngata pē ʻi he ikuna ʻa Sētane ʻi hoʻo faiangahalá—ka ʻokú ne toe ikuna foki kapau te ne fakalotoʻi koe ʻoku ʻikai haʻo mahuʻinga, ʻoku ʻikai ʻofa ʻa e ʻOtuá ʻiate koe, pea ʻoku ʻikai ha ʻamanaki lelei ki hoʻo tūkungá he ʻoku ʻikai ʻaonga kiate koe ʻa e Fakalelei ʻa e Fakamoʻuí. ʻOkú ne ikuna ʻi he taimi ʻokú ne lava ai ʻo fakalotoʻi koe he ʻikai pē ke teitei fakamolemoleʻi kakato hoʻo ngaahi angahalá.
Ka ʻoku ʻikai teitei moʻoni ia.
Naʻe fakamatalaʻi ʻe Palesiteni Lāsolo M. Nalesoni ʻo pehē “ʻoku tokolahi fau ha kakai ʻoku nau lau e fakatomalá ko e tautea—ko ha meʻa ke fakaʻehiʻehi mei ai tukukehe pē ngaahi tūkunga mafatukitukí. Ka ʻoku fakatupu e ongoʻi tauteaʻi ko ʻení ʻe Sētane. ʻOkú ne feinga ke taʻofi kitautolu mei heʻetau hanga kia [Sīsū] Kalaisi, ʻoku tuʻu ʻo mafao mai Hono toʻukupú, ʻo ʻamanaki mo fie fakamoʻui, fakamolemoleʻi, fakamaʻa, fakaivia, fakahaohaoaʻi, pea mo fakamāʻoniʻoniʻi kitautolu.”2
Ko e fakatomalá ko ha meʻa fakafoʻituitui ia ʻoku kamata ʻaki e mamahi ʻoku taau mo e ʻOtuá pea fakaʻosi ʻaki ha liliu ʻo e lotó —mo e ʻulungāngá. ʻOku ʻikai ko ha ngāue fakamīsini ia pe ko ha lisi vakaiʻi, pea ʻoku ʻatā ia ki he taha kotoa pē.
Kapau ʻoku fie maʻu ke ke fakatomala mei he angahala fakasekisualé, ʻoku ou fakaafeʻi koe ke ke kamata ʻaki haʻo lotu ki he Tamai Hēvaní pea ngāue mo hoʻo pīsopé pe palesiteni fakakoló. Fakahoko e fakatomalá ʻaki ha loto-hangamālie moʻoni. Ko e Fakalelei ʻa Sīsū Kalaisí ko e meʻaʻofa maʻongoʻonga taha ia kuo foaki maí. Koeʻuhí ko Ia, te ke lava ʻo siʻaki hoʻo ngaahi angahalá pea toe hoko pē “ʻo hangē ko e ʻuha hinaekiakí.” Koeʻuhí ko Ia, te ke lava ʻo lelei ange ʻi hoʻo tuʻunga kimuʻá. Koeʻuhí ko Ia, te ke lava ʻo laka ki muʻa mo maʻu ha ʻamanaki lelei mo ha loto-falala ki ha moʻui fiefia ʻi he kahaʻú.