Giunsa ni Jesukristo sa Paghatag Kanako og Kalinaw human sa Kamatayon sa Akong Inahan
Wala koy ideya asa mangita sa mga tubag.
Atol sa akong kataposang tuig sa high school, ang akong inahan nagkasakit. Sa dihang namatay siya, kadto ang pinakalisod nga panahon sa akong kinabuhi. Ang iyang kamatayon miut-ot sa akong kalag, ug nawad-an ako og paglaom. Daghan usab ako og kasakit mahitungod sa akong kaugmaon. Walay makabayad sa akong pag-eskwela kay mi-retire na ang akong amahan tungod sa iyang panglawas. Lisod ang paghuman sa pag-eskwela niana nga tuig sa tingklase, apan ang akong iyaan ug magulang nga babaye misuporta nako hangtod sa kataposan.
Pipila ka tuig human niadto, nagsugod ako sa paghunahuna mahitungod sa kasamtangang sitwasyon sa akong inahan—asa man siya miadto? Buhi pa ba kaha siya kon asa siya dapita? Siya ba kanunay kaha nga maoy akong inahan, o ang among relasyon taman ra ba niini nga tibuok kinabuhi? Ang akong mga pangutana lisod, ug nagsugod ko sa pagduhaduha kon makaplagan ba kaha nako ang mga tubag. Gani wala man ko masayod kon asa ko magsugod sa pagkaplag niini.
Usa niana ka adlaw nakigtagbo ko og usa ka higala, ug samtang nagkukabildo kami, iya kong gipahibalo nga usa siya ka miyembro sa Ang Simbahan ni Jesukristo sa mga Santos sa Ulahing mga Adlaw apan wala na mag-adtoan sa simbahan tungod kay ganahan siya og musika kauban sa mga higala. Ako siyang gisultihan nga usahay akong makit-an ang mga misyonaryo nga moagi sa akong balay, apan wala koy daghang nahibaloan mahitungod sa iyang relihiyon. Miingon ko nga naglaom ko nga adunay maayong butang bahin niini tungod kay nagkinahanglan ko og mga tubag.
Mihangyo ko niya nga magkuyog mi nga moadto sa simbahan inig ka Dominggo. Miuyon siya. Sa simbahan, dali ra kaayo nakong gibati ang gugma sa mga miyembro alang kanako—ila kong gihinangop nga sama sa dugay na kaming nagkaila. Akong gibati nga didto akong makaplagan ang unsay akong gipangita.
Usa ka Kausaban sa Kasingkasing
Ang mga misyonaryo nagsugod sa pagbisita nako. Dili sayon sa sinugdanan ang pagkat-on kabahin sa gipahiuli nga ebanghelyo tungod kay natudloan na ko sa lahi nga paagi. Mao nga, taud-taod pod, ang among leksiyon nahimong panaghisgot kabahin sa lain-laing tinuhoan. Apan usa niana ka adlaw akong giingnan ang akong kaugalingon nga ako ang naay mga pangutana nga kinahanglan nakong masolbad—dili ang mga misyonaryo—mao nga gihatagan nako sila og panahon ug kahigayonan sulod sa akong kasingkasing sa pagtudlo kanako.
Human niana nga adlaw, misugod ako sa pagsinati og usa ka dako nga kausaban sa kasingkasing (tan-awa sa Mosiah 5:2; Alma 5:14). Akong nahibaloan nga ang akong inahan magpabilin nga akong inahan, bisan didto sa kinabuhi nga moabot. Akong nahibaloan nga maselyo kami kon akong dawaton ang ebanghelyo ug buhaton ang mga ordinansa sulod sa templo alang sa akong inahan ug sa tanang sakop sa pamilya kinsa mitaliwan na.
Kini nga mga kamatuoran midulot sa akong kasingkasing. Sa dihang misugod ko sa pagkat-on sa ebanghelyo, ilabi na sa Basahon ni Mormon, ang mga kamatuoran nga akong nakat-onan mipuno kanako og usa ka masanag nga kahayag. Kana nga kahayag misugod sa pag-usab sa akong kasubo tungod sa wala matubag nga mga pangutana ngadto sa usa ka lig-on nga pasalig diha ni Jesukristo.
Pito ka bulan ang milabay nabunyagan ko. Gusto nakong buhaton ang tanan nga akong mahimo nga ikauban ang akong inahan ugma damlag. Apan ang akong pamilya nabalaka. Ika-siyam ako sa pamilya sa 10 ka anak. Ug dihang misulay ako sa pakigbahin sa ebanghelyo ngadto nila, ang ilang mga kasingkasing dili andam nga modawat sa mensahe. Apan naglaom ko nga sa umaabot sila usab makaangkon og pagpamatuod sa ebanghelyo ug sa unsang paagi ang among pamilya mahimong mahangtoron.
Paglaom diha kang Jesukristo
Ang gipahiuli nga ebanghelyo mihatag nako og paglaom nga nawala kanako sulod sa daghang tuig. Nasabtan na nako nga ang kinabuhi adunay kahulogan tungod kay nasayod na ko sa akong pagkatawo isip anak sa Dios, usa ka anak sa pakigsaad, ug usa ka disipulo ni Jesukristo.1
Ang ebanghelyo mihatag usab kanako og kalinaw sa kahiladman ug sa kasiguroan nga akong gikinahanglan sa dihang nawala ang akong minahal nga papa niadtong Nobiyembre 2020. Tungod sa plano sa katubsanan wala na ko masamok dili sama sa panahon dihang nawala ang akong inahan. Nangandam usab ako aron moserbisyo og full-time nga misyon. Ang akong tawag [call] miabot sa adlaw human sa lubong sa akong amahan.
Bisan pa sa makahugno nga mga epekto nga mihatag og kasakit sa akong kasingkasing sa dihang nawad-an ko og mga minahal, karon mibati nako og kalinaw ug kalipay diha sa akong kasingkasing salamat ni Jesukristo, sa Iyang Pag-ula, ug sa Iyang Pagkabanhaw tungod kay nasayod ko nga kita mapasaylo sa atong mga sala. Kita mahimong magkauban pag-usab uban niadtong mibiya na kanato niini nga mortal nga kinabuhi, ug sila adunay mahimayaon, nabanhaw nga mga lawas. Akong makita pag-usab ang akong inahan ug amahan, ug salamat sa mga ordinansa sa templo, magkauban unya kami hangtod sa kahangtoran.
Sama sa gitudlo ni Elder Jeffrey R. Holland sa Korum sa Napulog Duha ka Apostoles: “Ako mopamatuod nga ang umaabot mahimong puno sa mga milagro ug buhong sa mga panalangin sama sa nangagi. Anaa kanato ang tanan nga rason nga molaom sa mga panalangin gani mas dagko kay sa ato nang nadawat tungod kay kini mao ang buhat sa Labawng Makakagahom nga Dios, kini ang Simbahan nga adunay padayon nga pagpadayag, kini ang ebanghelyo sa walay kinutoban nga grasya ug kaayo ni Kristo.”2
Ako nasayod nga ang kaugmaon segurado na alang kanako tungod sa sukaranan nga akong natukod, nga mao si Jesukristo. (tan-awa sa Helaman 5:12). Nasayod ako nga ang Iyang pamaagi mogiya ngadto sa kalipay dinhi niini nga kinabuhi ug sa kinabuhing dayon sa kalibotan nga moabot.