Kakai Lalahi Kei Talavoú
ʻOku ʻAfioʻi ʻe he Fakamoʻuí ho Mamahí
Faitā ʻa Ashlee Larsen
Lolotonga ʻetau fononga ʻi he māmaní, ko e tokolahi taha ʻo kitautolú ʻe ʻi ai ha taimi te tau ongosia ai ʻi he loto-mafasiá, fefūsiaki ʻi he loto-hohaʻá, ʻao fakapōpoʻuli ʻo e loto-mamahí, pe naʻa mo e (hangē ko aú) kakapu ongonoa ʻo e loto-taʻotaʻomiá. Ko ha ngaahi ongo eni ʻoku aʻusia ʻe he tokolahi ʻo kitautolu ʻi he hala ki he fiefiá, ka ʻe faingofua ke nau fakatupu ke tau ongoʻi kuo siva e ʻamanakí.
ʻE lava ke hoko mai e faingataʻaʻia fakaeʻatamaí ʻi he taimi ʻoku ʻikai te ke ʻamanaki ai ki aí. ʻI he taimi ʻokú ke ngāue fakafaifekau ai pea lahi fau hoʻo tokanga taha ki he niʻihi kehé kae ngalo koé. ʻI he taimi ʻokú ke maʻu ai ha pēpē peá ke ongoʻi ʻoku totonu ko e tokotaha fiefia taha pē koe ʻi he māmaní, ka ʻoku ʻikaí. ʻI he taimi ʻoku mole ai haʻo ʻofaʻanga pea ʻikai te ke lava ʻo mafakakaukaua e moʻui taʻekau ai ʻa kinautolú. Pe naʻa mo e taimi ʻoku hā ngali lelei ai e meʻa kotoa pē, ka ʻoku lōmekina koe ʻe ha ongo ʻoku ʻikai ke ke saí.
Ko e ngaahi momeniti ʻeni ʻoku fie maʻu ai ke tau fakafonu ʻetau moʻuí ʻaki e nonga ʻo e ʻofa taʻefakangatangata ʻa Sīsū Kalaisí. ʻOku ʻi ai maʻu pē hotau Fakamoʻuí, ʻo aʻu ki he taimi ʻoku tau ongoʻi liʻekina pe hē aí. Kuó Ne ongoʻi ho mamahí mo ʻafioʻi e founga ke tokoni aí.
ʻOua naʻá ke manavasiʻi ke kumi tokoni. Ko e konga ʻo e palani ʻa e Tamai Hēvaní ke feʻofaʻaki mo fetokoniʻaki (vakai, Mōsaia 18:21). Pea ko e meʻa ia ʻoku nofotaha ai e konga ʻi he māhina ní—ko hono ikunaʻi e faingataʻaʻia e moʻui lelei fakaeʻatamaí ʻi he kole tokoni ki he niʻihi kehé, tautautefito ki he Fakamoʻuí.
ʻOku ʻofeina koe.
Mei ha taha ʻoku kei faingataʻaʻia pē mo kei feinga pē,
Emilia Brändh