E Na’o le Faatekinolosi
Mauaina o le Olioli i le Faavasegaina o Igoa Ina ua Faigata le Faitauina o Faamaumauga
E alala le tusitala i Iuta, ISA.
Ina ua ou lagona e pei ua lē mafai ona ou faitauina le tusilima i luga o faamaumauga tuai, sa fesoasoani se lesona mai le talafaasolopito o le Ekalesia ia te a’u e agai ai i luma.
Ou te le’i tuuto lava i le faavasegaina o igoa. Ou te fiafia i galuega faalemalumalu ma sa faaaoga le FamilySearch.org e su’e ai igoa o tagata o le aiga e ave i le malumalu. Ou te talitonu ua musuia e le Alii le alualu i luma o tekinolosi e faalautele ma faanatinati ai Lana galuega. Ma ou te malamalama o le faavasegaina o igoa o le faia lea o se faatinoga tāua o le mauaina o faamaumauga e mafai ona sailia. Ae o a’u taumafaiga i le faavasegaina o igoa sa tumau pea ona femoumoua’i ma vaivai.
Ta i totonu tapuniga o le KOVITI-19 ma malumalu. I le konafesi aoao ia Aperila 2020, na saunoa ai Peresitene Russell M. Nelson: “E ui i le le mafai ona tapuai i le malumalu i le taimi nei, ou te valaaulia outou ina ia faateleina lo outou auai i talafaasolopito o aiga, e aofia ai le sailiga o talafaasolopito o aiga ma le faavasegaina o igoa. Ou te folafola atu pe a e faateleina lou taimi i galuega faalemalumalu ma talafaasolopito o aiga, o le a e faateleina ma faaleleia lou tomai e faalogo ai ia te Ia.”1 O le taimi lava na uma ai ona tuuina mai lenei valaaulia, sa faanofoesea ai a’u ona o le latalata i se tasi e i ai le KOVITI-19. Sa ou filifili e faaaoga lena taimi e toe taumafai ai e faavasegaina igoa.
I le amataga sa tutusa lava lo’u aafiaga ma le taimi muamua—o le telegese ma le lē fiafia. Ou te lē malamalama gofie i le tusilima a isi tagata po o mamanu o ituaiga pepa eseese. Ona ou manatuaina lea o mea sa ou aoaoina i le Au Paia, voluma 1, a o faaliliuina e Iosefa Samita le Tusi a Mamona: “Sa tatau ona lotomaualalo o ia ma faaaoga le faatuatua a o ia suesue i mataitusi.”2 I lena lava taimi, sa lē mafai e Oliva Kaotui ona faaliliu, o se vaega ona sa ia “le mafaufau i ai vagana ai ua ia ole atu” (Mataupu Faavae ma Feagaiga 9:7). Ou te le’i manao ia ou faia foi lea lava mea sese e tasi e pei o Oliva, o lea sa ou faaaogaina ai a’u lava ia ma sina naunautaiga ma se tautinoga sili atu.
Talu mai lava lena taimi, nai lo le mapusela po o le solomuli ese mai galuega faatino faigata o le faavasegaina o igoa, ou te fiafia lava i le avanoa e galulue soosootauau ai ma le Alii i le faavasegaina o igoa ina ia mafai ai e i latou ua maliliu ona latalata teisi atili atu ai i le mauaina o sauniga i le malumalu. A o o’u suesue i lo’u mafaufau ia auiliiliga o faamaumauga o loo i o’u luma, ou te lagonaina le onosai sili atu i lo’u finafinau e malamalama i faamaumauga, ma ou te iloa le aao o le Alii i lo’u malamalama pe a oo mai. Ua ou lagonaina le faataunuuina o le folafolaga a Peresitene Nelson—ua faateleina lo’u tomai e faalogo ai i le Alii.
Ou te faafetai mo le avanoa e auai ai i le galuega o le faaolataga ma le faaeaga! O le faavasegaina o igoa o se avanoa ofoofogia e faataitai ai i le Perofeta o Iosefa Samita i le galue ai e malamalama i le mea semanū e lē mafai ona malamalama i ai i tatou ae e mafai ona manino e ala i le meaalofa ma le mana o le Atua.