Digital Lamang: Mga Young Adult
Wala Ko Ganahi nga Moadto sa Templo. Apan Gibati Nako nga Daghan Diay Kaayo og mga Panalangin ang Pag-adto
Atong makaplagan ang kalinaw diha sa Ginoo kon kita motambong ug moapil sa mahinungdanong buhat sa Dios alang sa Iyang mga anak.
Kahibalo ko nga gikinahanglan nako nga moadto sa templo. Mubo ra ang biyahe gikan sa akong gipuy-an ngadto sa labing duol nga templo, apan wala ko makaadto sulod sa pipila ka bulan.
Usa ka gabii, nagbasa ko sa pakigpulong ni Elder Neil L. Andersen gikan sa Oktubre 2022 nga kinatibuk-ang komperensiya. Usa ka kapahayag ang nakapatandog nako: “Sa atong pagsulod sa templo, kita gawasnon sa kalibotanong mga kabalaka nga makapaluya kanato samtang kita nagkat-on sa atong katuyoan sa kinabuhi ug sa mahangtoron nga mga gasa nga gitanyag kanato pinaagi sa atong Manluluwas, si Jesukristo.”1
Gusto ko nga mobati nga gawasnon gikan sa kalibotan. Kay kalit nga mibati og hilabihan nga determinasyon, nagpaeskedyul ko aron mohimo og puli [proxy] nga mga initiatory.
Sa adlaw sa maong eskedyul, mipauli ko gikan sa trabaho nga mibati og kakapoy ug nagmug-ot nga walay rason. Wala ko sa maayong buot nga moadto sa templo.
Apan nahinumdoman nako ang akong tinguha sa miaging adlaw, bisan kon wala nako batia nianang higayona. Mibalik ko sa akong sakyanan ug misugod sa pagdrayb.
Baynte minutos ang milabay, makita na ang templo.
Ang mga luha miagas sa akong mga mata. Nianang higayona, ang akong tinguha mibalik. Ang templo mao ang dapit nga akong gikinahanglan nianang gabhiona. Kinahanglan nakong pugngan ang daghang luha aron dili mawala ang akong panan-aw sa karsada.
Ang templo usa ka dapit nga kadangpan gikan sa kalibotanong mga impluwensya ug mga pakigbisog sa atong mga kinabuhi. Si Presidente Russell M. Nelson mihangyo nato sa “pag-establisar og sundanan sa regular nga pagtambong sa templo.”2 Samtang buhaton nato kini, kita makatagamtam sa mga panalangin sa pagsige og balikbalik ngadto balay sa Ginoo.
Ania ang pipila ka panalangin nga akong namatikdan sa pagtambong sa templo nianang adlawa:
Pagbati og Kahupayan
Sa dihang mitambong ko sa templo nianang adlawa, ang akong dili maayo nga buot nawala. Napulihan kini og “kalinaw sa Dios nga dili matugkad sa tawo” (Mga Taga-Filipos 4:7).
Ang kalinaw nga atong makaplagan sa templo direkta nga nagagikan sa Dios. Kita makakonektar sa Dios bisan asa pinaagi sa Iyang Epiritu, apan ang templo gigahin alang nato aron direkta nga makigsulti sa Ginoo.
Si Presidente Nelson mitudlo: “[Ang templo] mao ang Iyang balay. Kini puno sa Iyang gahom. … Ako mosaad nga ang paggahin og mas dako nga oras diha sa templo mopanalangin sa inyong kinabuhi sa mga paagi nga walay laing makahimo.”3 Ang pagtambong sa templo nagtugot kanato nga mobati sa gahom sa Dios. Kana nga gahom moabot isip pagpadayag, sama sa klarong panghunahuna, o isip usa ka pagbati og kahupayan.
Pagbati og Kalig-on gikan sa Akong mga Pakigsaad
Gawas sa pagbati og kalinaw, ako usab mihinumdom sa akong mga pakigsaad nga akong gihimo kaniadto. Samtang naghimo ko isip puli [proxy] sa initiatory, akong gitutokan ang mga pulong sa ordinansa. Kadto nga mga pulong mipahinumdom nako nga ang Dios mohatag nako og kalig-on ug motabang nako nga makalahutay sa akong mga pagsulay.
Kon kita mobalik ngadto sa templo, kita mahinumdom sa mga saad nga atong gihimo ngadto sa Dios ug sa mahangtorong mga saad nga Iyang gihimo ngari nato.
Si Elder David A. Bednar sa Korum sa Napulog Duha ka Apostoles mitudlo: “Wala kita motukod o mosulod sa balaang mga templo aron lang makaangkon og halandomong kasinatian sa indibidwal o pamilya. Hinoon, ang mga pakigsaad nga nadawat ug ang mga ordinansa nga gipahigayon diha sa mga templo mahinungdanon sa pagbalaan sa atong mga kasingkasing ug alang sa kinatas-ang paghimaya sa mga anak sa Dios.”4
Pag-apil diha sa Buhat sa Dios
Samtang modawat kita sa personal nga mga panalangin sa templo, hinumdoman usab nato ang buhat nga atong gihimo alang sa mga patay. Kon kita mopahigayon sa puli [proxy] nga mga ordinansa, alang kini sa kaluwasan niadtong anaa sa pikas nga tabil.
Ang mga ngalan sa mga tawo nga akong gitabangan gihatag sa templo ngari nako. Wala koy nailhan sa mga babaye nga akong gibarogan isip puli [proxy] alang nianang adlawa. Apan gibati nako ang sagradong gahom nga gihatag ngadto nila pinaagi sa ordinansa sa initiatory.
Ang atong pagtambong sa templo makatabang nga mapadayon ang plano sa Dios alang sa Iyang mga anak. Sa atong ginagmay nga paagi, kita miapil diha sa buhat “sa pagpahinabo sa pagka-imortal ug kinabuhi nga dayon sa tawo” (Moises 1:39). Si Elder Bednar mitudlo, “Samtang matinguhaon kitang moapil niining sagrado nga buhat, nagsunod kita sa mga sugo sa paghigugma ug pagserbisyo sa Dios ug sa atong mga silingan [tan-awa sa Mateo 22:34–40].”5
Yano apan Gamhanan
Alang kanato nga nagpuyo duol sa templo, tingali sayon ra ang pagkalimot sa mga panalangin nga moabot gikan sa pagtambong sa templo. Sama sa gisaad ni Presidente Russell M. Nelson, “Ang paggahin og mas dako nga oras diha sa templo mopanalangin sa inyong kinabuhi sa mga paagi nga walay laing makahimo.”6 Alang niadtong nagpuyo layo sa templo, tingali lisod ang pagpahaom sa atong mga eskedyul sa mga pagbisita sa templo. Apan ang gahom sa pagtambong sa templo makanunayon, ug ang mga panalangin tinuod.
Kon kita mogahin og mas daghang panahon diha sa templo, kita makakaplag og kapahulayan gikan sa atong mga hagit ug sa atong mga kasakit. Kita makahimo sa pagpakigsulti sa Dios ug mahimong kabahin sa Iyang mahinungdanong buhat—alang sa atong kaugalingong mga kalag ug sa mga kalag sa Iyang mga anak.