Mo Tina o Fanau Laiti
E i ai sou Faatuatua Faatamaitiiti ia Keriso?
Ua musuia a’u i le tele o auala e ala i le faatuatua o la’u lava fanau.
Ina ua asiasi atu Iesu Keriso i Amerika, o se tasi o mea muamua na Ia valaaulia Ona soo e fai o le “avea e pei o se tamaitiiti” (3 Nifae 11:38).
Aisea e taua ai lena mea? O tamaiti latou te le iloa mea uma. Ua fesili mai la’u tama e fa tausaga le matua i le tele o fesili—e le itiiti ifo ma le selau i le aso! Ae o lona fiailoa ma le galala mo le malamalama atonu o nisi ia o uiga lenatura faatamaitiiti ua finagalo le Faaola tatou te faataitai i ai.
A o ou matauina le tuputupu ae o lau fanau, e tolu ni lesona iloga ua latou faaali mai ia te au e uiga i lo latou faatuatua faatamaitiiti:
-
Ua ia i latou le faatuatuaga atoa i o latou matua.
A i ai se faafitauli pe fefefe la’u fanau teine, latou te vave valaau mai mo a’u po o lo’u toalua. Latou te le tutu ma mafaufau pe tatau ona latou maua le fesoasoani. Latou te le taumanatunatu pe ua lava lo latou usiusitai. Latou te iloa lava ma te alolofa ia i latou ma ua saunia e fesoasoani atu.
E mafai ona tatou faatuatuaina le Tama Faalelagi i le ala lava e tasi.
Ou te alofa i la’u fanau teine. Ae o lo’u alofa mo i latou e le mafaatusaina i le alofa o le Tama Faalelagi mo i tatou. O le taimi lava tatou te valaau atu ai i lo tatou Tama oi le Lagi, o le a i ai o Ia iina (tagai Iosua 1:9). E mafai ona tatou lagona i le taimi lava lena Lana faamafanafanaga ma le filemu, ma, faatasi ai ma le onosai ma le faatuatua, e mafai ona tatou maua tali i a tatou fesili.
Mo se faataitaiga, i ni nai tausaga ua mavae, sa tuuina mai ai ia te au se ofo fiafia mo se galuega. Ae sa ou popole o le a manaomia ai ona ou faigaluega i Aso Sa. A o ou tauivi e filifili po o le a le mea e fai, sa ou tatalo ma anapogi. Sa faatumulia a’u i le filemu ma sa uunaia foi a’u e fesili atu i le pule pe mafai ona ou malolo i Aso Sa. A aunoa ma lo’u faalagolago faatamaitiiti i le Tama Faalelagi, semanu ou te le maua lava le lototele e faatulaga ai lea tulaga, ae sa ioe i ai le pule. O lea, sa ou amataina ai se mataupu fou ma le fiafia.
-
Latou te le fesiligia mea ua aoaoina ai i latou.
A o laitiiti la’u tama teine, sa ia fesili mai ia te a’u pe aisea na pipi’i ai lana maneta i le pusa aisa ae le o le puipui o le fale. Sa ou faamatalaina le ala e galulue ai maneta, ma sa vave ona ia talitonu i lenei malamalama fou ma amata ona faataitai le maneta i soo se laualuga eseese.
E pei lava ona faatuatuaina e la’u tama teine ia tali ou te tuuina atu ia te ia, ua faamoemoe mai le Tama Faalelagi ia i tatou ia faatuatuaina Ana tali.
Ina ua amata la’u galuega, na oo mai luitau. Sa oo ina matua faigata o’u itula i lo’u aiga, ma sa amata ona le fiafia lo’u pule ia te a’u. Sa amata ona ou fesiligia le tali na ou maua e uiga i le taliaina o le galuega.
O le Tama Faalelagi o “se Atua o le upumoni, ma e le mafai ona pepelo” (Eteru 3:12), o lea sa ou manatu ai ou te lei malamalama i Lana taitaiga, lea na ou mafaufau ai pe fia isi uunaiga sa ou le malamalama i ai. Ona ou manatuaina lea o upu a Alema le Itiiti: “Tofotofo i au upu, ma faaaoga sina vaega itiiti o le faatuatua, ioe, e tusa pe le mafai ona e faia o se isi lava mea nai lo le manao e talitonu, ia tuu lea manao e galue i totonu ia te oe” (Alema 32:27).
Sa ia te a’u le manao e faaauau pea ona talitonu i le Tama Faalelagi, o lea sa ou filifili ai e faatino le faatuatua ma tofotofo i Lana uunaiga mo au e talia lenei galuega, ma sa ou faaauau pea.
-
E i ai lo latou faatuatua e le maluelue.
Sa ou ma’i tigaina ina ua ou maitaga i la’u tama laitiiti. Ae i se tasi aoauli, sa manao lou afafine e alu e savali sopo. Sa ta’u atu e lo’u toalua ia te ia ua ou ma’i tele e le mafai ona ou alu. Sa tatalo la’u tama teine ma ole atu i le Tama Faalelagi e fesoasoani mai ia ou maua se lagona lelei ma vave ai ona saunia e alu. I ni nai minute mulimuli ane, sa faateia lou toalua i le vaai mai ua ou ala. Sa ia tau mai ia te au e uiga i le tatalo a lo ma afafine, ma o lona faatuatua faamaoni na musuia ai au e taumafai e savali sopo. I se isi itu, sa ou oo atu ai i le tumutumu o le mauga.
O le i ai o le faatuatua e faauma ai la’u konokarate o galuega e manaomia ai foi le faatuatua e pei o la’u tama teine. Sa le mafai ona ou iloa atu le mea o loo i luma atu. Ae sa ou agai pea i luma ma le faatuatua na taitaiina a’u e le Tama Faalelagi i la’u galuega mo se mafuaaga. Ma sa iu ina faaalia mai lena mafuaaga.
I se aso filemu i le galuega, sa talanoa mai ai se tagata faigaluega ia te a’u e uiga i le taimi na ia iloa ai o a’u o se tagata o le Ekalesia, sa ia manatu o le a ou le ese lava mai nisi o tagata lotu finauvale mai lona olaga. Sa ia ta’u mai ia te a’u sa uunaia o ia i lo’u faaaloalo ma le agalelei mo ia ma isi tagata faigaluega. Sa matou faaaluina isi itula e talanoa ai e uiga i le faatuatua ma Iesu Keriso.
Sa ia ta’u mai ia te a’u sa manao o ia e talitonu ia te Ia, ma sa faafefeteina lo’u fatafata i le Agaga a o ou ta’u atu ia te ia e uiga i le talalelei.
Sa ou iloaina o ia o se tasi o mafuaaga na taitaiina ai a’u e le Tama Faalelagi i lenei galuega. O se vavega lava.
E pei ona aoao mai Peresitene Russell M. Nelson, “E oo mai vavega e tusa ai ma lo outou faatuatua i le Alii. E tutotonu i lena faatuatua o le faalagolago i Lona finagalo ma Lana taimi—faapefea ma po o afea o le a Ia faamanuiaina ai oe i se fesoasoaniga faavavega o loo e manaomiaina. Ua na o lou lētalitonu o le a taofia le Atua mai le faamanuiaina o oe i vavega e aveese ai mauga mai lou olaga.”1 Ina ua ou faatinoina le faatuatua faatamaitiiti i Lana uunaiga e fai lenei galuega ma faauma la’u konokarate, sa faaali mai e le Tama Faalelagi ia te a’u Lona tomai e aumai ai vavega.
O Le Faatuatua Faatamaitiiti o le a Faatumauina ai i Tatou i luga o le Ala
E mafai e le olaga ona faafaigata ona pipiimau i le faatuatua faigofie, ae mamana, ma faatamaitiiti. E silafia e lo tatou Faaola lenei mea. O le mafuaaga lena ua Ia valaaulia ai i tatou e mafaufau i le faataitaiga mausali o tamaiti. Afai e i ai so tatou loto e matala i le faatuatuaina o lo tatou Tama Faalelagi ma Ana perofeta e pei ona faia e tamaiti laiti, o le a tatou lagonaina le tuputupu ae maoae faaleagaga ma malamalama atili ai i le alofa ma le fuafuaga o loo ia te Ia mo i tatou taitoatasi.