Legavia: Faamalosia o Lo’u Lagona o le Faasinomaga

Saunia e Kamilla Szitárcsik

Sa ou lagonaina i taimi uma le lē toafimalie e uiga i sootaga vavalalata faalefeusuaiga i fafo atu o le faaipoipoga, ma sa aoaoina au e le talalelei e faapea, sa aogā o’u lagona.

E 12 o’u tausaga ae ou auai i Le Ekalesia a Iesu Keriso o le Au Paia o Aso e Gata Ai. Ou te le’i ola “amiotonu”—o le mea moni, o le faafeagai tonu lava. A o le’i auai i le Ekalesia, sa ou ulaula, inu ava, ma patī soo, lea e taatele mo le autalavou matutua i Hanikeri.

Ae e ui i lo’u manatu māmā a o o’u taulimaina nei mea, ou te le’i lagonaina lava se lagona lelei i le faia o na mea. Sa faapitoa ona ou lagonaina le lē toalelei ina ua oo i fegalegaleaiga faalefeusuaiga. Sa ou aoaoina mai le lalolagi e faapea o le faamoemoega o feusuaiga sa mo le tuinanau ma le faamalieina o le tagata lava ia. O le toatele o tagata na siomia a’u sa ioeina e lē o se mea tāua tele. Ou te le’i faamasinoina a’u uo mo le i ai o lena vaaiga, ae sa ou iloaina o le sootaga vavalalata faalefeusuaiga sa lē tāua ia te a’u.

Pe Sa Ou Ese Lava?

Sa ou maasiasi i le avea ai ma se tasi o nā tagata “ese lava” lea sa mananao e faatali seia faaipoipo. Sa ou manatu e mafai ona ou tafao faamasani i se tasi na tutusa o ma manatu.

Ae peitai, sa oo ina leotele uunaiga a le lalolagi, ma sa amata ona ou talitonu na maualuluga tele o’u faamoemoega. O lea sa ou tuu faamaulalo ai o’u tulaga faatonuina.

Ina ua 18 o’u tausaga, sa ou tafao faamasani i se tasi ma ou faapea ifo ia te a’u lava ia, sa ou mateletele ma leai se potomasani—o feusuaiga sa lē matuia tele e pei ona ou mafaufau i ai. Sa ou faia ia ou aluese mai o’u lagona lē to’alelei ma talitonu o le a i’u lava ina lelei o’u lagona.

Peitai sa le’i tupu lava lena mea.

Sa avea a’u o se Kerisiano talu mai le 16 o o’u tausaga, ae ou te le’i maua le tulafono o le legavia e faamautinoa mai ai ia te a’u o loo taumafai o’u lagona faaosofia e ta’u mai po o ai a’u—o se afafine o le Atua e manaomia le alofa ma le tuuto ma le paia. Sa ou lagonaina lenei upumoni ae sa ou lē mautinoa po o le a lea mea seia oo ina ou aoao e uiga i le talalelei.

O Le Faatuatua e Faamalosia ai i Tatou

E mafai ona faigofie ona gauai atu i leo leotetele o le lalolagi. Ae i le avea ai ma fanau a le Atua, ou te talitonu ua tofu i tatou uma ma se aoaoga faaleagaga mai le Agaga Paia ina ia faamaoni i lo tatou faasinomaga paia. Tatou te lē tau tuua i lalo o tatou tulaga faatonuina pe maasiasi i o tatou talitonuga. Faatasi ai ma le faatuatua i le Faaola o Iesu Keriso, e mafai ai ona ese i tatou pe a tatou tausia Ana poloaiga.

Sa ou lagona lava i taimi uma o le sootaga vavalalata faalefeusuaiga e paia ma sili atu ona tāua nai lo le mea ua faia e le lalolagi e avea ai. O lona uiga ia fesoasoani i soa e faavavau ia faalolotoina lo latou alolofa ma faamalolosia a latou feagaiga i le tasi ma le isi a o latou fausia se sootaga faaselesitila ma se aiga.

Ae e ui lava i lea, a o o’u aoao e uiga i le talalelei, o le suia o lo’u olaga sa le’i faigofie. E pei lava ona aoao mai Peresitene Russell M. Nelson, “E manaomia le faatuatua e ola ai i se olaga mama pe a alalaga le lalolagi o le tulafono a le Atua o le legavia ua lē toe taulia.”¹

E ui lava i faigata na siomia ai a’u, ae o lo’u faatuatua ia Keriso na faamalosia ai a’u e tausi poloaiga.

E lē mafai ona ou faafetai mo le meaalofa o le salamo ma mo le lagolago ma le Togiola a le Faaola. E tusa lava pe tatou te faia ni mea sese, e mafai ona Ia faapaiaina o tatou agaga mai le ta’usalaina ma le maasiasi ma faamanaina i tatou i auala tatou te le’i mafaufauina e mafai ona fai.

Faamoemoe mo le Lumanai

O aso nei ou te ataata ai i le auala sa masani ona ou mafaufau ai o le a ou lē maua lava se soa o le a naunau e mulimuli i le tulafono o le legavia. O le avea ma se tagata o le Ekalesia na faaali mai ai ia te a’u e toatele i tatou o loo tauivi atu mo tulaga faatonuina lava e tasi. O le ola agavaa e fesoasoani ou te maua ai le talitonuga i lo’u faasinomaga paia ma le filemu i lo’u loto a o o’u agai atu i luma i le ala o feagaiga.

Sa ou oo i le tele o tiga e ala i le lē ola i le tulafono o le legavia. Ae a o o’u sailia Keriso, sa oo ina ou iloa le loloto o le alofa o le Tama Faalelagi ia i tatou. E mafai ona ou molimau atu e lē finagalo o Ia e faasāsā i tatou—e finagalo o Ia e laveai i tatou mai tiga, lotonutimomoia, ma isi taunuuga ma saunia i tatou mo se sootaga alofa, tumau, ma le lē manatu faapito e faavavau.

Ona o Lona alofa ma tulafono ma le meaalofa o le Faaola, ua ou lagonaina ai nei le olioli, togiola, ma le faamoemoe Latou te ofoina mai. Auā, “o faamanuiaga silisili a le Atua ua faapolopoloina mo i latou o e usiusitai i Ana tulafono. … “O [Ana] tulafono e uunaia atoatoa lava e Lona alofa lē mafuatia mo i tatou ma Lona finagalo ia tatou avea uma ma tagata e mafai ona tatou avea ai.”²

Ou te iloa o le mulimuli i poloaiga a le Alii ma le tausia o feagaiga, o le a e malamalama ai i Ana upumoni ma vaai i le anoanoai o folafolaga ma faamanuiaga ua faataunuuina i lou olaga.

Ua ou iloa ua ou faia.

E nofo le tusitala i Hanikeri.