Mauaina o Tali: Mai le Uso i le Uso [Uso o le Aualofa]
Faatasi Ai ma le Faateleina o le Pogisa o le Lalolagi, E Mafai Faapefea ona Tatou Maua le Faamoemoe ma le Olioli?
O se fesili e toatele uso faamaoni ua fesili ai, e aofia ai ma au.
Ua ia te au lenei mausa leaga o le ta’u atu i le Tama Faalelagi mea ou te manatu e mafai ma lē mafai ona ou taulimaina. Ou te manatua lou ta’u atu ia te Ia i se tasi taimi ao ou laitiiti ou te lei manao e ola i aso e gata ai ona sa ou iloa lava o le a le mafai ona ou tatalia taimi amioleaga ma leaga faapena.
A o faagasolo le olaga, o loo o’u faapea ifo lava ia te au e le mafai ona ou taulimaina le pogisa faateteleina i le lalolagi.
O le mea e ese ai, ua fai mai lo’u faamanuiaga faapeteriaka o le a ou maua le olioli i lenei olaga. E tele taimi ou te le malamalama ai i le faamoemoe mai o le Atua ou te maua le olioli i se lalolagi e toatele tagata e filifilia, lagolagoina, ma faatupulaia le leaga.
E faapefea ona maua e se tasi le faamoemoe po o le olioli tumau i se lalolagi faapena?
O lenei vaaiga le fesopoai i le va o mea ua ta’u mai e lo’u faamanuiaga faapeteriaka e mafai, ma foliga o le lalolagi i aso nei ua taitai atu ai au e suesue i le matafaioi o le faamoemoe ma le olioli i le talalelei a Iesu Keriso.
Faamoemoe
Ina ua amata ona ou aoao e uiga i le faamoemoe, na ou tau ai i se saunoaga a Elder StevenE. Snow, o se Fitugafulu o le Pulega Aoao ua malolo: “O lo tatou faamoemoe i le Togiola [a Iesu Keriso] e faamalosia ai i tatou i se vaaiga e faavavau. O lena vaaiga e mafai ai ona tatou vaai ai i tua atu iinei ma le taimi nei e agai atu i le folafolaga o le faavavau. E le tatau ona taumaileia i tatou i tapulaa vaapiapi o faamoemoega femoumouai o le lalolagi.”1
Sa ou iloaina sa ou oo i lenei upumoni mamana i ni nai tausaga na muamua atu. O le taimi tonu lava ao lei faamaeaina lau misiona i Farani i Saute, sa osofaia e tagata faatupu faalavelave ia Pale, ma faapea ona matuai gatete ai tagata uma o le atunuu. Ina ua matou o atu i tagata i le vaiaso na sosoo ai, sa masani ona latou fesili mai ia i matou pe na faapefea ona i ai pea o matou faatuatua ao faataga e le Atua ia mea leaga e tutupu. Matou te faasoa atu ni tala o tusitusiga paia ia i latou, ma matou aoao atu e uiga i le alofa o le Atua ma le fuafuaga o le fiafia. O tagata o e na mafai ona toe maua le faamoemoe, o i latou ia na faalogo i la matou savali ma taumafai ina ia i ai se vaaiga e faavavau.
Na saunoa Peresitene RussellM. Nelson e faapea: “Afai e leai se faamoemoe ia Keriso, e leai se faailoaga o se fuafuaga paia mo le togiolaina o tagata. A aunoa ma lena malamalama, e talitonu sese tagata o le i ai i le olaga i le aso e sosoo ma le tineia taeao—o le fiafia ma fegalegaleaiga faaleaiga ua na o sina taimi.“2
Afai o le leai o se faamoemoe ia Keriso e mafua ai le faanoanoa lea tatou te vaai soo i ai i le lalolagi, e mautinoa lava o le faateleina o lo tatou faatuatua ma le faamoemoe ia Keriso e mafai ona fesoasoani ia i tatou ia maua le faamoemoe sili atu i le olaga. Na faamaonia mai e Elder JeffreyR. Holland o le Korama a Aposetolo e Toasefululua le mea lenei: “Ona ua toe faamautu mai e le Toefuataiga le upumoni faavae o lea e galue le Atua i lenei lalolagi, e mafai ona tatou faamoemoe, e tatau ona tatou faamoemoe, e tusa lava pe feagai ma mea le lelei e sili ona lofituina ai.”3
O nisi taimi e oo lava i le iloaina e tatau ona tuu atu lo tatou faamoemoe ia Keriso e le faapea e faigofie ai ona faia lena mea, aemaise lava i le faateleina o le pogisa i le lalolagi o loo siomia ai i tatou. Pe a amata ona ou lagona le lotovaivai, ou te fiafia e mafaufau i lenei fautuaga atamai mai ia KevinJ Worthen, o le Peresitene o le Iunivesite o Polika Iaga:
Afai tatou te mananao e faamalosia lo tatou faamoemoe, e tatau ona tatou taulai atili atu i le Faaola, ae maise lava pe a tatou lagona le leai o se faamoemoe. O se tasi o auala aupito faigofie ae sili ona mamana e mafai ona tatou faia ai lena mea o le mulimuli i Lana faataitaiga e ala i le auauna atu i isi. A o tatou faia faapea, o le a see atu o tatou taulaiga mai ia i tatou lava i isi, ma o le a amata ona tatou maua le manao mo lo latou manuia. O lena faamoemoe e mafai ona o faatasi ma le faamautinoaga e mafai e Keriso ona fesoasoani ia i latou ma e mafai ona Ia faia e ala ia i tatou. O lenei faaopoopoga o le faatuatua i o tatou manaoga amiotonu e mafai ona suia ai lo tatou faamoemoe itiiti tuputupu ae, i se faamoemoe tumau, mamana, ma sili atu ona lelei o le faamoemoe lea e mafai ona suia ai i tatou— ma isi.4
O le faia o mea tatou te latalata atili atu ai ia Keriso, e mafai ai ona tatou maua le faamoemoe sili atu i lo tatou lumanai, e tusa lava po o a mea e ono tutupu i le lalolagi o loo siomia ai i tatou. A o tatou faamalosia lo tatou sootaga ma Ia, o le a tatou aoao e vaai atu i le olaga e ala i se vaaiga e faavavau ma iloa ai o faigata ma tofotofoga tatou te feagai i lenei olaga “o le a na o sina minute laitiiti” (Mataupu Faavae ma Feagaiga 121:7).
Olioli
Ae faapefea le olioli? Pe tatou te le o i ai ea iinei ina ia tatou maua le olioli? (Tagai 2Nifae 2:25.) E mafai faapefea ona tatou maua le olioli pe a o faanoanoa mea uma ma o loo tatou faia le mea sili tatou te mafaia ia maua ai le faamoemoe mo se lumanai e sili atu ona lelei?
Na faauiga e Elder DavidA. Bednar o le Korama a Aposetolo e Toasefululuai se tasi taimi i le olioli: “O la tatou vaaiga i le talalelei e fesoasoani tatou te malamalama ai o le olioli e sili atu nai lo o se lagona i se taimi puupuu lava po o se lagona ootia; ae, o se meaalofa faaleagaga ma se tulaga o le faapei ma le avea ma ai. ”5
Ina ua ou faalogo atu o ia fai mai i lenei mea, sa ou suia loa le ala na ou faia ai lau sailiga mo le olioli. Ae na tau mai i lena taimi, sa ou saili mo se lagona o le fiafia mama, o se mea o le a le mafai lava ona aluese ma ufitia ai lagona uma o le faanoanoa po o le tiga. Ae o le faauigaga a Elder Bednar na tatalaina ai ou mata i le manatu atonu ou te lei mauaina le olioli lea na folafola mai ia te au ona sa ou saili mo le mea sese.
Nai lo le saili ia lagona le fiafia, sa tatau ona ou saili ina ia olioli.
E faapefea ona avea se tasi ma tagata olioli? Sa leai ma se mea na ou iloa.
Na faaopoopo mai Elder Bednar, “O le olioli e oo mai le faaaogaina o le faatuatua i le Alii o Iesu Keriso, ia agavaa e mauaina ma faamamaluina ma le faamaoni sauniga ma feagaiga paia ma taumafai ina ia loloto le liua i le Faaola ma Ona faamoemoega.”6
Na aoao mai foi Peresitene Nelson:
“O le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.…
“O le olioli o se meaalofa mo le au faamaoni. O se meaalofa e sau mai le taumafai ma le mafaufau i ai ia ola i se olaga amiotonu, e pei ona aoao mai e Iesu Keriso.”7
O lenei [aoaoga] sa faaosofia ai se malamalama ia te au a o ou mauaina nisi upumoni e uiga i le puna o le olioli.
Faatuatua ia Iesu Keriso? Ia liua loloto ia te Ia ma Ona faamoemoega? O mea nei sa ou faalogo i ai i lou olaga atoa. Pe o i latou moni ea o ki i le suia o ou lagona e uiga i le ola ai i le lalolagi i lenei taimi o le pogisa?
Ioe!
A o ou tomanatu i taimi i lou olaga ina ua ou lagonaina le faamoemoega sili ma le olioli, ua ou iloa ai e toetoe lava o taimi uma na ou taulai atu ai i le faamalosia o lau sootaga ma Keriso ma taumafai ia avea atili e faapei o Ia.
E ui lava atonu o loo ou tauivi pea i taimi o le faavauvau po o le faanoanoa, ae o loo ia te au le faamoemoe ma le faatuatua a o faaauau pea ona ou latalata atili atu ia Keriso, o le a i ai o Ia iina e fesoasoani ia te au i ou vaivaiga. Ou te faamoemoe o le a i ai se aso o le a ou maua ai se atoatoaga o le olioli, ma a o ou vaavaai mo le malamalama o le Faaola ma saili e avea ma se tagata fiafia e ui i tulaga faigata, o le a ou maua le ituaiga o olioli lea sa folafola mai ia te au i lou faamanuiaga faapeteriaka ma ua folafola mai ia i tatou uma—o “lo latou olioli o le a faatumuina e faavavau” (tagai 2 Nifae 9:18).