O Le Ala na Aumaia ai e Iesu Keriso ia te A’u le Filemu ina ua Mavae le Maliu o Lo’u Tina
Sa ou le iloa po o fea e saili ai mo ni tali.
I lo’u tausaga faaiu i le aoga maualuga, na ma’i ai lo’u tina. Ina ua maliu o ia, o le vaitaimi pito sili lea ona faigata i lo’u olaga. O lona maliu na avea ma se vaega na matua gaogao ai lo’u ola faale-agaga, ma o’u pa’u atu ai i le faanoanoa. Sa tele foi lo’u tiga e uiga i lo’u lumanai. Sa leai se tasi e totogia a’u aoga auā ua litaea lo’u tama ona o lona soifua maloloina. Sa faigata ona faauma le tausaga aoga, ae sa lagolagoina a’u e le uso o lo’u tina ma lo’u tuafafine matua seia oo i le iuga.
I ni nai tausaga mulimuli ane, sa amata moni ai lava ona ou mafaufau e uiga i le tulaga o i ai nei lo’u tina—o fea na alu i ai o ia? Pe o ola ea o ia i se isi mea? Pe o le a avea pea o ia ma o’u tina, po o le ma mafutaga e mo na o lenei lava olaga? Sa lavelave a’u fesili, ma sa amata ai ona ou masalosalo ailoga o le a o’u mauaina ni tali. Sa ou le iloa po o fea e amata ona sue ai latou (tali).
I se tasi aso sa ma feiloai ai ma se uo, ma a o ma talanoa, sa ia faailoa mai ia te a’u o ia o se tagata o O Le Ekalesia a Iesu Keriso o le Au Paia o Aso e Gata Ai ae sa le’i toe alu i le lotu ona sa manao o ia e fai ni’ musika. Sa ou fai atu ia te ia sa masani ona ou vaai i faifeautalai o pasi ane i lo’u fale, ae sa le tele so’u iloa e uiga i lana tapuaiga. Sa ou fai atu ou te faamoemoe o i ai se mea lelei i totonu iina aua sa ou manaomia ni tali.
Sa ou aioi atu ia te ia ma te o faatasi i le lotu i le Aso Sa. Sa malie i ai o ia. I le lotu, sa vave ona ootia a’u i le alofa o tagata o le ekalesia mo a’u—sa latou faafeiloaia a’u e foliga mai ua leva ona matou masani. Sa ou maua le lagona e mafai ona ou maua le mea sa ou sailia iina.
O Se Suiga o le Loto
Sa amata ona omai faifeautalai e asiasi mai ia te a’u. Sa le’i faigofie i le amataga ona aoao e uiga i le talalelei toefuataiina, ona e ese mea na aoaoina ai a’u muamua. O lea la, mo sina taimi, o a matou lesona e masani ona oo atu i ni talanoaga e uiga i talitonuga eseese. Ae i se tasi aso sa ou fai ifo ai ia te a’u lava ia, o a’u lea na i ai ni a’u fesili sa manaomia ona foia—ae le o faifeautalai—o lea sa tatau ai ona ou tuuina atu ia i latou le taimi ma se avanoa i lo’u loto e aoaoina ai a’u.
Ina ua mavae lena aso, sa amata ona ou oo i se liuga tele o le loto (tagai i le Mosaea 5:2; Alema 5:14). Sa ou aoaoina o le a tumau ona avea lo’u tina ma o’u tina, e oo lava i le olaga a sau. Sa ou aoaoina e mafai ona matou faamauina faatasi pe afai ou te taliaina le talalelei ma faatinoina sauniga i le malumalu mo lo’u tina ma tagata uma o lo’u aiga ua maliliu.
Sa ootia loloto lo’u loto i nei upumoni. Ina ua amata ona ou suesue i le talalelei, aemaise lava le Tusi a Mamona, o upumoni na ou aoaoina na faatumulia ai a’u i se malamalama susulu. O lena malamalama na amata ona suia ai lo’u faanoanoa, sa iai i ni fesili e le’i taliina, i se faamautinoaga mausali ia Iesu Keriso.
I le fitu masina mulimuli ane sa papatisoina ai loa a’u. Sa ou manao e faia mea uma ou te mafaia ina ia toe faatasia ai ma lo’u tina i se tasi aso. Ae sa popole lo’u aiga. O a’u o le lona iva i se aiga e toa 10 le fanau. Ma ina ua ou taumafai e faasoa atu le talalelei ia i latou, sa le’i saunia o latou loto e talia le savali. Ae ou te faamoemoe o le a i ai se aso o le a latou maua ai foi se molimau o le talalelei ma le ala e mafai ai ona faavavau lo matou aiga.
Faamoemoe ia Iesu Keriso
O le talalelei toefuataiina ua toe aumaia ia te a’u se faamoemoe sa leiloa mo le tele o tausaga. Ua ou vaai nei e i ai le uiga o le olaga auā ua ou iloa lo’u faasinomaga o se atalii o le Atua, o se atalii o le feagaiga, ma se soo o Iesu Keriso.1
Na aumaia foi e le talalelei ia te a’u le filemu i le loto ma le faamautinoaga sa ou manaomia ina ua maliu lo’u tama pele ia Novema 2020. Sa ou le popole e pei o le tulaga na ou iai ina ua maliu lo’u tina auā ua ia te a’u le malamalama i le fuafuaga o le togiola. Sa ou sauniuni foi e auauna atu i se misiona talai. Na oo mai lo’u valaauga i le aso na sosoo ina ua mae’a le falelauasiga o lo’u tama.
E ui lava i aafiaga matautia na lofituina ai lo’u loto ina ua maliliu ē pele ia te a’u, ae ua ou lagonaina nei le filemu ma le olioli i lo’u loto e faafetai ai ia Iesu Keriso, Lana Togiola, ma Lona Toetu auā ua ou iloa e mafai ona faamagaloina i tatou i a tatou agasala. E mafai ona tatou toe faatasia ma i latou o e ua tuua i tatou i lenei olaga faitino, ma o le a latou maua ni tino toetutu mamalu. O le a ou toe vaai i lo’u tina ma lo’u tama, ma e faafetai ai i sauniga o le malumalu, o le a matou faatasia mo le faavavau.
E pei ona aoao mai Elder Jeffrey R. Holland o le Korama a Aposetolo e Toasefululua: “Ou te molimau atu o le lumanai o le a faatumulia ai vavega ma faamanuiaina tele e pei ona sa i ai i le taimi ua tuanai. Ua ia i tatou mafuaaga uma e faamoemoe ai mo faamanuiaga e sili atu nai lo na faamanuiaga ua uma ona tatou maua aua o le galuega lenei a le Atua Silisiliese, o le Ekalesia lenei o faaaliga faifaipea, ma o le talalelei lenei a Keriso o le alofa tunoa ma le agalelei lē faatuaoia.”2
Ou te iloa o le lumanai o le a lē toe iai se tulaga o le lē mautonu mo a’u ona o le papa lea ua ou fausia ai, o Iesu Keriso lea (tagai i le Helamana 5:12). Ua ou iloa o Lona ala e tau atu i le fiafia i lenei olaga ma le ola e faavavau i le lalolagi a sau.