Mga Young Adult
Makakita Kamo og Kagawasan
Ikaw ba o ang usa ka tawo nga imong gimahal natanggong sa pabalik-balik nga kasaypanan, sa paghinulsol, sa pagpasalig og usab, ug pagkasayop na usab? Daghang talagsaong mga young adult nga akong nakauban samtang nagserbisyo isip usa ka bishop sa young single adult nga ward ang nangatanggong sa mao ra gihapon nga pabalik-balik nga sayop. Apan daghan usab ang nakakaplag og kagawasan pinaagi sa Pag-ula ni Jesukristo. Ang mga mensahe mahitungod sa pagkaadik nga seksyon niining bulana nagtanyag og mapuslanon nga mga pagtulun-an aron sa pagpangita og kagawasan—sa inyong kaugalingon ug sa uban.
Ang labing importanting butang nga kinahanglan natong hinumduman mao nga kitang tanan mga pinalangga nga anak sa Langitnong Amahan. Si Elder Dieter F. Uchtdorf mitudlo nga, “ang [Dios] wala maghulat nga higugmaon kamo hangtud nga inyong mabuntog ang inyong mga kahuyang ug bati nga mga batasan. Siya nahigugma ninyo karon uban sa hingpit nga pagsabut sa tanan ninyong panlimbasug. … Nasayud Siya sa inyong pagmahay sa panahon nga kamo nasayop o napakyas. Ug Siya nahigugma gihapon kaninyo”(“Pagsunod sa Ebanghelyo nga Malipayon,“ Liahona, Nob. 2014, 123).
Sa laing bahin, si Satanas mosulay sa pagkumbinser kaninyo nga kamo dili na matabangan ug walay labot sa gugma sa Langitnong Amahan ug sa gahum sa Manluluwas sa pag-usab ug paglimpyo kaninyo. Si Satanas maningkamot nga ipabilin kamo diha sa usa ka pagbati nga walay kalingkawasan sa kaulaw ug kalagot sa kaugalingon, apan ayaw og tuo sa iyang mga bakak.
Hinoon, balik ngadto sa Langitnong Amahan. Ayaw kahadlok sa pagtug-an ngadto sa inyong bishop o branch president ug sa uban kinsa nagmahal kaninyo. Samtang magbasa kamo sa mga istorya sa paglaum gikan sa uban nga mga young adult kinsa apektado sa pagkaadik, lihoka ang mga impresyon nga inyong nadawat. Pagmapailubon sa inyong kaugalingon, hinumdumi ang inyong balaanon nga kinaiyahan, hinay-hinay lang, ug tuo diha sa makaayo nga gahum ni Jesukristo. Siya ug daghan pa nga mga kapanguhaan makatabang kanato nga molampos sa pagpangita sa kagawasan nga atong gitinguha. Ayaw gayud paghunong.
Ang inyong higala,
Richard Ostler