Welkam long YA long Wik

Welkam long YA long Wik—wan pablikesen long wik, stret long ples ia, insaed long Gospel Laebri ap we i blong ol yang adalt mo i kam long ol yang adalt, mo tu, ol lida blong Jos mo ol nara top man mo woman we oli tokbaot sam topik we i blong laef blong yumi tedei.

Gol blong Yumi

Gol blong yumi i blong helpem yufala blong faenem ol ansa blong ol jalenj blong yufala, mo kasem paoa blong fesem olgeta jalenj ia. Bambae yumi mekem hemia taem we, tugeta, yumi luklukgud insaed long gospel blong Jisas Kraes mo stap luklukgud olsem wanem ol yang adalt raon long wol oli stap traehad blong laef folem gospel ia.

Abaot Yumi

Ol fas samting fastaem: ful seksen ia, insperesen i bin kam tru long yufala. Yumi fesem ol desisen blong mekem, ol niu jalenj, mo plante jenis insaed long laef blong yumi, long taem blong yumi tedei. Mo mifala i wantem gaedem yufala tru long evri samting ia. Mifala i wantem tu se yu save se mifala i luk huia yufala, from huia yufala, be i no se yu mared o no; hemia nao oli no singaotem seksen ia YA long Wik. Wanem i stap long ples ia, i blong evri yang adalt, olgeta we oli singgel, o mared, o singgel bakegen, from se wok blong yufala long Jos—mo long wol—oli save makem, i nomata se yu stap wea long yang adalt laef blong yu naoia.

Mifala i ting se, ol topik we bae yumi lukluk long olgeta, bae i blong intres blong evri yang adalt, iven olgeta we oli gat ova long 30 yia. Mifala i save se intres blong yufala long ol topik mo ol jalenj we bae yumi tokbaot, bae oli no jenis from se yu gat wan nara betdei. Ol samting we yumi stap fesem tedei, oli blong yumi evriwan, mo oli bigwan inaf blong yumi evriwan i save wokemaot tugeta, i nomata se yu olfala hamas.

Mifala i luksave se yufala i kamaot long ol defren kaen laef, defren kaen edukesen, ekonomi blong yufala i defren, ol kalja mo ol situesen oli defren. Mekem se, bae yumi kavremap plante defren kaen topik, mo plante long ol storian blong yumi, bae oli stap long moa long 20 lanwis insaed long Gospel Laebri—mifala i wantem kasem yufala evriwan, mo mifala i wantem tokbaot samting we i stret long laef blong yufala evriwan. Ol yang adalt raon long wol oli stat blong tekem fet mo talen blong olgeta i kam insaed long Jos. Long plante ples, yumi no jes ol lida blong tumoro, be yumi stap lidim Jos tedei, mo tu, long ol ples we Jos i bin stanap long hem blong wan longfala taem finis. Wok blong yumi, bae i go, i go, i bitim tedei, from se bae yumi ol papa mo ol mama blong nekis jeneresen tu.

Yumi Save Gogohed

I gat plante moa samting we yumi save talem abaot hamas ol yang adalt oli impoten mo hamas paoa oli save kasem, be sapos yumi gogohed, bae i olsem se yumi stap tekem yumi antap (from se jeneresen blong yumi i gud tumas). I inaf blong talem se: God i nidim yumi, yumi nidim God mo Jos blong Hem, mo tu, yumi nidnidim wanwan long yumi. Tugeta, “bae yumi mekem histri,” olsem we Presiden Russel M. Nelson i talem abaot ol yang adalt. “Bambae Lod i givim paoa long yufala blong mekem samting we i no posibol i hapen. …

“… ‘Be yufala, God i jusumaot yufala blong yufala i laen blong hem.’ (1 Pita 2:9), we !God i jusumaot yufala finis blong mekem wan bigfala wok—blong yufala i help blong mekem ol pipol blong wol ia i rere from Seken Kaming blong Lod!”¹

I nomata se ol samting we yumi no save tedei, we oli jenis oltaem, mo ol samting we yumi no save stret abaot fiuja, laef olsem wan yang adalt i wan bigfala gud taem blong faenemaot huia yuwan, blong stap gro, mo stap faenem stamba tingting blong yumi stap long wol ia, mo stap lanem olsem wanem blong kipim gospel i stap long stamba blong laef blong yumi. !Mifala i glad tumas blong stap long wokbaot ia wetem yufala, mo mifala i hop se bambae yufala i kambak blong visitim pej ia oltaem!

Weaples blong Faenem Mifala

Faenem moa atikol blong ol yang adalt long YA long Wik, insaed long Gospel Laebri anda long Magasin, o Adalt > Yang Adalt. Antap long faenem sam moa storian insaed mo Liahona magasin, mo long Facebook (Fesbuk) pej blong Liahona mo long ChurchofJesusChrist.org/study?lang=bis hompej mo blog.

Mifala I Wantem Harem Yufala

?Wanem topik nao yufala i wantem yumi tokbaot?
?Wanem stori yufala i gat blong serem?
?Wanem tingting yufala i gat blong talem long mifala?

Yu save sendem ol stori, ol aedia, mo ol fidbak blong yu long liahona.ChurchofJesusChrist.org. !Mifala i wantem tumas blong harem yufala kwiktaem!