Fakakomipiuta Pē: Kakai Lalahi Kei Talavoú
Naʻá Ku ʻai Nai ke Faingataʻa ʻa e Ongoongoleleí?
Naʻe ʻikai mahino kiate au ʻa e ʻuhinga naʻá ku fuʻu ongoʻi ongosia aí.
Naʻá ku feinga ʻi he kotoa ʻo ʻeku moʻuí ke u aʻusia ʻa e tuʻunga naʻá ku pehē ʻoku ʻamanaki mai ʻa e Tamai Hēvaní ke u aʻusiá. Ka naʻe ʻi ai ha palopalema: Naʻe ʻikai ke u teitei ʻilo pe ʻoku ou lelei feʻunga.
Naʻá ku tokanga taha ke fakaleleiʻi ʻeku ngaahi tōnounoú, tautautefito ki he hili ʻeku ako ʻa e folofolá pe fanongo ki he ngaahi lea ʻo e konifelenisi lahí. ʻI heʻeku lau ʻa e ngaahi meʻa ko ʻeni naʻe totonu ke ne fakalotolahiʻi aú, naʻe tuku pē ʻeku tokangá ki he ngaahi fehalaaki naʻá ku faí.
Naʻá ku moʻui peheni ʻi ha taimi fuoloa—ʻo mamahi mo ongosia ʻi hoku tuʻunga fakaākongá.
Ka naʻe ʻikai ke u fakatokangaʻi ko e meʻa moʻoni naʻe ʻikai ke u faí ko e tui moʻoni ki he Fakamoʻuí mo e ngaahi moʻoni haohaoa mo faingofua ʻo ʻEne ongoongoleleí.
Ko e Ngalo e ʻUhinga ʻEku Moʻui ʻAki e Ongoongoleleí
Naʻe liliu ʻeku fakakaukaú lolotonga ʻeku fanongo ki ha fakataha lotu kimuí ni mo Sisitā Petulisa T. Hōlani. Naʻá ne pehē, “Ko e meʻa ʻoku ou fakameʻapangoʻia lahi taha ai ʻi heʻeku kei finemuí naʻe ʻikai ke u vakai ki he mātuʻaki fakaʻofoʻofa ʻo e ongoongoleleí; naʻa mo e ongoongoleleí ne u ʻai ke fuʻu faingataʻa.”1
Naʻe ongo kiate au ʻene pōpoakí.
Naʻá ku fakatokangaʻi ʻoku ou faʻa ʻai maʻu pē ke faingataʻa ʻa e ongoongoleleí! ʻOku tokolahi ha niʻihi ʻo kitautolu ʻoku pehē. ʻOku tau ʻamanaki ke tau haohaoa, ʻo tui ʻoku ʻikai ha feituʻu maʻá e ngaahi fehalākí mo e fakalakalaká. Pea kapau he ʻikai hoko ʻa e ngaahi meʻá ʻo hangē ko ʻetau ʻamanakí, ʻoku tau hohaʻa ki he kahaʻú, fakafehoanaki kitautolu ki he niʻihi kehé, mole e fetuʻutaki mo e Tamai Hēvaní, pea aʻu ʻo tau kamata fifili pe ʻoku ʻaonga koā hono moʻui ʻaki ʻa e ongoongoleleí.
Naʻá ku fakatokangaʻi naʻe ʻikai tupu ʻeku loto-hohaʻá ʻi hono moʻui ʻaki ʻo e ongoongoleleí. Naʻá ku loto-hohaʻa koeʻuhí naʻe ʻikai ke u toe tokanga ki he ʻuhinga ʻoku ou moʻui ʻaki ai ʻa e ongoongoleleí: ko Sīsū Kalaisi.
Naʻe ngalo ʻiate au ʻoku haohaoa ʻEne ʻofa mo e Tamai Hēvaní ʻiate aú (vakai, Sione 15:9; 2 Nīfai 1:15).
Naʻe ngalo ʻiate au ʻoku fakataumuʻa ke u fiefia ʻi he fonongaʻangá (vakai, 2 Nīfai 2:25).
ʻOku ngalo ʻiate au ʻoku kau ʻi he moʻui fakamatelié ʻa e ngaahi tōnounoú mo e fakafalala ki he Fakamoʻuí ke ne ikunaʻi kinautolú (vakai, ʻEta 12:27).
Naʻe ngalo ʻiate au ʻoku ʻi heni ʻa e Fakamoʻuí ke tokoniʻi au ke u ako pea tupulaki mo fakalakalaka pea ʻokú Ne fakatapui ʻeku ngaahi ngāué ʻi he hala fonongá (vakai, 2 Nīfai 2:1–2; 32:9).
Fakafaingofuaʻi
ʻOku tau tō ki ha faingataʻa ʻi he taimi ʻoku tau liliu ai ʻa e ongoongoleleí ki ha lisi vakaiʻi ʻo e ngaahi laó pea ngalo ʻa e ngaahi moʻoni haohaoa ʻo Sīsū Kalaisí. ʻI heʻetau feinga ke tauhi ʻetau ngaahi fuakavá mo e ngaahi fekaú ʻi he fakataumuʻa ke hoko ʻo hangē ange ko Iá, ʻoku tau moʻui moʻoni ʻaki leva ʻa e ongoongoleleí.
Hangē ko e akonaki ʻa Palesiteni Lāsolo M. Nalesoní, ko e taimi ʻeni ʻoku hanga ai ʻe he ongoongolelei ʻo Sīsū Kalaisí ʻo “liliu e moʻui ʻa e taha kotoa ʻoku mahino ki aí mo feinga ke fakahoko ia ʻi heʻene moʻuí. ʻOku tokoni mai e tokāteline ʻa Kalaisí ke tau ʻilo mo nofo ʻi he hala ʻo e fuakavá.”2
ʻOku finangalo ʻa e Tamai Hēvaní ke tau manatuʻi maʻu pē ʻe lava ke tokoniʻi kitautolu ʻe he Fakamoʻuí ke tau aʻusia hotau tuʻunga malava fakalangí. Ka ʻoku anga fēfē ʻa e ʻikai ngalo ʻiate kitautolu ʻa e moʻoni mahuʻinga ko ʻení?
Ko ha ngaahi founga ʻeni ʻe niʻihi kuo nau tokoniʻi au:
-
ʻOku ou lotua ke tokoniʻi au ʻe he Tamai Hēvaní ke u ongoʻi ʻokú Ne ʻofa ʻiate au mo tali hoku lelei tahá.
-
ʻOku ou maʻu ʻa e sākalamēnití, ʻo tokanga taha ki he Fakalelei ʻa Sīsū Kalaisí. ʻOku ou fakamanatu kiate au ʻe lava ʻe Heʻene ʻaloʻofá ʻo tokoniʻi au ʻi he kahaʻú pea kuo ʻosi ngāue ia ʻi heʻeku moʻuí ʻi heʻeku feinga ke muimui kiate Iá.
-
ʻOku ou tafoki ki he folofolá ke maʻu ha fakafiemālie. ʻOku ou laukonga fekauʻaki mo kinautolu naʻa nau ongoʻi taʻefeʻunga pea fakamālohia kinautolu ʻe he ʻEikí.
-
ʻOku ou faʻa ʻalu maʻu pē ki he temipalé. ʻOku fakamanatu mai ʻe he meʻa kotoa pē ʻi he fale ʻo e ʻEikí ʻa ʻEne ʻaloʻofá pea ʻoku ou malava ke fakalakalaka. ʻOku lava ke u ongoʻi nonga ʻi ai ʻi he lotolotonga ʻo e ngaahi hohaʻa lahí.
Kuo ngaohi au ʻe he ngaahi tōʻonga ko ʻení ke u houngaʻia ʻi he meʻa ʻoku mahuʻinga taha ʻi he ongoongoleleí. ʻOku nau fakamanatu mai ke ʻoua naʻá ku ʻai ke faingataʻa ʻa e meʻa ʻoku faingofuá.
ʻOku Ngāue ʻa e Ongoongoleleí
Kapau ʻokú ke fefaʻuhi mo e feinga ke haohaoá pe ongoʻi taʻefeʻunga pe hangē ʻoku fakakavenga ʻa e ongoongoleleí, manatuʻi ʻa e ngaahi lea ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá:
“ʻOku mātuʻaki faingofua, pea ʻaonga ʻaupito [ʻa e ongoongoleleí].
“… Kapau ʻe faifaiange peá ke pehē ʻoku ʻikai fuʻu ʻaonga fēfē ʻa e ongoongoleleí kiate koe, ʻoku ou fakaafeʻi koe ke ke kiʻi tuʻu ʻi ha tuʻunga māʻolunga, ʻo vakaiʻi hoʻo moʻuí, pea fakafaingofuaʻi hoʻo foungá ki he tuʻunga fakaākongá. Tokanga taha ki he ngaahi tefitoʻi tokāteliné, tefitoʻi moʻoní, mo e fakaʻaongaʻi ʻo e ongoongoleleí. ʻOku ou palōmesi atu ʻe tataki mo tāpuakiʻi koe ʻe he ʻOtuá ʻi ho halá ke ke aʻusia ha moʻui ʻoku fiefia angé pea ʻe ʻaonga lelei ange ai e ongoongoleleí kiate koe.”3
ʻI heʻeku tokanga taha ki he ngaahi moʻoni haohaoa ʻo e ongoongolelei ʻo Sīsū Kalaisí, kuó u mātā ai hono fakafaingofuaʻi ʻeku moʻuí mo ʻeku tuí. ʻOku ou ʻiloʻi ʻe pehē pē mo koe.